Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa—Haapiiraa  |  Atete 2015

 AAMU

‘E te motu e rave rahi ra ia oaoa ïa’

‘E te motu e rave rahi ra ia oaoa ïa’

Te haamana‘o noa ra vau i tera mahana i Brooklyn. I te 22 no Me 2000, te tiai nei au i te Tino aratai i roto i te hoê piha ohipa e te tahi atu mau taeae no te mau fenua atoa. Te tiai nei matou i te Tomite papairaa no te haere i roto. To matou tere, no te faataa ïa i te tahi ravea no nia i te fifi o ta te feia huri e faaruru ra, ua horuhoru roa matou. No te aha mea faufaa ’i teie putuputuraa? Hou râ vau a faataa ’tu ai, e faatia ’tu vau i te tahi mau tuhaa o to ’u oraraa.

Ua bapetizohia vau i Queensland, ua riro vau ei pionie i Tasmanie e ei mitionare i Tuvalu, i Hamoa e i Fiti

UA FANAUHIA vau i Queensland, i Auteralia, i te matahiti 1955. Tau taime i muri a‘e, ua haamata to ’u mama, o Estelle to ’na i‘oa, i te haapii i te Bibilia e te mau Ite no Iehova. Ua bapetizohia oia hoê matahiti i muri a‘e, e to ’u papa, o Ron te i‘oa, ua riro oia ei Ite no Iehova 13 matahiti i muri iho. Ua bapetizohia vau i 1968 i roto i te hoê oire atea, te mataeinaa no Queensland ïa.

Mai to ’u tamariiriiraa mai â, mea au roa na ’u e taio i te mau buka e e haapii i te mau reo. I te mau taime atoa e haere ai to ’u na metua e o vau na nia i te pereoo, e parahi na vau i muri i te pereoo a taio noa ’i i te hoê buka. Mea papu, ua riri to ’u na metua, no te mea aita vau e hi‘o i te natura. Mea au roa râ na ’u e taio, e ua tauturu te reira ia ’u i te fare haapiiraa. E ua re au e rave rahi taime i te haapiiraa tuarua i roto i te oire Glenorchy i te motu no Tasmanie.

I te roaraa o tera taime, mea titauhia ia rave au i te hoê faaotiraa faufaa. E farii anei au i te tahi moni tauturu no te haere i te fare haapiiraa tuatoru? Noa ’tu e mea au roa na ’u e taio aore ra e haapii, te haamauruuru nei au i te haapiiraa ta to ’u mama i horoa mai ia ’u ia here ia Iehova hau atu i te taata aore ra i te tahi atu ohipa. (Korinetia 1, 3:18, 19) No reira, ma te parau faatia a to ’u na metua, ua faaoti au e ia  noaa mai ta ’u parau tuite e titauhia ia ’u, e faaea vau i te haere i te fare haapiiraa no te riro mai ei pionie. Ua na reira vau i Tenuare 1971, 15 ïa matahiti to ’u i tera taime.

I na vau matahiti i muri a‘e, ua riro mai au ei pionie i Tasmanie. I te roaraa o tera taime, ua faaipoipo vau i te hoê tamahine haviti mau i Tasmanie, o Jenny Alcock to ’na i‘oa. Maha matahiti i muri a‘e, ua tavini amui mâua ei pionie taa ê i roto i te mau oire atea no Smithton e no Queenstown.

TE MAU MITIONARE I TE MAU MOTU NO PATITIFA

I 1978, ua haere mâua ta ’u vahine i Port Moresby, i Papua, no te hoê tairururaa nunaa rau. Te haamana‘o ra vau i te hoê mitionare o tei horoa i te hoê oreroraa parau na roto i te reo Hiri motu. Noa ’tu e aita vau e taa ra eaha ta ’na e parau ra, ua haamata vau i te feruri i to ’u hinaaro e riro mai ei mitionare, ma te haapii i te tahi atu reo e ia nehenehe e faaitoito i te mau taeae ma te horoa ’tu i te hoê oreroraa parau na roto i to ratou reo. I muri a‘e, no to ’u anaanatae e haapii i te mau reo, ua taa ia ’u e mea nafea vau e faaohipa ’i i te reira no te tavini ia Iehova.

