Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA (HAAPIIRAA) ATETE 2015

A haapao maitai i ta outou amuimuiraa i teie anotau hopea

A haapao maitai i ta outou amuimuiraa i teie anotau hopea

‘E ino te peu maitatai i te amuimuiraa ino.’—KOR. 1, 15:33.

HIMENE: 73, 119

1. Te ora nei tatou i teihea anotau?

TE ORA nei tatou i te roaraa o “te ati rahi.” Mai 1914 mai â, a haamata ’i te “anotau hopea,” ua ino roa ’tu â te mau huru tupuraa. (Tim. 2, 3:1-5) E nehenehe tatou e haapapu e e ino roa ’tu â te mau huru tupuraa a teie nei ao, no te mea te na ô ra te hoê parau tohu Bibilia: ‘E te mau taata iino e te feia haavare ra, e tupu â to ratou ino e e rahi atu â.’—Tim. 2, 3:13.

2. Eaha ta te taata e rave rahi e rave no te faaanaanatae ia ratou? (A hi‘o i te hoho‘a matamua.)

2 No te faaanaanatae ia ratou, e rave rahi taata i teie mahana o te mataitai ra aore ra o te rave ra i te ohipa iino mau, aore ra i te mau peu morare ore, e tei ô atoa i roto te mau peu tahutahu e te mau peu demoni. Ei hi‘oraa, e farii-noa-hia te ohipa iino mau e te mau peu morare ore i nia i te Internet, oia atoa i roto i te mau porotarama afata teata, te mau hoho‘a teata, te mau buka e te mau papai. E ua  farii-roa-hia teie haerea o te faahuru ê ia vetahi ê, e oia atoa i te tahi mau vahi, ua farii ïa te ture. E ere râ i te auraa e e farii Iehova i tera huru haerea.—A taio i te Roma 1:28-32.

3. Eaha te huru o te taata e rave rahi a ite ai i te feia o te ora ra ia au i te mau ture aveia a te Atua?

3 I te senekele matamua, i pinepine na te taata i te mataitai atoa i te ohipa iino mau e te mau peu morare ore no te faaanaanatae ia ratou. Aita râ te mau pǐpǐ a Iesu i na reira, no te mea ua ora ratou ia au i te mau ture aveia a te Atua. Ua huru ê ïa te taata i ati a‘e ia ratou. Eaha ïa te faahopearaa? Ua faaooohia e ua hamani-ino-hia te mau Kerisetiano. (Pet. 1, 4:4) I teie mahana, e huru ê atoa te taata a ite ai i te feia o te ora ra ia au i te mau ture aveia a te Atua. No reira te Bibilia e faaara ’i ia tatou e “e hamani-ino-atoa-hia” te feia o te pee ra i te hi‘oraa o te Mesia ra o Iesu.—Tim. 2, 3:12.

‘E INO TE PEU MAITATAI I TE AMUIMUIRAA INO’

4. No te aha e ore ai tatou e nounou i teie nei ao?

4 Mai te peu e te hinaaro ra tatou e rave i te hinaaro o te Atua, eiaha ïa tatou e nounou ‘i teie nei ao, e te mau mea atoa a teie nei ao.’ (A taio i te Ioane 1, 2:15, 16.) O Satani, “te atua o teie nei ao,” te faatere i te ao. Te faaohipa ra oia i te mau haapaoraa, te mau hau faatere, te mau faanahonahoraa tapihooraa e te mau ravea haapuroro no te haavarevare i te taata. (Kor. 2, 4:4; Ioa. 1, 5:19) Eita tatou e hinaaro ia faaterehia tatou e teie nei ao, no reira ïa tatou e ape ai i te amuimuiraa ino. Te faaara maitai ra te Bibilia ia tatou: ‘Eiaha e vare, e ino te peu maitatai i te amuimuiraa ino.’—Kor. 1, 15:33.

5, 6. E titauhia ia tatou ia ore e amuimui e o vai ma, e no te aha?

5 No te tapea maite i ta tatou taairaa e o Iehova, eita ïa tatou e amuimui i te feia o te rave ra i te mau ohipa iino. E ô atoa i roto i teie amuimuiraa te taata o te haamori ra ia Iehova e inaha, o te maiti ra i te auraro ore ia ’na. Ia hara ratou e ia ore ratou e tatarahapa, e faaea ïa tatou i te amuimui ia ratou ra.—Roma 16:17, 18.

