Geeshsha Maxaafay yootiyobaa

 Xoossay yootidobay woy I yootidobati issippe shiiqidaageeti darotoo “Xoossaa qaalaa” geetettidosona. (Luqaasa 11:28) “Xoossaa Qaalaa” woy ‘Qaalaa’ giyogee amarida sohotun issi ura bonchcho suntta qonccissees.—Ajjuutaa 19:13; Yohaannisa 1:14.

 Xoossay yootidobaa. Xoossay erissidobaa yootiyageeti eti yootiyo kiita Xoossaa qaalaa giidosona. Leemisuwawu, Ermmaasi hiraagaa yootiiddi, ‘Yihoowa qaalay taayyo yiis’ giidi erissiis. (Ermmaasa 1:4, 11, 13; 2:1) Xoossay erissidobaa yootiya Sameeli kawotanaadan Xoossay A dooridoogaa Saaꞌoolawu yootanaappe kase, “Taani neeyyo Xoossai giidobaa odana mala, hagan guuttaa takkashsha” yaagiis.—1 Sameela 9:27.

 Issi ura bonchcho sunttaa. Qassi Yesuus Kiristtoosi saluwan ayyaana, saꞌan asa gididi deꞌiyo wode Geeshsha Maxaafan “Qaalaa” geetettiis. Hegaadan giyo amarida gaasota akeeka:

•   Qaalay hara mereta ubbaappe kasekka deꞌees. “Doomettan Qaalaa giyogee deꞌees . . . I doomettaappekka Xoossaara deꞌees.” (Yohaannisa 1:1, 2) Yesuusi “merettida ubbabaappe bayra . . . I hara ubbabaappe kasekka deꞌees.”—Qolasiyasa 1:13-15, 17.

•   Qaalay asa gididi saꞌaa yiis. “Qaalay asa gididi nunaara deꞌiis.” (Yohaannisa 1:14) Kiristtoos Yesuusi “bawu deꞌiya ubbabaa aggi bayidi aylle milatiisinne asa gidiis.”—Piliphphisiyusa 2:5-7.

•   Qaalay Xoossaa Naꞌaa. Qommoora giidoogaadan, kiitettida Yohaannisi ‘Qaalay asa gididoogaa’ yooti simmidi, “Nuuni A bonchchuwa, aawi dumma naꞌa bonchchiyogaa mala bonchchuwa beꞌida” yaagiis. (Yohaannisa 1:14) Yohaannisi ‘Yesuusa Xoossaa Naꞌaakka’ giis.—1 Yohaannisa 4:15.

•   Qaalay Xoossaa mala gidiyogeekka odettiis. “Qaalay xoossa.” (Yohaannisa 1:1) Yesuusi “bonchchuwan Xoossaa milateesinne muleera A duutti ekkiis.”—Ibraawe 1:2, 3.

•   Qaalay kawo gididi haarees. ‘Kawoti huuphiyan qaciyo darobati’ Xoossaa Qaalaa huuphiyan deꞌiyogaa Geeshsha Maxaafay yootees. (Ajjuutaa 19:12, 13 tohossa qofaa) Hegaadankka, Qaalay “kawotu Kawuwanne godatu Godaa” geetettiis. (Ajjuutaa 19:16) Yesuusi he bonchcho sunttan xeegettiis.—1 Ximootiyosa 6:14, 15.

•   Qaalay Xoossaa gishshaa haasayees. “Qaalaa” giya bonchcho sunttay erana koshshiyabanne kaaletuwa Xoossay A baggaara yootiyo ura bessiyaba gidiyogee qoncce. Yesuusi, “Taani ay yootanaakkonne ay tamaarissanaakko tana kiittida Aaway tana azaziis. . . . Hegaa gishshawu, taani yootiyo ubbabaa ta Aaway taayyo odidoogaadan yootays” yaagidi, hegaa oottidoogaa yootiis.—Yohaannisa 12:49, 50.