A ho‘i ai mâua i te fare, aita e nehenehe e parau te oaoa i te aniraahia mai ia mâua ia tavini ei mitionare. Ua haere mâua i te motu no Funafuti, i Tuvalu, i Tenuare 1979. I reira, e toru noa feia bapetizo i Tuvalu.

Mâua Jenny i Tuvalu

E ere i te mea ohie ia haapii i te reo Tuvalu. Te buka noa e vai ra na roto i tera reo, o te “faufaa apî” ïa. Aita e titionare aore ra aita e ravea no te haapii i te reo. Ua faaoti ïa mâua e tamata i te haapii 10 tae atu 20 ta‘o apî i te mau mahana atoa. Ua taa oioi ia mâua e aita mâua e taa maitai ra i te auraa o te rahiraa ta‘o o ta mâua e haapii ra. Aita vau i parau i te taata e mea hape te haapiiraa no nia i te mau demoni, ua parau râ vau ia ratou eiaha e faaohipa i te metera e te turu tootoo! Ua tamau râ mâua i te haapii i tera reo no te mea ua haamata mâua e rave rahi haapiiraa Bibilia. E rave rahi matahiti i muri a‘e, ua parau hoê o na taata matamua i haapiihia i te Bibilia: “Ua oaoa roa matou e ua haapii oe i teie nei i to matou reo. I te omuaraa, aita matou i taa noa ’‘e te auraa o ta oe e hinaaro ra e parau!”

Tera râ, te vai ra te hoê ohipa o tei tauturu rahi ia mâua ia haapii oioi i tera reo. I te mea hoi e aita hoê a‘e fare tarahu, ua noho ïa mâua i roto i te hoê utuafare Ite no Iehova i roto i te oire pu. I tutava na mâua i te paraparau i te reo Tuvalu i te mau vahi e haere ai mâua, oia atoa i te fare. Ma te ore e paraparau faahou i te reo Beretane tau matahiti i muri a‘e, ua taa ia mâua e ua riro te reo Tuvalu ei reo tumu no mâua.

Tau taime a tae atu ai mâua, e rave rahi o tei faaite i te anaanatae i te parau mau. Tera râ, eaha ïa ta mâua e faaohipa no te haapii atu ia ratou? Ia haamata  ratou i te haere mai i te mau putuputuraa, eaha te mau himene ta ratou e himene, e e nafea ratou e horoa ’i i te mau oreroraa parau e e nafea e faaineine ai i te mau putuputuraa? No te feia haehaa mai ia ratou, mea titauhia te mau papai na roto i to ratou reo no te haapii atu ia ratou no nia ia Iehova. (Korinetia 1, 14:9) Ua uiui matou, ‘E fana‘o anei matou i te mau papai na roto i te reo Tuvalu o tei paraparau-noa-hia e 15 000 taata?’ Ua pahono Iehova i teie mau uiraa e ua haapapu mai oia maoti e piti tuhaa: (1) Te hinaaro nei oia ia haapii te mau taata “i roto i te mau motu, te i te atea è” no nia ia ’na e (2) te hinaaro nei oia ia ite te feia na te ao atoa mai ‘te feia haehaa e te feia riirii’ i te haapuraa i roto i to ’na i‘oa.—Ieremia 31:10, Te Bibilia Mo’a V.C.J.S. (1976); Zephania 3:12.