6 E hinaaro iho â te taata e auhia e ta ratou mau hoa e ia fariihia e ratou. No reira, ia amuimui tatou e te feia e auraro ore i te Atua, e nehenehe tatou e hema a pee ai ia ratou. Ei hi‘oraa, ia amuimui noa tatou e te feia e rave ra i te mau peu taatiraa tia ore, e nehenehe tatou e riro mai ia ratou ra. Tera ïa ta te tahi mau taeae e tuahine i ite. Ua tiavaruhia te feia tei ore e tatarahapa. (Kor. 1, 5:11-13) Noa ’tu e ua tatarahapa ratou, e nehenehe ratou e ite i te hoê â tupuraa mai ta Petero i faahiti.—A taio i te Petero 2, 2:20-22.

7. E titauhia ia tatou ia faahoa e o vai ma?

7 Noa ’tu e te hinaaro ra tatou e faaite i te  maitai i te taata atoa, eiaha tatou e faahoa e te feia e auraro ore i te Atua. Eita ïa e tano ia haamatau te hoê Ite no Iehova i te hoê taata o te ore e tavini ra ia Iehova ma te taiva ore. E mea faufaa a‘e ia fana‘o tatou i te farii maitai a te Atua i ta te feia o te ore e here ra ia ’na. E faahoa noa ïa tatou e te feia e rave ra i te hinaaro o te Atua. Ua na ô Iesu: “O tei haapao atoa i te hinaaro o te Atua ra, o to ’u ïa taeae, o to ’u ïa tuahine, o to ’u hoi ïa metua vahine.”—Mar. 3:35.

E mea faufaa a‘e ia farii-maitai-hia tatou e Iehova, eiaha râ ia fariihia e te feia o te ore e here ra ia ’na

8. Mea nafea te amuimuiraa ino i haafifi ai i te mau Iseraela?

8 E faahopearaa ino mau te amuimuiraa ino. A hi‘o na i tei tupu no te mau Iseraela. Hou a tae ai ratou i te Fenua tǎpǔhia, ua faaara mai Iehova ia ratou no nia i te feia o tei ora a‘ena i ǒ. Ua parau oia: “Eiaha oe e pi‘o i raro i te mau atua no ratou ra, eiaha e haamori atu ia ratou, eiaha hoi oe e rave mai ta ratou e rave ra, e haamou roa râ oe ia ratou, e haaparari roa i ta ratou mau tii. O to outou Atua ra o Iehova ta outou e haamori.” (Exo. 23:24, 25) Aita râ te rahiraa o te mau Iseraela i faaroo i te mau faaueraa a te Atua. Ua taiva ïa ratou ia ’na. (Sal. 106:35-39) Eaha ïa te faahopearaa? I muri a‘e, ua faarue Iehova i te nunaa o Iseraela e ua maiti râ oia i te amuiraa Kerisetiano ia riro mai ei nunaa no ’na.—Mat. 23:38; Ohi. 2:1-4.

A HAAPAO MAITAI I TA OUTOU E TAIO E E MATAITAI

9. No te aha e mea tia ia haapao maitai tatou i te mau ravea haapuroro o teie nei ao?

9 Mea rahi te ravea haapuroro o teie nei ao, mai te mau porotarama i te afata teata, te mau reni Internet e te mau buka, o te nehenehe e haafifi i to tatou taairaa e o Iehova. Aita roa ’tu teie mau huru ravea i faanahohia no te tauturu i te mau Kerisetiano ia tiaturi ia Iehova e i ta ’na mau parau fafau. E titauhia râ te reira ia tiaturi te taata i te ao ino a Satani. E mea tia ïa ia haapao maitai tatou i ta tatou e mataitai, e taio aore ra e faaroo, ia ore te reira e faatupu i ‘te hinaaro o teie nei ao’ i roto i to tatou aau.—Tito 2:12.

10. Eaha te faahopearaa no te mau ravea haapuroro o teie nei ao?

10 Fatata te ao a Satani e ta ’na mau ravea haapuroro iino i te haamouhia. Te parau mai ra te Bibilia: “E te mou nei hoi teie nei ao, e ta to te ao atoa e hinaaro nei; o tei haapao râ i to te Atua ra hinaaro, e tia ïa i te oraraa e a muri noa ’tu.” (Ioa. 1, 2:17) Oia atoa, ua himene te fatu salamo: “Area te feia mǎrû ra, e parahi ïa i te fenua, e oaoa ratou i te rahi o te hau ra.” Eaha ïa te maororaa? “E parahi te feia parau-tia i nia i te fenua, e parahi tamau â ratou i reira.”—Sal. 37:9, 11, 29

