Ekaarta ya Yakobe 5:1-20
5 Vanonto, anamuhakhu mukiwiriyane! Mwinle ni mwiikhupanyere mwaha wa ohaawa onkela woophwanyani muhoolo.
2 Mihakhu sanyu sohuntta ni ikuwo sanyu sootxiwa oweexe.
3 Ewooru anyu ni eparatha anyu yohoonya murawa ni murawa owo onimoohelelani onamoona ni onimookumiherani maxupo. Itthu nyuwo muraanyuno* sinrowa okhala ntoko mooro mahiku oomalihera.
4 Nkawehani! Musurukhu muhiñyaanyu waaliva anamuteko yaahepha mmatta mwanyu onnakhuwela, ni okhuwela waya weera ekhaviheriwe alipa oohepha ala Yehova* aanakhotto ohiiwa.
5 Elapo ya vathi nyuwo mwaakhalano ekumi yoopuha ni mwannapaka itthu mwaatthunaanyu. Nyuwo mohootxa ni mooneneva ntoko enama nihiku enkelaaya wiiviwa.
6 Nyuwo monwalela ni moomwiiva naxariya, neereke owo khoovirikanyihani?
7 Vanonto asinna, mukhale oopixa murima mpaka owa* wa Apwiya. Moone moota mulipa oolima onwehereraawe soowiima sootthuneya sa ematta awe, awehereraka moopixa murima orupa epula yoopatxera ni yoomalihera.
8 Vamoha-moharu, nyuwosa-tho mpixeke murima, mulipe murima mwaha wooweera owa* wa Apwiya onnaattamela.
9 Asinna muhikhupanyaneke* mukina ni mukhwaawe weera muhithorihiwe. Nkawehani! Mphuki ori vamulako.*
10 Vanonto asinna, woohima sa ovilela maxupo ni okhala oopixa murima, mutthareke ntakihero na maprofeta yaawo yuulumme mwa nsina na Yehova.*
11 Ninnaahima okhala oohakalala* atthu ale evilenle. Nyuwo mohiiwa moota Yobi aavilenlaawe; ni mohiiwa moota Yehova* aamureelinhaawe. Nyuwo munnoona nnene sene weera Yehova,* Muluku a nsivelo ni oomoriwa ikharari.
12 Asinnaka, opwaha mwa itthu sootheene muhiye olipela muromolaka erimu, naari elapo ya vathi naari muhilipeleke muromolaka etthu ekina. Nto masu anyu ekhaleke “aani, aani”, “hooye, hooye”, weera muhithorihiwe.
13 Neereke ookhala mutthu onhaawa variyari vanyu? Mutthu owo avireleleke ovekela. Neereke ookhala mutthu oohakalala? Mutthu owo iipeke masalmu.
14 Neereke ookhala mutthu onvoreiwa variyari vanyu? Owo awiitthane asitokweene a mmulokoni, ni awo enonvekelela emuttikitthelaka makhura mwa nsina na Yehova.*
15 Nivekelo noopakiwa ni nroromelo nnoomweeriha mulipa owo oovoreiwa* olama, ni Yehova* onoomulamiha. Opwaha mwa yeeyo, wakhala weera owo opanke yoottheka, onooleveleliwa.
16 Muhiipithiheke soottheka sanyu wa atthu akina, ni nvekelelaneke mukina ni mukhwaawe weera mulamihiwe. Nivekelo na naxariya nookhalano owera.
17 Eliya aari mutthu ntoko hiyo; mene emaara owo aavekenlaawe mootxonttela weera ehirupe epula, epula eyo khayaarumpe elapo ene yeele mpuwa mwa iyaakha tthaaru ni minyeeri 6.
18 Nto owo aavekela veeli, ni erimu yaarupiha epula ni etthaya yaakumihera yootxa.
19 Asinnaka, wakhala weera mutthu mmoha a nyuwo oohapuxiwa anahiya weettela ekhaikhai, ni mmoha a nyuwo amweeriha otthikela ekhaikhai,
20 musuweleke weera ole onkela omukhavihera namattheka ohiya weettela iphiro iye soonanara, ononvuluxa mookhwaani* ni onookhuneela soottheka sintxipale.
Footnotes
^ Naari: “mwiithukumanyenraanyu.”
^ Nwehe masu oowiiwanyeihiwa.
^ Nwehe masu oowiiwanyeihiwa.
^ Naari: “muhinyoonyeraneke.” Ni Ekereku: “muhihimereke.”
^ Naari: “vakhiviru.”
^ Naari: “ooreelihiwa.”
^ Apaale: “ookhulumuwa wa mukhalelo wa omunepani.”
^ Naari: “onoovuluxa ekumi awe.”