TE OHIPA HURIRAA NO TE HAAPII I TE PARAU MAU

I 1980, ua ani mai te amaa ia huri i te mau papai na roto i te reo Tuvalu. Ua haamata matou i te ohipa, noa ’tu e ua ite matou e aita matou i taa roa i tera reo. (Korinetia 1, 1:28, 29) A tahi, ua hoo mai matou i te hoê matini tahito a te hau faatere no te nenei i te mau papai no ta matou mau putuputuraa. I muri a‘e, ua huri matou i te buka Te ite e aratai i te ora mure ore na roto i te reo Tuvalu e ua neneihia te reira i nia i teie matini nainai. Te haamana‘o faahou ra vau e mea puai te hau‘a o te inita, oia atoa te veavea rahi o te haafifi i te nenei-rima-raa i te mau papai atoa. I tera tau, aita ta matou e uira!

E ere i te mea ohie ia huri na roto i te reo Tuvalu, no te mea aita ta matou i nehenehe e imi i te mau ta‘o i roto i te mau titionare aore ra e rave i te mau maimiraa i roto i te mau buka Tuvalu. I te tahi râ mau taime, ua fana‘o matou i te tauturu ma te tahi atu ravea. I te hoê poipoi, ma te hape, ua pii au i te fare o te hoê taata o tei patoi i te parau mau. Ua haamana‘o mai râ teie taata paari, e e orometua atoa oia, e eiaha matou e ho‘i faahou mai i to ’na fare. Ua parau oia: “E hinaaro noa vau e faahiti atu i te hoê mana‘o. I roto i ta outou huriraa, e ere hoê â huru te mau ta‘o e ta te feia no Tuvalu e paraparau ra. Mea varavara te reira i te faaohipahia na roto i te reo Tuvalu.” Ua rave matou i te mau maimiraa e vetahi ê e  ua tano iho â ta ’na parau. Ua rave ïa matou i te mau tauiraa no te haamaitai i ta matou huriraa. Ua maere roa vau e ua horoa mai Iehova i te tauturu maoti te hoê taata o tei patoi i te parau mau, e o tei taio atoa râ i ta tatou mau papai!

Te parau apî o te Basileia no 30 na roto i te reo Tuvalu

Te papai matamua na roto i te reo Tuvalu o ta matou i pûpû i te taata, o te titau-manihini-raa i te Oroa haamana‘oraa ïa. I muri iho, te vai ra te api parau iti Te parau apî o te Basileia no 30, o tei matara mai hoê â taime e te reo Beretane. Auê ïa matou i te oaoa, e nehenehe ta matou e horoa i te tahi papai na te taata na roto i to ratou iho reo! Aita i maoro, ua fana‘o atoa matou i te tahi mau buka rairai e te tahi mau buka na roto i te reo Tuvalu. I 1983, ua haamata te amaa no Auteralia i te nenei i Te Pare Tiairaa na roto i te reo Tuvalu. E 24 noa api o te vea e ua matara mai te reira pauroa toru ava‘e i muri iho. Mea au anei na te feia no Tuvalu i teie mau buka e vea? E, ua na reira ratou, no te mea mea au roa na ratou e taio. E faaara te pu radio a te hau faatere, i te mau taime atoa e matara mai ai te hoê papai apî. E i te tahi mau taime, i paraparau noa na ratou i nia i te reira i te roaraa o tera mahana! *

Mea nafea te ohipa huriraa i te raveraahia? A tahi, ua papai matou i te mau huriraa ma te faaohipa noa i te penitara e te papie. E rave rahi taime to matou na nia iho noaaraa i te huri i nia i te matini patapataraa parau e tae roa i te taime i ineine ai te reira no te hapono i te amaa i Auteralia. I te tahi a‘e pae, na e piti tuahine i te amaa i patapata i te mau papai na roto i te reo Tuvalu i roto i te hoê porotarama roro uira, noa ’tu aita raua i taa i te reo. Ma te patapata faahou i te reira e piti taime e ma te faaau i te mau taa-ê-raa i nia i te roro uira, eita ïa raua e hape. E amui te amaa i te mau papai, oia hoi, e apiti ratou te tumu parau e te mau hoho‘a. I muri iho, e hapono mai ratou i te mau papai na nia i te manureva. E hi‘opoa matou i te reira e e hapono atu ai i te amaa ia neneihia.

