NAGTITIKAPASO an palibot han aga han Biernes, Septyembre 1922 samtang nagkakatirok ha awditoryum an 8,000 nga delegado. Iginpahibaro han tsirman nga durante hiton importante nga sesyon, puydi gumawas an bisan hin-o, pero diri na makakasulod utro.

Katapos magkanta hin mga karantahon durante han “Praise Service,” kinadto ha podyum hi Joseph F. Rutherford. Ginpapamulat gud han mamarati an programa. An pipira diri namumurayaw tungod han kapaso. Gin-aghat hira han mamumulong nga lumingkod na ngan mamati. Han nagtikang an pahayag, may nakaobserbar ba han hilapad nga linukot nga tela nga nakahigot ha igbaw han entablado?

Hi Bugto Rutherford nagpahayag ha ulohan nga “Hirani na an ginhadian han langit.” Ha sulod hin mga usa ka oras ngan tunga, an iya daku nga tingog nalanog ha awditoryum samtang iya ginhihisgotan kon paonan-o an mga propeta hadto nagin maisugon ha pagpasamwak han pag-abot han Ginhadian. Han ikatarapos han iya pahayag, hiya nagsiring: “Natoo ba kamo nga nagtikang na pagmando an mahimayaon nga Hadi?” Makusog nga binaton an mamarati: “Oo!”

“Kon sugad, balik ngadto ha kanataran, O kamo nga mga anak han gihitaasi nga Dios!” hi Bugto Rutherford nagyakan ha daku nga tingog. “Kitaa, an Hadi nagmamando na! Kamo an iya mga ahente nga magpapasamwak hito. Salit ipasamwak, ipasamwak, ipasamwak.”

Hito nga takna, hinay-hinay nga nabuklad an tela ha igbaw han entablado nga may nakasurat: “Ipasamwak an Hadi Ngan an Ginhadian.”

“Nadasig gud an mga mamarati,” siring ni Ray Bopp. Hi Anna Gardner nagsiring nga baga hin nakurog an bug-os nga awditoryum tungod han makusog nga pagpakpak. “An ngatanan nga mamarati durungan nga nanindog,” siring ni Fred Twarosh. Hi Evangelos Scouffas nagsiring liwat, “Baga hin may pwersa nga nag-alsa ha amon tikang ha lingkoran, ngan nanindog kami nga nagtatangis.”

Damu han mga delegado an nagpapasamwak na han maopay nga sumat han Ginhadian. Pero hito nga higayon, nagkaada hira dugang nga kadasig ngan bag-o nga hinungdan ha pagsangyaw. Hi Ethel Bennecoff nagsiring nga an mga Estudyante han Biblia inuli nga “may dugang nga kadasig ngan daku nga gugma kay ha kakan-o pa man.” Hi Odessa Tuck nga 18 anyos hadto, inuli tikang ha kombensyon nga determinado nga sumugot ha panawagan nga ‘Hin-o an makadto?’ Hiya nagsiring: “Diri ako maaram kon makain ako o mag-aano. Basta karuyag ko la magin pariho kan Isaias, nga nagsiring: ‘Iini ako; pakadto-a ako.’” (Isa. 6:8) “Iton makatirigamnan nga adlaw,” siring ni Ralph Leffler, “amo gud an tinikangan han kampanya han pagpasamwak han Ginhadian nga nakakaabot na yana ha bug-os nga tuna.”

Diri urusahon nga an kombensyon ha Cedar Point, Ohio, han 1922 nagin importante gud nga teokratiko nga hitabo ha kasaysayan! Hi George Gangas  nagsiring: “Ito nga kombensyon nagparig-on han akon hingyap nga diri gud pumalya ha mga kombensyon.” Ngan waray gud hiya pumalya sumala han iya nahinunumdoman. Hi Julia Wilcox nagsurat: “Nalilipay gud ako ha kada panahon nga gin-uunabi ha aton mga literatura an panhitabo ha Cedar Point han 1922. Karuyag ko gud pirme magsiring, ‘Salamat Jehova nga gintugotan mo ako nga makatambong hito.’”

Posible nga damu ha aton an may pariho nga presyoso nga mga hinumdoman ha usa nga kombensyon nga nakabantad gud ha aton ngan nakadugang han aton kadasig ngan gugma ha aton Gihitaasi nga Dios ngan ha iya ginpili nga Hadi. Samtang ginpapamalandong naton ito nga mga hinumdoman, napapagios liwat kita ha pagsiring, “Salamat Jehova nga gintugotan mo ako nga makatambong hito.”