Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA (HAAPIIRAA) ATETE 2015

A feruri maite i nia i to Iehova here tamau

A feruri maite i nia i to Iehova here tamau

“E imi â vau i to mau ohipa atoa ra.”—SAL. 77:12.

HIMENE: 18, 61

1, 2. (a) No te aha i tiaturi papu ai outou e te here ra Iehova i to ’na nunaa? (b) Ua poietehia te taata e teihea hinaaro?

NO TE aha outou e tiaturi papu ai e te here ra Iehova i to ’na nunaa? Hou a pahono ai i tera uiraa, a hi‘o na i teie mau hi‘oraa: E rave rahi matahiti i te maoro, ua faaitoito te mau taeae e te mau tuahine ma te hamani maitai i te hoê tuahine o Taylene te i‘oa. Ua parau ratou ia ’na eiaha e titau rahi ia ’na iho. Te parau ra oia: “Ahani aita Iehova i here ia ’u, eita ïa ta ’na mau a‘oraa e horoahia ma te tuutuu ore.” Ua parau o Brigitte o tei haapao i ta ’na na tamarii e piti o ’na ana‘e i muri a‘e a pohe ai ta ’na tane: “E tautooraa fifi mau ia haapao i te tamarii i roto i te ao a Satani, no te hoê metua faaea taa noa iho â râ aita e apiti faahou. Ua papu râ ia ’u i to Iehova here, no te mea ua aratai oia ia ’u i te mau taime a ta‘i ai e a oto noa ’i au, e aita oia i vaiiho ia ’u ia faaruru hau atu â i ta ’u i nehenehe e faaoromai.” (Kor. 1, 10:13) Ua roohia Sandra i te hoê ma‘i e aita e rapaauraa. I te hoê tairururaa, ua faaite te hoê tuahine i te  anaanatae mau ia Sandra. Ua parau te tane a Sandra: “Noa ’tu e aita mâua i matau ia ’na, ua hopoi mai to ’na haapeapea hohonu i te oaoa rahi. Noa ’tu mea haihai te mau tapao o te here o ta te mau taeae e tuahine e faaite mai, te haapapu râ te reira i to Iehova here no tatou.”

2 Ua poiete Iehova i te taata ma te hinaaro e here e ia herehia ratou. Tera râ, mea ohie ia toaruaru no te ma‘i aore ra no te fifi moni aore ra no te manuïa ore i roto i ta tatou taviniraa. Ia haamata tatou i te mana‘o e aita Iehova e here faahou ra ia tatou, e mea titauhia ia haamana‘o e mea faufaa tatou no ’na e tei pihaiiho noa oia ia tatou, a tapea noa ’i i to tatou rima atau e a tauturu mai ai. Eita roa ’tu oia e haamoe ia tatou, ia tapea râ tatou i te taiva ore ia ’na.—Isa. 41:13; 49:15.

3. Eaha te nehenehe e haapuai i to tatou tiaturiraa e te here tamau ra Iehova ia tatou?

3 Ua tiaturi te mau Ite no Iehova i faahitihia i nia ’tu e tei pihaiiho te Atua ia ratou i roto i te taime fifi. E nehenehe atoa tatou e tiaturi e tei pihaiiho oia ia tatou. (Sal. 118:6, 7) I roto i teie tumu parau, e hi‘opoa tatou i na ô e maha o te faaite ra e te here ra Iehova ia tatou. Te vai ra (1) te poieteraa, (2) te Bibilia, (3) te pure e (4) te hoo. Ia feruri maite tatou i nia i te mau mea maitai atoa ta Iehova i rave, e tauturu ïa te reira ia tatou ia haamauruuru atu â ia ’na no to ’na here tamau.—A taio i te Salamo 77:11, 12.