Ua maitai roa te ohipa huriraa! I teie nei, e nehenehe te mau pǔpǔ huriraa e patapata e e faaafaro tia ’tu i te reira i nia i te roro uira. Mai tei matauhia, na te tahi taata no te hoê pǔpǔ o tera vahi i haapao i te reira. I muri iho, e hapono te pǔpǔ i teie porotarama i te mau amaa e faaohipa ra i te Internet. Aita e faufaa e horo i te fare rata i te taime hopea no te hapono i te mau papai o tei hurihia i te afata rata.

TE TAHI ATU MAU HOPOIA

A mairi ai te mau matahiti, ua fana‘o mâua Jenny e rave rau hopoia i roto i te mau tuhaa taa ê no Patitifa. Mai Tuvalu atu, ua faauehia mâua ia haere i te amaa no Hamoa i te matahiti 1985. I Tuvalu, ua turu mâua i te ohipa huriraa na roto i te reo Hamoa, Tonga e Tokelau e oia atoa na roto i te reo Tuvalu. * I muri iho, i te matahiti 1996, ua tonohia mâua i te amaa no Fiti, i reira mâua i te tautururaa i te ohipa huriraa o te ravehia ra na roto i te reo Fiti, Kiribati, Nauru, Rotuma e Tuvalu.

Ua faaohipa mâua i te mau papai na roto i te reo Tuvalu no te tauturu ia vetahi ê

Ua faahiahia noa vau i te iteraa e mea au roa na te feia huri i ta ratou ohipa, noa ’tu e e ere i te mea ohie no ratou e peneia‘e mea rohirohi atoa te reira. Mai ia Iehova, te hinaaro mau ra teie mau taeae e tuahine taiva ore ia faaroo te feia i te parau apî oaoa na roto i to ratou reo. (Apokalupo 14:6) Ei hi‘oraa, a  faanahohia ’i te huriraa o te vea Te Pare Tiairaa na roto i te reo Tonga, ua farerei atu vau i te mau matahiapo atoa i Tonga e ua ani atu vau o vai o ratou tei nehenehe e amo i te hopoia ei taata huri. Ua farii mai ïa te hoê o te mau matahiapo, e ohipa maitai hoi ta ’na ei taata tataî pereoo. I te mahana i muri iho, ua faaoti oia ia faarue i ta ’na ohipa e ua haamata oioi oia i te ohipa huriraa. Ua faaitoito to ’na faaroo ia ’u, no te mea e utuafare to ’na e aita roa ’tu o ’na i ite e nafea e aupuru i to ’na utuafare. Ua aupuru râ Iehova ia ’na e to ’na utuafare e ua faaea oia i roto i te ohipa huriraa e rave rahi matahiti.

Mai teie feia huri, te haapeapea mau ra te mau taeae o te Tino aratai no nia i te opereraa i te mau papai na roto i te mau reo atoa, oia atoa i te mau reo o te paraparauhia e te tahi noa mau taata. Ei hi‘oraa, ua tuuhia te hoê uiraa no te ite e mea faufaa anei ia huri i te mau papai na roto i te reo Tuvalu. Ua itoito-rahi-hia vau i te taioraa i teie pahonoraa a te Tino aratai: “Aita e tumu e nehenehe ai outou e faaea i te ohipa huriraa na roto i te reo Tuvalu. Noa ’tu e mea nainai te tuhaa fenua no Tuvalu ia faaauhia i te tahi atu mau reo, mea titauhia ia faaroo te feia atoa i te parau apî oaoa na roto i to ratou iho reo.”

