Akkay, biittay xayenna, taman xuugettenna woy A sohuwan haray merettenna. Biittay merinawu deˈiyo soho gidanaadan Xoossay medhdhidoogaa, Geeshsha Maxaafay yootees.

•   “Xilloti biittaa laattananne yan merinau de7ana.”—Mazamure 37:29.

•   “Neeni sa7aa a baasuwaa bolli essadasa; i meri merinaukka qaaxxenna.”—Mazamure 104:5.

•   “Biittai merinaukka laamettennan de7ees.”—Eranchchaa 1:4.

•   “Biittaakka giigissidi oottidaagee, qassi asi de7anaadaanappe attin, biittaa coo medhdhibeenna.”—Isiyaasa 45:18.

 Heeraa hambbalaashiyaaban, olan woy haraban asay saˈaa xayssanaadan Xoossay mule paqqadenna. SHin, I ‘saˈaa xayssiyaageeta xayssana.’ (Ajjuutaa 11:18) I hegaadan waati oottanee?

 Xoossay saˈaa naaganawu danddayibeenna asaa kawotettaa xayssidi, eta sohuwan wottiyoobi baynna saluwaa Kawotettay haaranaadan oottana. (Daaneela 2:44; Maatiyoosa 6:9, 10) Xoossaa naˈay Yesuus Kiristtoosi he Kawotettan haarana. (Isiyaasa 9:6, 7) Yesuusi saˈan deˈiyo wode, carkkuwaa seeriyo maalaaliya wolqqay baayyo deˈiyoogaa bessiis. (Marqqoosa 4:35-41) Yesuusi Xoossaa Kawotettaa Kawo gidiyo gishshawu, saˈaanne saˈan deˈiya ubbabaa haarana. I saˈan deˈiyaabata zaarettidi giigissiyoogan, woy ooraxissiyoogan saˈaa Edene gannatiya mala oottana.—Maatiyoosa 19:28; Luqaasa 23:43.

 Akkay, tamaarissenna. Asay 2 PHeexiroosa 3:7n deˈiya qofaa darotoo bala ogiyan akeekiyo gishshawu hegaadan qoppees. Xiqisee hagaadan gees: “Ha77i de7iya saloinne sa7ai, . . . tamaa naagoosona.” He qofay woygiyoogaakko loytti akeekanawu maaddiya naaˈˈubata beˈa:

1.   Geeshsha Maxaafan, “saluwaa,” “saˈaa,” qassi “tamaa” giya qaalati issuwaappe dariyaabaa qonccissoosona. Leemisuwawu, Mazamure 33:8y, “Sa7a ubbai GODAAYYO yayyo” yaagees. Ha sohuwan, ‘saˈaa’ giya qaalay asaa bessiyaaba.

2.   Saluwaa, saˈaanne tamaa geetettidabati aybakko 2 PHeexiroosa 3:7 yuushuwan deˈiya qofaappe akeekana danddayoos. Paydo 5ynne 6y, Nohe wode Bashshaa Haattaara hegaa geeddarssees. He wode deˈiya asay xayidaba gidikkonne, saˈay xayibeenna. He wode, ‘saˈaa’ geetettida iita asata Bashshaa Haattay muleera xayssiis. (Doomettaabaa 6:11) Saˈan deˈiya he iita asata haariya ‘salo’ geetettida asaakka xayssiis. Yaatiyo gishshawu, xayiday saˈaa gidennan, makkalanchcha asata. Noheenne A soo asay Bashshaa Haattay he asata xayssiyo wode attidi saˈan deˈidosona.—Doomettaabaa 8:15-18.

 Bashshaa Haattaa wode hanidoogaadan, 2 PHeexiroosa 3:7n ‘tamaa’ geetettida bashshay, saˈaa gidennan saˈan deˈiya iita asata xayssana. ‘Xilloti deˈana’ “ooratta saluwaanne ooratta sa7aa” ehaanawu Xoossay qaalaa geliis. (2 PHeexiroosa 3:13) ‘Ooratta saloy’ woy Xoossaa Kawotettay, “ooratta sa7aa” geetettida Xoossawu azazettiya asata haarana. He Kawotettaa haaruwan saˈay sarotettay kumido gannate gidana.—Ajjuutaa 21:1-4.