A FERURI MAITE I NIA I TA IEHOVA I POIETE

4. Eaha ta tatou e haapii mai ia hi‘o tatou i ta Iehova i poiete?

4 Ia hi‘o tatou i ta Iehova i poiete, te haapii ra tatou i to ’na here mau no tatou. (Roma 1:20) Ei hi‘oraa, ua poiete Iehova i te fenua ia nehenehe tatou e rave hau atu â i te ora-noa-raa i reira. Ua horoa mai oia i te mau mea atoa ia fana‘o tatou i te ora. Mea titauhia ia tamaa tatou, e no te rau o te maa o ta Iehova e horoa mai, e riro ïa te tamaaraa ei taime au mau! (Koh. 9:7) Te oaoa nei te hoê tuahine, o Catherine te i‘oa, i ta ’na e ite ra i roto i te poieteraa, i te tau uaaraa tiare iho â râ i Kanada. Te parau ra oia: “Mea faahiahia roa ia ite mea nafea vetahi mau mea atoa i ora mai ai. Mai te mau tiare o tei faanahohia ia uaa faahou mai oia e te mau manu o tei ho‘i mai i to ratou vahi faaearaa, te vai atoa ra teie manu nainai roa o te parauhia colibri e o te ite i to ’na e‘a no te haere i te vahi maa a te mau manu, i rapae au mai i te haamaramarama o ta ’u vahi tamaaraa. Mea papu, no to Iehova here ia tatou, i horoa mai ai oia i te reira ia fana‘o tatou i teie mau mea faahiahia mau.” Mea here na to tatou Metua i ta ’na i poiete e te hinaaro râ oia ia fana‘o atoa tatou i te reira.—Ohi. 14:16, 17.

Ia hi‘o tatou i ta Iehova i poiete, te haapii ra tatou i to ’na here mau no tatou

5. I to ’na poieteraa i te taata, mea nafea Iehova i te faaiteraa i to ’na here?

5 Ua poiete Iehova ia tatou e te aravihi ia rave i te ohipa faufaa e ia oaoa i te reira. (Koh. 2:24) Ua horoa oia i te hopoia i te taata ia faaî i te fenua, ia faaapu i te reira, ia haapao i te mau i‘a, te mau manu e te mau  mea atoa ta ’na i poiete. (Gen. 1:26-28) Ua poiete atoa oia ia tatou e te mau huru maitatai faahiahia mau ia nehenehe tatou e pee i to ’na hi‘oraa.—Eph. 5:1.

MEA FAUFAA TE PARAU A TE ATUA

6. Ia feruri maite tatou i nia i te Parau a te Atua, e tauturu te reira ia tatou ia ite i te aha?

6 Ua horoa mai Iehova i te Bibilia no to ’na here rahi no tatou. Te faaite mai ra te Bibilia i ta tatou e hinaaro ra e ite no nia ia Iehova e i to ’na huru aau i nia i te taata. Ei hi‘oraa, te parau atoa mai ra te Bibilia eaha to Iehova huru i nia i te mau Iseraela o tei faaroo ore noa ia ’na. Te parau ra te Salamo 78:38: “Oia râ, no te î i te aroha, ua faaore a‘era i ta ratou hara, e aore a‘era i rave pohe roa ia ratou; ua faaho‘i pinepine ra oia i te riri, e aore to ’na riri i faahope-hua-hia.” Ma te feruri maite i nia i teie irava, e nehenehe te  reira e tauturu ia outou ia ite e te here ra e te haapao ra Iehova ia outou. Parau mau, te haapeapea mai ra Iehova ia tatou.—A taio i te Petero 1, 5:6, 7.

Te faaite mai ra te Bibilia i ta tatou e hinaaro e ite no nia ia Iehova e i to ’na huru aau i nia i te taata

7. No te aha mea faufaa roa te Bibilia no tatou?

7 Mea faufaa roa te Bibilia no tatou. No te aha? No te mea te paraparau mai ra Iehova ia tatou maoti ta ’na Parau. Ia aparau ohie noa te hoê metua e te hoê tamarii, e puai iho â to raua here e tiaturiraa te tahi i te tahi. O Iehova to tatou Metua î i te here. Noa ’tu e aita tatou i ite mata roa ia ’na aore ra i faaroo i to ’na reo, mai te huru ra e te paraparau roa mai ra oia ia tatou maoti te Bibilia. Mea titauhia ia faaroo noa tatou ia ’na! (Isa. 30:20, 21) A taio ai i te Parau a te Atua, e ite atu â tatou o vai o Iehova e e tiaturi tatou ia ’na o te aratai ra e o te paruru ra ia tatou.—A taio i te Salamo 19:7-11; Maseli 1:33.

Noa ’tu e ua a‘o Iehu ia Iehosaphata, ua ite râ Iehova i te “ohipa maitatai” i roto i te arii (A hi‘o i te paratarafa 8, 9)

8, 9. Eaha ta Iehova e hinaaro ia ite tatou? A horoa i te hoê hi‘oraa no roto mai i te Bibilia.