11. E nafea Iehova e tauturu ai ia tatou ia vai taiva ore noa ia ’na?

11 Te mea taa ê râ i te ao a Satani, te tauturu mai ra te faanahonahoraa a Iehova ia ora tatou i te hoê haerea o te aratai ra ia tatou i te ora mure ore. Ua pure Iesu ia Iehova: “Teie hoi te ora mure ore, ia ite ratou ia oe i te Atua mau ra, e ia Iesu i te Mesia i ta oe i tono mai.” (Ioa. 17:3) Te faaohipa ra Iehova i ta ’na faanahonahoraa no te horoa mai i te mau ravea atoa ia tatou ia ite ia ’na. Ei hi‘oraa, te vai  ra e rave rahi vea, buka rairai, buka, video e te vai atoa ra te api Internet o te tauturu ra ia tatou ia tamau i ta tatou taviniraa i te Atua. Ua faanaho atoa te faanahonahoraa a te Atua i te mau putuputuraa i te mau hebedoma atoa na roto hau atu 110 000 amuiraa na te ao atoa nei. E puaihia to tatou faaroo ia Iehova e i ta ’na mau parau fafau maoti te mau haapiiraa atoa no roto mai i te Bibilia ta tatou e hi‘opoa i ta tatou mau putuputuraa e te mau tairururaa rahi.—Heb. 10:24, 25.

A FAAIPOIPO ATU ‘IA AU NOA I TE FATU’

12. A faataa na i te faaueraa Bibilia ia faaipoipo ‘ia au noa i te Fatu.’

12 No te mau Kerisetiano o te hinaaro ra e faaipoipo, e titauhia ia haapao maitai ratou i te maitiraa i te taata e apiti ai ratou. Te faaara ra te Parau a te Atua ia tatou: “Eiaha outou ia amui-au-ore-hia i te feia faaroo ore ra: eaha to te parau-tia auraa i te parau-tia ore? e eaha to te maramarama auraa i te pouri?” (Kor. 2, 6:14) Ia au i te a‘oraa Bibilia, e mea tia i te mau tavini a te Atua ia faaipoipo ‘ia au noa i te Fatu,’ oia hoi, ia faaipoipo noa ratou e te hoê taata o tei pǔpǔ, o tei bapetizo e o te ora ra ia au i te mau ture aveia a Iehova. (Kor. 1, 7:39) Ia faaipoipo outou e te hoê taata mai teie, oia hoi te hoê taata o te here ra ia Iehova, e tauturu ïa to outou apiti ia vai taiva ore outou i te Atua.

Ia faaipoipo outou e te hoê taata e here ra ia Iehova, e tauturu mai ïa to outou apiti ia vai taiva ore i te Atua

13. Eaha te faaueraa ta te Atua i horoa mai i te mau Iseraela no nia i te faaipoiporaa?

13 Ua ite Iehova i te mea maitai roa ’‘e no tatou, e aita ta ’na a‘oraa ia faaipoipo ‘ia au noa i te Fatu’ i te mea apî. Ei hi‘oraa, a tapao na i ta Iehova i parau atu i te mau Iseraela no nia i te taata o tei ore e tavini ia ’na. Ua faaohipa Iehova ia Mose no te horoa mai i teie faaueraa: “Eiaha oe e faaipoipo ia ratou; eiaha oe e horoa i to tamahine i ta ’na ra tamaiti, eiaha hoi oe e rave i ta ’na ra tamahine na ta oe ra tamaiti. E riro hoi ratou i te faafariu ê i to mau tamarii ia ore ia pee mai ia ’u, ia haamori i te mau atua ěê ra, tupu ihora te riri o Iehova ia outou, pohe ihora oe i reira ra.”—Deut. 7:3, 4.

14, 15. Eaha te faahopearaa ta Solomona i ite a faaroo ore ai oia i te faaueraa a Iehova?

14 I muri iti noa ’‘e i to Solomona riroraa ei arii no Iseraela, ua pure oia ia Iehova no te ani i te paari e ua pahonohia ta ’na pure. No reira Solomona i riro ai ei faatere paari o te hoê nunaa o tei manuïa rahi. Ua maere roa te arii vahine o Seba i te paari o Solomona i parau ai ia ’na: “Ua hau ê atura to oe paari e to oe mana i tei faaitehia mai ia ’u nei.” (Arii 1, 10:7) Tera râ, te haapii atoa ra te hi‘oraa o Solomona i te faahopearaa ta te hoê taata e ite ia faaroo ore oia i te mau faaueraa a te Atua ia faaipoipo atu e te hoê taata o te ore e tavini ra ia Iehova.—Koh. 4:13.

