Mbekanyamushumo Dzi Funzaho

Ṱhanzi dza Yehova shangoni ḽoṱhe vha ḓivhelwa mushumo wavho wa u funza Bivhili.

NGA ṅwambo wa uri vha dzhiela nṱha mushumo wavho wa u funza Bivhili, vhaṅwe vha nga humbula uri a vha na dzangalelo kha pfunzo ya shango. Fhedzi a zwo ngo ralo. U itela u funza vhaṅwe, mudededzi u fanela u thoma a guda, nahone zwenezwi zwi ṱoḓa u gudiswa na u funziwa ho fanelaho. Ngauralo u engedza kha u shumisa zwavhuḓi u dzhena tshikolo, Ṱhanzi dza Yehova vho vhuyelwa miṅwaha minzhi  nga mbekanyamushumo dzo fhamba-fhambanaho dzi funzaho na zwikolo zwi langiwaho nga Watch Tower Society. Zwenezwi zwo thusa Dziṱhanzi na vhaṅwe vhathu uri vha ḓikhwinise ngeleloni, kha vhuḓilisi, na muyani.

Sa tsumbo, mashangoni manzhi Ṱhanzi dzo sedzana na khaedu yo khetheaho—nḓila ine vha nga gudisa ngayo vhathu vhe vha si ye kule na tshikolo kana vhe vha si vhuye vha wana tshibuli tsha u ya tshikoloni nahone nga zwenezwo vha sa koni u ṅwala kana u vhala. U itela u swikelela yeneyi ṱhoḓea, Watch Tower Society yo dzudzanya mbekanyamushumo dza u gudisa vhathu u vhala na u ṅwala.

Sa tsumbo, kha ḽa Nigeria, kilasi dza u guda u vhala na u ṅwala dzo vha dzi tshi khou shumiswa nga Ṱhanzi dza Yehova u bva nga 1949. Nga 1961, vhathu vhanzhi vha Nigeria vho guda u vhala nga yeneyo nḓila, nahone rekhodo dzi re hone dzi sumbedza uri vhukati ha 1962 na 1994, vhaṅwe vhaaluwa vha 25 599 vho gudiswa u ṅwala na u vhala kha dzenedzi kilasi. U ṱoḓisisa ha zwenezwino ho sumbedza uri phesenthe dzine dza fhira 90 dza Ṱhanzi dza Yehova dza kha ḽa Nigeria vho vha vha tshi kona u ṅwala na u vhala, hu tshi vhambedzwa na phesenthe dzine dza vha fhasi ha 50 kha vhathu vhoṱhe. Kha ḽa Mexico, Watch Tower Society yo shumisa kilasi dza u guda u vhala na u ṅwala u bva nga 1946. Nga 1994, vhathu vhane vha fhira 6 500 vho gudiswa u vhala na u ṅwala. Vhukatini ha 1946 na 1994, vhathu vhane vha fhira 127 000 vho thuswa uri vha kone u vhala na u ṅwala. Kilasi dza u gudisa u vhala na u ṅwala dzo dzudzanyiwa na kha maṅwe mashango manzhi, a ngaho Bolivia, Cameroon, Honduras, na Zambia.

Dzenedzo mbekanyamushumo dza u gudisa u vhala na u ṅwala kanzhi dzo ṱhogomelwa nga vhahulwane vha zwa pfunzo mashangoni ane dza khou itwa hone. Sa tsumbo, kha ḽa Mexico muṅwe mushumela-muvhuso o ṅwala uri: “Ndi livhuha tshumisano ya vhoiwe, nahone ndi tshi ambela muvhuso ndi fhirisela kha vhoiwe ndivhuwo dza vhukuma kha mushumo wa vhoiwe u bvelaho phanḓa u itela u vhuyedza vhathu kha u ḓisa nḓivho kha vha sa koni u ṅwala na u vhala. . . . Ndi ni tamela mvelaphanḓa kha mushumo wa vhoiwe wa u funza.”

Tshikolo tsha Vhuḓinḓa ha Lwa Ṱaḓulu

Ngauri vha dzhiela nṱha mushumo wavho wa u funza Bivhili, Ṱhanzi dza Yehova vha ḓidinela u khwinisa vhukoni havho ha u ṱalutshedza vhaṅwe pfunzo dza Bivhili. U itela u ṋea thuso yo raliho, kha tshiṅwe na tshiṅwe tsha zwivhidzo zwi fhiraho 75 000 shangoni ḽoṱhe, hu farwa muṱangano une wa vhidzwa Tshikolo tsha Vhuḓinḓa ha lwa Ṱaḓulu vhege iṅwe na iṅwe. Vhoṱhe vho ṅwalisaho, vhe Dziṱhanzi kana vhe si Dziṱhanzi, vha a sielisana u ṋekedza vhathetshelesi nyambo pfufhi ya tshiṱoho tsho khethiwaho hu tshee nga phanḓa. Hu sa londwi miṅwaha yavho, vhagudiswa vha wana nyeletshedzo kha mugudisi u itela u vha gudisa vhutsila ha u vhala na u amba khagala.  Na vhana vhaṱuku, musi vha tshi tou kona u vhala, vha nga ṅwalisa nahone vha gudiswa, zwine zwa vhonala zwi tshi vha thusa na kha maṅwe masia, u katela na tshikoloni. Vhadededzi vhanzhi vho amba uri vhagudiswa vha Dziṱhanzi vha amba zwavhuḓi.

Zwiṅwe hafhu, tshivhidzo tshiṅwe na tshiṅwe tsha Ṱhanzi dza Yehova tshi ṱuṱuwedziwa uri Holoni yatsho ya Muvhuso, kana hune tsha ṱanganela hone, tshi vhe na laiburari i re na thuso dza u guda Bivhili, dziṱhalusamaipfi, na dziṅwe bugu dza ndaedzi. Heyi laiburari ndi ya vhoṱhe vhane vha ṱanganela Holoni ya Muvhuso. U vhala hu a ṱuṱuwedzwa vhukuma zwivhidzoni zwavho, nahone muṱa muṅwe na muṅwe  na wone u a ṱuṱuwedzelwa u vha na laiburari ya muṱa i re na khandiso nnzhi u itela zwishaiwa zwa vhana na vhaaluwa.

Zwiṅwe Zwikolo

Watch Tower Society i dovha hafhu ya vha na zwikolo zwa u gudisa vharumiwa vha tshinnani na vha tshisadzini, khathihi na zwikolo zwa u gudisa vhanna vha re na vhuḓifhinduleli ha vhushumeli zwivhidzoni zwa havho. Zwenezwi zwikolo ndi vhuṅwe vhuṱanzi ha uri Ṱhanzi dza Yehova vha dzhiela nṱha pfunzo.

[Maipfi o ṱumbulwaho kha siaṱari 13]

U vhala hu a ṱuṱuwedzwa vhukuma zwivhidzoni zwavho nahone muṱa muṅwe na muṅwe na wone u ṱuṱuwedzelwa u vha na laiburari i re na khandiso nnzhi

[Tshifanyiso kha siaṱari 12]

Vhagudiswa Tshikoloni tsha Vhuḓinḓa ha lwa Ṱaḓulu vha gudiswa u vhala na u amba khagala