3 Juan 1:1-14
1 Tikang ha tigurang nga tawo, para ha hinigugma nga hi Gayo, nga akon gud hinigugma.
2 Hinigugma ko nga bugto, igin-aampo ko nga ha ngatanan nga butang padayon ka nga mag-uswag ngan magpahimulos hin maopay nga kahimsog, sugad la nga nag-uuswag an imo kalag.*
3 Kay daku gud an akon kalipay han inabot an kabugtoan ngan nagpamatuod mahitungod han kamatuoran nga aada ha imo, samtang nagpapadayon ka ha paglakat uyon ha kamatuoran.
4 Waray na ako mas maopay nga hinungdan ha pagpasalamat kay ha mabatian ko nga an akon mga anak padayon nga naglalakat uyon ha kamatuoran.
5 Hinigugma ko nga bugto, an imo pagkamatinumanon nakikita ha imo ginbubuhat ha kabugtoan, bisan kon diri mo hira kilala.
6 Ginpapamatud-an nira ha kongregasyon an imo gugma. Paglakat nira, alayon updi hira hin pipira ka distansya ha paagi nga makakalipay ha Dios.
7 Kay tungod han iya ngaran linakat hira basi magsangyaw, nga diri naglalaom hin bisan ano tikang ha mga tawo han mga nasud.
8 Salit kinahanglan magpakita kita hin pagkamaabiabihon ha sugad nga mga tawo, basi kita magin igkasi-magburuhat ha pagsuporta han kamatuoran.
9 Nagsurat ako ha kongregasyon, pero hi Diotrepes, nga karuyag magmayor-mayor ha ira, diri narespeto han bisan ano nga amon ginsisiring.
10 Salit kon makakada ako, isusumat ko an iya mga buhat, sugad han pagyinakan hin maraot ngan waray pulos mahitungod ha amon. Ngan tungod kay diri pa hiya kontento hito, diri niya ginrirespeto ngan ginkakarawat an kabugtoan, ngan an mga naruruyag pagkarawat ha ira iya ginpupugngan ngan ginpapaiwas ha kongregasyon.
11 Hinigugma ko nga bugto, ayaw pagsubad han maraot, lugod pagsubad han maopay. An nagbubuhat hin maopay tikang ha Dios. An nagbubuhat hin maraot waray makakita ha Dios.
12 Maopay gud an ginsisiring nira ngatanan mahitungod kan Demetrio ngan han kamatuoran mismo. Ha pagkamatuod, kami liwat nagtitestigo mahitungod ha iya, ngan maaram kamo nga totoo gud an amon pamatuod.
13 Damu pa an akon igsusumat ha imo, pero diri ko karuyag nga igsurat la ito gamit an pan-surat ngan tinta.
14 Kondi naglalaom ako nga ha diri mag-iiha makikita ko ikaw, ngan magkakaistorya kita.
Hinaot magkaada ka hin kamurayawan.
Nangungumusta ha imo an aton kasangkayan. Alayon ipaabot an akon pangumusta ha tagsa han mga kasangkayan.
Mga footnote
^ Kitaa an Apendise 7.