 15 Noa ’tu e ua haamaitai Iehova ia ’na, ua faaroo ore Solomona i te faaueraa papu ta te Atua i faaite atu. ‘Ua here te arii ra o Solomona i te vahine ěê e rave rahi,’ aita râ hoi ratou i tavini ia Iehova. E 700 vahine faaipoipo e e 300 vahine tavini ěê ta ’na. Eaha ïa te faahopearaa? A paari ai Solomona, ua “faafariu-ê-hia ihora tana aau . . . a pee atu ai i te mau atua ěê; aita a‘era tana aau i au i to ’na Atua ia Iehova.” (Arii 1, 11:1-6) Ua turai mai te amuimuiraa ino ia ore faahou oia e tavini ia Iehova ma te taiva ore. Tera ta Solomona i ite e e nehenehe te taata atoa e ite i te hoê â tupuraa. No reira, eiaha roa tatou e mana‘o ia faaipoipo atu i te hoê taata o te ore e here ia Iehova.

16. Eaha te a‘oraa ta te Bibilia e horoa mai i te hoê tavini a Iehova e ua faaipoipo e te hoê taata e tiaturi ore i te Atua?

16 E nafea ïa ia riro ai te hoê taata ei tavini ia Iehova e ua faaipoipo oia e te hoê taata e tiaturi ore i te Atua? Te parau ra te Bibilia: “O outou atoa hoi, e te mau vahine, e auraro maite i ta outou mau tane ra; e aore te tahi pae i faaroo i te parau ra, ia noaa mai ratou i te haapao maitai o ta ratou mau vahine, eiaha ’tu â te parau.” (Pet. 1, 3:1) Hoê â no te hoê tane e aita ta ’na vahine e haamori ra ia Iehova. Ia au i te Parau a te Atua, teie te mea papu: ia riro outou ei tane maitai aore ra ei vahine maitai, e ia faaohipa i te mau ture aveia a te Atua i roto i to outou faaipoiporaa. Ia  ite to outou apiti e e ua taui outou no te maitai, peneia‘e e hinaaro atoa oia e haamori ia Iehova. E rave rahi hoa faaipoipo o tei ite i teie tupuraa.

A AMUIMUI E TE FEIA E HERE RA IA IEHOVA

17, 18. Eaha tei tauturu ia Noa ia ora i te diluvi, e eaha tei tauturu i te mau Kerisetiano o te senekele matamua ia ora i te haamouraa a Ierusalema?

17 E nehenehe te amuimuiraa ino e turai ia tatou ia faaroo ore ia Iehova. Area te amuimuiraa maitai, e nehenehe te reira e tauturu ia outou ia vai taiva ore. E hi‘oraa maitai Noa no tatou. Ua ora oia i te hoê anotau ‘e ino rahi to te taata o te fenua nei’ e “ua ino ana‘e te mau opuaraa atoa o te aau i te mau mahana atoa ra.” (Gen. 6:5) No te ino rahi o te taata i faaoti ai Iehova i te haamou i te ao ino. Ua taa ê râ o Noa. Te pii mai ra te Bibilia ia ’na ‘taata parau-tia’ no te mea ua au to ’na haerea e te Atua mau.—Gen. 6:7-9.

18 Eita Noa i amuimui e te feia i ore e here ia Iehova. Ua haa rahi noa oia e to ’na utuafare no te patu i te araka e ua matau-atoa-hia Noa ei ‘taata poro i te parau-tia’. (Pet. 2, 2:5) E amuimuiraa maitai to Noa, ta ’na vahine, ta raua na tamaiti e toru e ta ratou vahine a amuimui ai te tahi i te tahi. I rave noa na ratou i te mau ohipa ta te Atua i au. No reira i faaorahia ’i ratou i te diluvi. E huaai tatou pauroa na ratou. E haamauruuru ïa tatou a ite ai e ua vai taiva ore Noa e to ’na utuafare ia Iehova no te mea ua ape ratou i te amuimuiraa ino. Mai te mau Kerisetiano o te senekele matamua, aita ratou i amuimui e te feia i ore e here ia Iehova. Ua faaroo ratou ia Iehova e ua ora ïa i te haamouraa o Ierusalema i te matahiti 70.—Luka 21:20-22.

E tauturu mai te amuimuiraa e te feia e here ra ia Iehova ia feruri i te oraraa i roto i te ao apî (A hi‘o i te paratarafa 19)

19. O vai te tauturu mai ia tatou ia vai taiva ore ia Iehova?

19 Mai ia Noa e to ’na utuafare, e te mau Kerisetiano o te senekele matamua, eiaha ïa tatou e amuimui i te feia e ore e here ra ia Iehova. E mirioni taeae e tuahine taiva ore o ta tatou e nehenehe e maiti ia riro mai ei hoa no tatou. E tauturu mai ratou “ia mau papu i te faaroo” i te roaraa o teie anotau fifi mau. (Kor. 1, 16:13; Mas. 13:20) A feruri na, auê ïa oaoa ia ora mai i te hopea o teie nei ao iino e ia ora i roto i te ao apî a Iehova! No reira mea faufaa roa ia ape tatou i te amuimuiraa ino i teie nei â!