Ekaarta ya Yakobe 1:1-27
1 Miyo Yakobe, kaporo a Muluku ni Aapwiya Yesu Kristu, kinlepela ekaarta ela kirumihaka vamoha isalaamu saka
wa mahimo 12 emwaramwareñye mapuro oovirikana!
2 Asinnaka, muhakalaleke mweekhaikhai emaara muneereriwaanyu mwa moota woohiyana-hiyana,
3 musuwele weera nroromelo nanyu neererinwe moota ene yoola, ninnalipiha vantxipale ovilela wanyu.
4 Ni ovilela woohihiyerereya onnoorehererani weera mukhale oomalela ni ookhumela nnene mwa itthu sootheene, ehoothowakani etthu.
5 Tivawonto, wakhala weera mutthu khaano miruku, avireleleke onvekela Muluku, ni Muluku ononvaha. Mwaha wooweera Muluku toovaha, ni onnaavaha atthu ootheene. Ni owo khankela omunyoonyeriwa* mutthu ole onanvekela.
6 Tivawonto, nvireleleke ovekela ni nroromelo muhihovelaka etthu, woona weera ole onvekela ahovelaka onlikana ni mutekuteku wa mphareya yoowo epheyo onkuxaaya oroihaka ninno-ninno.
7 Mweekhaikhai, mutthu moota ene yoola, ahiweherere weera Yehova* ononvaha etthu;
8 mutthu owo khasuwenle etthu ontthunaawe,* ni mutthu owo khantthareya mwa soopaka sawe sootheene.
9 Munna piswa* ohikhanleno muhakhu ahakalaleke* mwaha wooweera vamaithoni va Muluku owo onnunnuwihiwa.
10 Mutthu a muhakhu onxuttera okhala oowiiyeviha, nave-tho ahakalaleke; mwaha wooweera muhakhu onoomala ntoko ifuloore sa mmatta.
11 Nsuwa, ninnakhuma ni oviha waya onnuumiha mwiri, nto mwaha wa yeeyo, ifuloore sa mwiri owo sinnamora ni oreera waya onnamala. Hiiho namuhakhu-tho onoolakaseya vamoha ni itthu sawe.
12 Oohakalala ti yoole onvirelela ovilela emaara oneereriwaawe, mwaha wooweera Muluku amwaakhulela vale, owo onimwaakhela ntthuvelo na ekumi. Yeeyo Yehova* aalaihenraawe ale emmusivela owo.
13 Emaara mutthu oneereriwaawe, ahihimeke weera: “Kineereriwa ni Muluku.” Mwaha wooweera Muluku khaneereriwa ni itthu soonanara, naari owo khammweerera mutthu ni itthu soonanara.
14 Menento, mutthu ti mutthu oneereriwa ni yootthuna ya murima awe.
15 Nto, mutthu avarexexa* yootthuna awe eyo ya murima, ennamweeriha opaka yoottheka; ni yoottheka ennakumihera okhwa.
16 Asinnaka oosiveleya, muhiiwokeke.
17 Yoovaha yootheene yooreera ni yoomalela enkhuma wiirimu wa Tiithi yoowo opanke nsuwa, mweeri ni ithenyeeri. Ni Owo khantxentxa ntoko muuttuuxi.
18 Yaari yootthuna awe onivaha ekumi avarelaka muteko masu a ekhaikhai. Owo opanke eyo weera nikhale ntoko soopattuxiwa sawe soopatxera.
19 Asinnaka oosiveleya, muupuweleke ela: ootheene nyuwo mwaakuveke wiiwa, mene muhaakuveleke wuuluma, naari muhaakuveke onyoonyiwa;
20 mwaha wooweera, mutthu oowaakuva onyoonyiwa khaiyene ompaka itthu moovarihana ni exariya ya Muluku.
21 Tivawonto, muhiye itthu sootheene soonanara ni itthu sootheene soohixariya, mene moowiiyeviha mmwaakhuleleke Muluku ohela vamurimani vanyu masu awe, yaawo erino owera woovuluxa ikumi sanyu.
22 Menento, muhikhaleke atthu ooweera wiiwa paahi, mene mukhaleke atthu muntthara masu a Muluku, ni muhiiwokeke ni minyuupuwelo sa ethiru.
23 Mwaha wooweera, wakhala weera mutthu onimweera wiiwa paahi masu, ni ohinvarela muteko onoolikana ni mutthu onoona ekhove awe va espeliyuni,
24 owo onniiwehera, ni apwaha vale owo onnattiwala moowaakuveya moota oraawe.
25 Mene, mutthu ole ontthara Nlamulo noomalela na Muluku ninkumihera otaphuwa, ni ompaka itthu moovarihana ni ele nlamulo ninhimaaya, mutthu owo khaiyene mutthu yoole oniiwa avinyaka onattiwala. Ni owo onoohakalala ni etthu ompakaawe.
26 Wakhala weera mutthu onoona weera ommukokhorela Muluku moophwanelela, mene ohinkosoopa nlumi nawe, mutthu owo onimweera wiiwoka vamurimani vawe, ni okokhorela wawe, khonvareleya muteko.
27 Omukokhorela Muluku ni Tiithi ahu mwa moota wootteela ni wooreerela moovarihana ni moonelo awe, tinno: okosoopa ikwaasuni ni asithiyana asinaamukhweli* mmaxuponi mwaya ni ohiitakansera ni moota enkhalaaya* atthu ehimmwiiwelela Muluku.
