Ekaarta ya Yakobe 3:1-18
3 Asinnaka khaiyene weera ootheene nyuwo muneere okhala anamaxuttiha, woona weera wakhala weera nnookhala anamaxuttiha nnookhalano muritti mutokweene vamaithoni va Muluku.
2 Ootheene hiyo ninnattheka ikwaha sintxipale, wakhala weera mutthu khanttheka ni masu, mutthu owo toomalela ni onoowera weettiha erutthu awe yootheene.
3 Wakhala weera nnoohela mukhoyi* vayanoni va kavalu weera aniiweleleke, ninneettiha-tho erutthu awe yootheene.
4 Nwuupuwele-tho anaviyu: nnaamweera ereene atokotoko ni ehooleliwaka ni epheyo yoowuupa, awo eneettihiwa ni eleemi ekhaanini erowaka nipuro nenno mulipa ommweettiha ontthunaawe ophiya.
5 Emoha-moharu, nlumi eparte emoha ekhaanini ya erutthu, nto ni nlumi hiyo ninniisunnuwiha ni itthu itokotoko. Nnaamweera mooro oreene vakhaaniini owo onnawera ohisa ntuphi ntokotoko.
6 Nave-tho, nlumi mooro. Mwa iparte sootheene sa mweerutthuni nraahuno, nlumi nsareñye itthu soonanara. Woona weera nno ninnananariha erutthu yootheene nave ninnahisa ekumi ahu; ni mooro aya onkhuma ogehena.*
7 Vano ikhurupu sootheene sa asinama a mutuphini, apalame, iye siniipurula ni soopattuxiwa sa mmaahini, pooti ohuuwa ni atthu.
8 Menento, khaavo mutthu onwera okosoopa nlumi nawe. Woona weera nno khaninleeleya noosareya itthu soonanara ni evenenu yoowiiva.
9 Hiyo ninnavarela muteko nlumi nno weera ninvuwihe Yehova* Tiithi, nave-tho ni nlumi nene nenno ninnavarela muteko weera niwuulumele atthu “epattuxinwe moolikana ni Muluku”.
10 Eyano emoharu yeeyo ennakhuma mareeliho ni wuulumela.
Asinnaka, khaiyene ti wooreera weera itthu seetteke moota ene yoola.
11 Neereke onnawereya ehime emoharu okumiha maahi oosiva ni maahi oowaawa?
12 Asinnaka, neereke mwiri wa ifiiku onniimiha soowiima sa aseitoona, naari neereke mwiri wa uva onniimiha ifiiku? Emoha-moharu-tho, ehime ya maahi oosiva, khonwereya okhuma-tho vaavo maahi oosiva maakha.
13 Neereke variyari vanyu ookhala mutthu a miruku? Ontthuneya weera oonihereke eyo akhalakano ekumi yooreera, apakeke itthu sootheene ni mukhalelo woomaala onweela mwa miruku.
14 Nto wakhala weera mookhalano nrima vamurimani vanyu ni ohiiwanana,* muhiittottopele naari muhihime etthu envirikanyiha ekhaikhai.
15 Ni osuwela nno khaiyene onkhuma wiirimu ti wa elapo ya vathi, wa weerutthuni, ni wa mademooniyu.
16 Mwaha wooweera, nipuro nraayavo nrima ni ohiiwanana, nipuro nno onookhalavo ohiiwanana* ni itthu sootheene soonanara.
17 Mene woopatxerani, mutthu orino osuwela onkhuma wiirimu onnakhalano ekumi yooreera. Opwaha mwa yeeyo, owo mutthu a murettele, eeriyari-neeriyari, oolikaneene weera iiwelele, oomoriwa ikharari vantxipale, khaano nthalu ni khaiyene namootha, opwaha mwa yeeyo, owo ookhalano mikhalelo sooreera ni onnapaka itthu sooreera.
18 Atthu ale eniiraana ni atthu akina ennakumihera murettele, yookhumelelaaya ti yooweera awo ennapaka itthu sa exariya.
Footnotes
^ Naari: “efereyu”, ola mukhoyi ontthukeliwaawe muxerexere mwa eyano ya kavalu weera eettihiweke.
^ Nwehe masu oowiiwanyeihiwa.
^ Apaale: “otthuna itthu mwa nrima.”
^ Apaale: “otthuna itthu mwa nrima.”
