DAMU an opinyon mahitungod ha kinabuhi ngan kamatayon. May mga natoo nga kamatay nira, padayon hira nga mabubuhi, bangin ha iba nga porma o ha iba nga lugar. Samtang an pipira natoo nga ig-aanak hira utro ha iba nga kinabuhi. Kondi para ha iba, an kamatayon amo an kataposan han ngatanan.

Bangin may kalugaringon ka nga gintotoohan mahitungod han topiko, depende han imo gindak-an o kultura. Tungod kay magkaiba-iba an opinyon kon ano an nahitatabo kon mamatay an usa, may-ada ba kita makukuhaan hin masasarigan ngan tinuod nga baton hinin nakakagupong nga pakiana?

Ha sulod hin damu ka tuig na, igintututdo han mga lider han relihiyon an doktrina nga diri namamatay an kalag han tawo. An mga membro han haros tanan nga dagku nga relihiyon—Kristiano, Hindu, Judio, Muslim, ngan iba pa—natoo han pag-eksister han diri namamatay nga kalag nga gintotoohan nga nagawas ha lawas kamatay han usa, ngan nagpapabilin nga buhi ha kalibotan han espiritu. Ha luyo nga bahin, natoo an mga Budhista nga pinaagi han diri maihap nga pag-anaka utro, an pwersa o an enerhiya han hunahuna ha sulod han tawo mahimo makadangat ha mahimyang nga kahimtang nga gintatawag nga Nirvana.

Tungod hito nga mga katutdoan, kadam-an ha bug-os nga kalibotan an natoo nga an kamatayon nag-aabri han purtahan tipakadto ha iba nga kalibotan. Salit para ha damu, an kamatayon importante nga bahin ha sikolo han kinabuhi ngan baga hin upod ito ha katuyoan han Dios. Kondi ano an ginsisiring han Biblia mahitungod hini? Alayon basaha an sunod nga artikulo. Bangin mahipausa ka han baton.