Samtang bihag an mga Israelita ha Babilonya, nagkaada hira damu nga pagsari han ira pagtoo. Hira Sadrak, Mesak ngan Abednego iginlabog ha naglalaga nga hudno, kondi ginluwas hira han Dios. Katapos, han napirde an Babilonya han mga Mediahanon ngan Persiahanon, iginlabog hi Daniel ha lungib han mga leon, kondi ginpanalipdan liwat hiya han Dios pinaagi ha pagtak-om han baba han mga leon.

Ha urhi, an mga Israelita gintagan hin kagawasan han Persiahanon nga hadi nga hi Ciro. Binalik hira ha ira natawohan nga tuna katapos han 70 ka tuig nga pagin bihag ha Babilonya. Usa han ira siyahan nga ginbuhat pagbalik nira ha Jerusalem amo an pagtukod utro han templo ni Jehova. Kondi waray pag-iha, naundang an ira buruhaton tungod han mga kaaway. Salit natapos nira an templo, mga 22 ka tuig katapos nira bumalik ha Jerusalem.

Sunod, aton hibabaroan an pagbyahe ni Esra tipabalik ha Jerusalem basi opayon pa gud an templo. Nahitabo ini 47 ka tuig tikang nga natapos an templo. Katapos, paglabay hin 13 ka tuig tikang han pagbyahe ni Esra, binulig hi Nehemia ha pagtukod utro han naruba nga pader han Jerusalem. An mga panhitabo ha Bahin SINGKO inabot hin 152 ka tuig tubtob hito nga panahon.