Ekaarta ya Yakobe 2:1-26
2 Asinnaka, onwereya moota heeni nyuwo okhalano nthalu noowaaramusa atthu akina ni waattittimiha atthu akina vaava nyuwo mmuroromenlaanyu oovuwihiwa Pwiya ahu Yesu Kristu?
2 Wakhala weera mmuthukumanoni mwanyu oovolowa* mutthu aawanreene aneeli awe mukathani ni ikuwo sawe sooreera, avinyaka anavolowa mutthu oohaawa ni ikuwo sawe soohisuwanyeya,
3 neereke munkela omwaakhela mwa nttittimiho ole owanre ikuwo sooreera mmweerelaka: “Mukilaathiki nipuro nna va noottittimiheya”, mene munamweerela ole oohaawa ha: “Mweere weemela”, naari munneera: “Mwakilaathi vathi vale weera kihaamelihe manaani aka ni erutthu anyu”?
4 Wakhala weera munnapaka eyo, khaiyene ekhaikhai weera variyari vanyu nookhala nthalu woohima sa moota munaakosoopaanyu atthu oohaawa ni atthu a muhakhu? Ni weera nyuwo aphuki mumpaka soothanla woohima sa nyaha soonanara?
5 Mwiiwe asinnaka oosiveleya. Khaiyene ekhaikhai weera Muluku aathanliye atthu yaawo eri oohaawa* vamaithoni vaatthu* weera ekhale a muhakhu munroromeloni ehiyeriwe Omwene yoowo owo aalaihenraawe waavaha ale emmusivela?
6 Mene nyuwo, khamunaattittimiha atthu oohaawa. Vano, khaiyene atthu a muhakhu enoohasulani ni enooroihani otripunaale?*
7 Khaiyene ti yaawo enveeha nsina noottittimiheya nyuwo muniitthaneliwaanyu?
8 Soolepa sinhima weera: “Mmusivele mukhwiinyu ntoko muniisivelaanyuno”, nto nyuwo mwiiwelelaka nlamulo nna nootthuneya, munnapaka nnene.
9 Mene wakhala weera nyuwo munoovirelela woonihera nthalu, nyuwo mumpaka yoottheka, nave nlamulo ninnoothorihani nyuwo ntoko anamattheka.
10 Wakhala weera mutthu onniiwelela Malamulo ootheene, mene anatthekela nlamulo nimoha a malamulo awo, owo ontthekela Malamulo ootheene.
11 Mwaha wooweera ole onhima weera: “Muhiraruwe.” Mutthu mmoha-moharu-tho yoowo onhima weera: “Muhiive.” Menento wakhala weera nyuwo khamunraruwa mene muniiva, munnatthekela Nlamulo.
12 Nvirelele wuuluma ni opaka itthu moovarihana ni nlamulo nneettiha muloko wootaphuwa.* Mwaha wooweera munkela othorihiwa moovarihana ni nlamulo nno.
13 Ole ohimmoriwa ikharari, onkela othorihiwa moohimoreliwa ikharari, mutthu ole ommoriwa ikharari onookhumela nnene emaara onthorihiwaawe.*
14 Asinnaka, neereke onnawereya mutthu ohima weera kookhalano nroromelo, mene ahinoonihera nroromelo nno ni miteko? Neereke nroromelo nno nnonvuluxa?
15 Wakhala weera munna naari murokora khaanoono soowara,* naari yootxa enkwanela otxa nihiku nno,
16 ni wakhala weera mmoha a nyuwo onnamweerela: “Murooke ni murettele; mooreke ni mwatxeeke”, mene nyuwo muhinanvaha ele onhaawelaawe weera akhaleno ekumi,* vaavonto neereke yookhala nvanraanyu?
17 Hiiho-tho nroromelo nihinooniheriwa ni miteko, khaninvareleya muteko.*
18 Menento mutthu onneera: “Nyuwo mookhalano nroromelo, ni miyo kookhalano nroromelo nnoonihereya ni miteko saya. Vano, mukoonihere nroromelo nanyu noohikhala ni miteko ni miyo kinoowooniherani nroromelo naka moorweela mwa miteko.”
19 Munnaroromela weera ori Muluku mmoha paahi? Nyuwo munnapaka nnene ororomela eyo. Menento naari mademooniyu yaawo, ennaroromela eyo, nave-tho ennamoova.
20 Vano, nyuwo muhikhanleno miruku khamusuwenle weera nroromelo nihinooniheriwa ni miteko saya khaninvareleya muteko?
21 Khaiyene Abrahamu tiithi ahu yoowo aahimmwale okhala naxariya mwaha wa nroromelo noowooniheriwa ni miteko, vaavo anvanhaawe Isaki mwanawe valtaareni?
22 Moone weera owo oonihenre nroromelo vamoha ni miteko saya, ni moorweela mwa miteko nroromelo nawe noomalelihiwa,
23 hiiho, saakwanela Soolepa sineera: “Abrahamu aamuroromela Yehova,* ni mwaha wa yeeyo aahooniwa okhala naxariya.” Ni aahiitthaniwa* nthamwene a Yehova.*
24 Moone weera mutthu onkela ohimmwa okhala naxariya mwaha wa miteko, ohiya paahi mwaha wa nroromelo.
25 Emoha-moharu-tho, yaaheereya ni Rahabi namararuwa aahimmwa okhala naxariya mwaha wa miteko, awaakhelakaru nnene anamahottela ni vaavo aathupenraawe ovira mphiro mukina.
26 Mweekhaikhai, hiiho ntoko erutthu ehikhanleno ekumi* eraaya yookhwa, enneereya etthu emoha-moharu ni nroromelo nahu, naahipakaka itthu* sooreera, nroromelo nahu nohookhwa.
Footnotes
^ Naari: “ohoowa.”
^ Naari: “oohisuwanyeya.”
^ Naari: “va elapo.”
^ Naari: “mapuro sinuulummwa milattu.”
^ Ni Ekereku: “nlamulo nootaphuwa.”
^ Ni Ekereku: “ommoriwa ikharari onoowina othorihiwa.”
^ Ni Ekereku: “Wakhala weera munna naari murokora khawanre etthu.”
^ Eyo tiiyo, soowara ni yootxa.
^ Naari: “nohookhwa.”
^ Naari: “aakhala.”
^ Ni Ekereku: “munepa.”
^ Naari: “miteko.”
