BINURO ka hin hinog nga mansanas tikang ha sanga. Ginhamot mo pa ngani ito antes ibutang ha basket nga hirani na mapuno. Pipira ka oras ka na nga nagtitrinabaho, pero diri ka pa kapoy ngan puydi pa magtrinabaho. An imo nanay namumuro gihap dida la ha kahirani nga puno samtang malipayon nga nakikig-inistorya ha iyo mga paryente ngan kasangkayan nga nabulig ha pamuro. Bata pa gud hiya pagkit-on—nahinumdom ka nga han bata ka pa ito an iya hitsura. Makuri toohan nga nakita mo hiya nga nalagas ha kalibotan nga maiha na nga nawara. Nakita mo hiya nga nagtikaluya tungod ha sakit, ngan samtang ginkakaptan mo an iya kamot, nakita mo an iya ultimo nga pagginhawa, ngan nagtinangis ka gud kay waray na hiya. Kondi yana, kaupod han iba, buhi hiya ngan mahimsog!

Ito nga mga panhitabo diri imahinasyon la, ngan maaram kita hito. Sigurado kita hito tungod kay an mga saad han Dios pirme natutuman. Hini nga seksyon, paghihisgotan naton kon paonan-o matutuman an mga saad han Ginhadian ha hirani nga tidaraon nga magtutugway ha girra han Armagedon. Rirepasuhon liwat naton an pipira han makalilipay nga mga saad han Ginhadian nga matutuman katapos hito. Sigurado nga makalilipay gud nga makita an panahon nga nagmamando na an Ginhadian han Dios ha bug-os nga tuna, ngan ginhihimo nga bag-o an ngatanan nga butang!