Ekaarta ya Yakobe 4:1-17
4 Etthu heeni entannyera onyakulihana ni ohiiwanana wanyu? Khaiyene mwaha wooweera muneettihiwa ni sootthuna sanyu soonanara sa erutthu sinwana ni nyuwo vamurimani vanyu?
2 Nyuwosa munnavirelela winlela itthu mene khamunaakhela etthu. Nyuwosa munnavirelela wiittana ni winlela itthu sa atthu akina, mene khamumphwanya etthu. Nyuwo munnavirelela owana ni munnavirelela okhala ntoko munwana ekhotto. Waari weera nyuwo khamwaano etthu, mwaha wooweera khamunvekela etthu.
3 Emaara munvekelaanyu, khamunaakhela etthu, mwaha wooweera munvekela ni yootthuna yoonanara, weera munanariheke mpakelaka sootthuna sanyu sa erutthu.
4 Anamararuwa,* khamusuwenle weera onthamwene ni elapo onwiihera wiittana ni Muluku? Tivawonto, ole ontthuna okhala nthamwene a elapo, onnakhala mwiittani a Muluku.
5 Naari munoona weera ti woohikhala nthowa Soolepa sinhimaaya weera: “Sootthuna sa murima sinkhala mwa hiyo, sinnavirelela okhala soosareya nrima”?
6 Menento, oreera murima otokweene Owo onnivahaawe, otokweene. Tivawonto Soolepa sinhimaaya weera: “Muluku onnawiitta atthu oowiisoona, mene onnawoonihera oreera wawe murima otokweene atthu oowiiyeviha.”
7 Tivanto, mmwiiweleleke Muluku; mene mmwiitteke Diabo, ni Diabo owo onimootthawani.
8 Mmwaattameleke Muluku ni owo onoowaattamelani nyuwo. Mwiitteelihe matata anyu, muhiyaka opaka itthu soonanara, ooh nyuwo atthu oottheka, ni mutteelihe murima anyu, nyuwo munhovela.
9 Muriipiweke murima, mwiikhupanyereke ni mwinleke. Otheya wanyu othatuwe winla, ni ohakalala wanyu othatuwe oriipiwa murima.
10 Mukhaleke oowiiyeviha vamaithoni va Yehova,* ni owo onoowunnuwihani.
11 Asinna, muhiye wuulumana onyala mukina ni mukhwaawe. Ole ommuuluma onyala munna, naari ommuthoriha munnawe, onuulumela onyala nlamulo ni onnathoriha nlamulo. Vano, waari weera munthoriha nlamulo, nyuwo khaiyene muntthara nlamulo, mene mwa mphuki.
12 Muluku ori meekhaawe paahi onkumihera Malamulo ni ori Mphuki, ni ti yoowo orinono owera woovuluxa ni woonyaanya. Vanonto, nyuwo taani weera mmuthoriheke munninyu?*
13 Vano mukiiwe nyuwo muneera: “Olelo naari omaalo, nnimweetta ekwaha nrowaka esidade emoha ninrowa okhala wuuwu eyaakha emoha nimweettaka nakoso, ni nnoophwanya musurukhu.”
14 Munhima hiiho, nnaamweera muhisuwelaka etthu enkela weereya ni ekumi anyu omaalo. Mwaha wooweera ekumi anyu enlikana ni etthapwe, eniima oxeexelo enakhala mwa etempu vakhaaniini, avinyaka othana enamalamala.
15 Ohiya wuuluma muneeraanyu, wuuluma mwaakela weeraka ha: “Yehova* atthuna vale, nnookhala akumi, ni nnoovara ela niile.”
16 Mene etthu eneereya ti yooweera nyuwo munniittottopela mwaha wa sootthuna sanyu soowiisunnuwiha. Wiisunnuwiha wootheene nno, ti woonanara.
17 Tivawonto, wakhala weera mutthu oosuwela etthu yooreera avinyaka vaavo ahimpaka etthu eyo yooreera, onimweera ottheka.