Ua bapetizohia te tahi atu taata i roto i te tairoto

I 2003, mai te Tuhaa huriraa i Fiti, ua tonohia mâua Jenny i te Tuhaa huriraa i Patterson, i New York. E moemoeâ teie o tei tupu! Tei roto mâua i te hoê pǔpǔ no te turu i te ohipa huriraa o ta tatou mau papai na roto e rave rahi reo. I na e piti matahiti aore ra a ohipa ’i mâua i te Tuhaa huriraa, ua tonohia mâua ei tauturu no te faaineine i te mau pǔpǔ huriraa i roto e rave rau fenua.

TE MAU FAAOTIRAA FAUFAA MAU

I teie nei, e ho‘i mai au i nia i te faufaaraa o te putuputuraa ta ’u ïa i faahiti i te omuaraa. No te matahiti 2000, ua mana‘o te Tino aratai ia tauturuhia te mau pǔpǔ huriraa na te ao atoa i roto i ta ratou ohipa. Aita te rahiraa o te feia huri i fana‘o i te tahi faaineineraa no nia i te ohipa huriraa. I muri a‘e i teie putuputuraa e te Tomite o te papairaa, ua faaoti te Tino aratai e ia faaineinehia te feia huri atoa na te ao. E haapiihia ratou ia taa i te mau papai Beretane, e nafea ratou e faaafaro ai i te mau fifi i te pae huriraa e e nafea ratou e ohipa amui ai ei pǔpǔ.

Eaha te haamaitairaa o teie mau faaineineraa atoa no te feia huri? Ua maitai mai te huriraa. Oia atoa, ua hurihia ta tatou mau papai na roto e rave rau reo. I 1979, a tonohia ’i mâua ei mitionare, ua matara mai te vea Te Pare Tiairaa na roto noa e 82 reo. Noa ’tu i roto e rave rahi reo, ua matara mai Te Pare Tiairaa tau ava‘e i muri a‘e i te reo Beretane. I teie nei râ, ua hurihia Te Pare Tiairaa na roto hau atu 240 reo. E i roto i te rahiraa o teie mau reo, e fana‘o atoa ratou i te vea i te hoê â taime e te reo Beretane. I teie mahana, ua hau atu i te 700 reo, e nehenehe te taata e taio i te tahi o te reira o te haapii ra i te parau mau no ǒ mai i te Bibilia ra. A tau matahiti i na mua ’‘e, aita roa ’tu te reira e tupu.

I 2004, ua faaoti te Tino aratai e mea faufaa ia fana‘o oioi te mau reo e rave rahi i te Bibilia Traduction du monde nouveau. Maoti teie faaotiraa, e nehenehe ïa te rahiraa taata e taio i te Traduction du monde nouveau na roto i to ratou reo. No reira, i 2014, ua matara mai teie Bibilia aore ra te tahi tuhaa o te reira  na roto e 128 reo, oia atoa na roto i te tahi mau reo o te paraparauhia ra i Patitifa Apatoa.

A matara mai ai te huriraa Bibilia Les Écritures grecques chrétiennes—Traduction du monde nouveau na roto i te reo Tuvalu

Hoê tuhaa o ta ’u i haamana‘o roa, o te hoê ïa tairururaa i Tuvalu i 2011. E rave rahi ava‘e, ua itehia te paurâ rahi i roto i te taatoaraa o tera fenua. Ua mana‘o te mau taeae eita paha te tairururaa e tupu. Aita râ. I te po a tae atu ai mâua, ua ûa rahi mai ra. E nehenehe ïa te tairururaa e tupu! No ’u, e fana‘oraa taa ê i te matararaa mai te huriraa Bibilia Les Écritures grecques chrétiennes—Traduction du monde nouveau na roto i te reo Tuvalu! Noa ’tu e mea iti te mau taeae o te paraparau ra i tera reo, e nehenehe atoa ratou e fana‘o i teie ô faahiahia mau no ǒ mai ia Iehova ra. I te otiraa te tairururaa, e ûa rahi tei itehia. No reira, ua î te taata atoa i te pape o te parau mau e ua î atoa tera vahi i te pape ûa!

Ua uiuihia to ’u na metua, Ron e Estelle, i te hoê tairururaa i Townsville, i Auteralia, i 2014

Teie râ hoi, aita Jenny ta ’u vahine here i pihaiiho ia ’u. Ua pohe oia i te matahiti 2009, i muri a‘e i te aro-noa-raa i te ma‘i mariri ai taata 10 matahiti i te maoro, 35 matahiti ïa mâua i te faaipoiporaa. Ia faatia-faahou-hia mai oia, e oaoa roa oia i te faaroo e ua matara mai te Bibilia na roto i te reo Tuvalu.

I muri a‘e, ua haamaitai Iehova ia ’u, o Loraini Sikivou ïa, o tei riro mai ei vahine nehenehe mau na ’u. Ua ohipa amui o Jenny e o Loraini i te Betela no Fiti. E ua ohipa atoa o Loraini ei taata. Ua fana‘o faahou vau i te hoê vahine o te tavini ra ia Iehova ma te taiva ore e o vau, e o te au atoa i te reo mai ia ’u!

Mâua Loraini, e faatere ra i te hoê haapiiraa i Fiti

I te roaraa o te mau matahiti, ua ite au mea nafea to tatou Metua î i te here, o Iehova, i haapao atu i ta te mau taata e hinaaro mau ra na roto i te mau reo atoa, noa ’tu e te paraparauhia ra teie reo na te tahi noa taata. (Salamo 49:1-3) Ua ite au i te oaoa o te taata a fana‘o ai ratou i ta tatou mau papai na roto i to ratou reo no te taime matamua, aore ra a himene ai ratou ia Iehova na roto i to ratou reo tumu. I roto i te mau taime mai teie, e haamana‘o vau i to Iehova here rahi no tatou. (Ohipa 2:8, 11) Te haamana‘o ra vau ma te papu i te mau ta‘o a te hoê taeae paari no Tuvalu, o Saulo Teasi te i‘oa. I muri a‘e i te himeneraa i te hoê himene o te Basileia no te taime matamua na roto i to ’na reo, ua parau oia: “No ’u, mea titau ia parau oe i te Tino aratai e mea maitai a‘e ia himene na roto i te reo Tuvalu i te reo Beretane.”

I Tetepa 2005, ua oaoa roa vau i te aniraahia mai ia ’u ia tavini ei melo o te Tino aratai a te mau Ite no Iehova. Noa ’tu e eita ta ’u e nehenehe faahou e tavini i roto i te ohipa huriraa, ua mauruuru roa vau ia Iehova i te vaiihoraa ia ’u ia tamau i te turu i te ohipa huriraa na te ao atoa. Mea oaoa roa na ’u i te iteraa e te haapeapea ra Iehova i ta ta ’na mau tavini atoa e hinaaro mau ra, oia atoa i te feia e ora ra i nia i te mau motu atea i ropu i te moana Patitifa! Oia mau, mai ta te fatu salamo i parau: “O Iehova te arii, ia ou‘au‘a te fenua: e te mau fenua rii e rave rahi ra ia oaoa ïa.”—Salamo 97:1.

^ par. 18 No te ite hau atu â eaha te huru o te feia no nia i ta tatou mau papai, a hi‘o i Te Pare Tiairaa o te 15 no Titema 2000, api 32; Te Pare Tiairaa reo Farani o te 1 no Atete 1988, api 22 e te A ara mai na! reo Farani o te 22 no Titema 2000, api 9.

^ par. 22 No te ite hau atu â no nia i te ohipa huriraa i Hamoa, a hi‘o i te Buka matahiti a te mau Ite no Iehova no 2009, api 120-121, 123-124 (Farani).