8 Te hinaaro ra Iehova ia ite tatou e te here mai ra oia ia tatou. Ua ite oia hau atu i to tatou huru taata tia ore, no te mea te hi‘o ra oia i te maitai i roto ia tatou. (Par. 2, 16:9) A hi‘o na mea nafea Iehova i te iteraa i te maitai o te arii Iehosaphata no Iuda. Ua rave Iehosaphata i te hoê faaotiraa ino ma te apiti atu i te arii Ahaba no Iseraela e ma te aro atu i to Arama i Ramota-gileada. Noa ’tu e ua parau na 400 peropheta haavare i teie taata ino o Ahaba e e upootia mai oia, ua parau râ te peropheta mau a Iehova o Mikaia e ia aro Iehosaphata e Ahaba, e pau iho â raua. E tera iho â tei tupu. Ua pohe Ahaba i roto i te tama‘i e ua fatata Iehosaphata i te pohe. I muri a‘e i te tama‘i, ua faaohipa Iehova ia Iehu no te a‘o ia Iehosaphata no ta ’na hape. Ua parau atoa Iehu ia ’na: ‘Te vai râ te ohipa maitatai i roto ia oe na.’—Par. 2, 16:9; 18:4, 5, 18-22, 33, 34; 19:1-3.

9 I te mau matahiti i na mua ’tu, ua parau Iehosaphata i te mau hui arii, te mau ati Levi e te mau tahu‘a ia haere i roto i te mau oire atoa no Iuda no te haapii atu i te taata i te Ture a Iehova. No te mea ua manuïa maitai ta ratou ohipa, ua haapii atoa te tahi atu mau nunaa no nia ia Iehova. (Par. 2, 17:3-10) No reira, noa ’tu e ua rave Iehosaphata i te hoê faaotiraa ino i muri a‘e, aita Iehova i haamoe i te mau ohipa maitai ta ’na i rave na i roto i to ’na oraraa. E hi‘oraa tamahanahana mau â teie no tatou, no te mea i te tahi mau taime, e hape iho â tatou. Ia tutava râ tatou i te tavini ia Iehova, e tamau oia i te here ia tatou e eita oia e haamoe i te mau ohipa maitai ta tatou i rave.

A HAAFAUFAA I TE FANA‘ORAA TAA Ê O TE PURE

10, 11. (a) No te aha e ô taa ê te pure no ǒ mai ia Iehova ra? (b) Eaha te huru aau e titauhia ia tatou a pure ai ia Iehova? (A hi‘o i te hoho‘a matamua.)

10 E rave te hoê metua î i te here i te taime no te faaroo i ta ’na mau tamarii ia hinaaro ratou e paraparau ia ’na. E hinaaro oia e ite i to ratou huru aau no to ’na haapeapea rahi ia ratou. E na reira atoa to tatou Metua î i te here ra o Iehova. E faaroo oia ia tatou a pure ai ia ’na. E fana‘oraa taa ê faufaa mau ia paraparau atu i to tatou Metua!

E faaroo Iehova i ta tatou mau aniraa haavare ore e e taa atoa ia ’na ia tatou, noa ’tu aita vetahi e taa ia tatou

11 E nehenehe tatou e pure ia Iehova i te mau taime atoa. O ’na to tatou Hoa e ua ineine noa oia i te faaroo i ta tatou mau pure. Te parau ra o Taylene i faahitihia i nia ’tu, “E nehenehe oe e paraparau noa ia ’na no nia i te mau mea atoa i te mau vahi atoa.” Ia faaite tatou ia Iehova i to tatou mau mana‘o hohonu,  e pahono mai oia ia tatou maoti te hoê irava, te hoê tumu parau o ta tatou mau papai aore ra te faaitoitoraa a te hoê taeae aore ra te hoê tuahine. E faaroo Iehova i ta tatou mau aniraa haavare ore e e taa atoa ia ’na ia tatou, noa ’tu aita vetahi e taa ia tatou. Te haapapu mai ra ta ’na mau pahonoraa o ta tatou mau pure i to ’na here tamau ia tatou.

12. No te aha mea faufaa ia haapii tatou i te mau pure e vai ra i roto i te Bibilia? A faataa.

12 E nehenehe tatou e huti mai i te mau haapiiraa faufaa i te mau pure e vai ra i roto i te Bibilia. I te tahi mau taime, mea faufaa ia haapii i te tahi o teie mau pure i te arui haamoriraa utuafare. E maitai mai ta tatou mau pure ia feruri maite tatou i nia i te mau pure haavare ore a te mau tavini a Iehova i tahito ra. Ei hi‘oraa, a haapii i te pure haehaa a Iona o ta ’na i faahiti mai mai roto mai i te opu o te i‘a rahi. (Iona 1:17–2:10) A haamana‘o na i te pure haavare ore a Solomona ia Iehova a avarihia ’i te hiero. (Arii 1, 8:22-53) E a feruri maite i nia i te pure tuiroo a Iesu. (Mat. 6:9-13) Te mea faufaa roa ’tu â, e ‘faaite hua i to outou iho â râ hinaaro i te mau mea atoa nei i te Atua.’ Ia na reira outou, “na te hau a te Atua, o tei hau ê atu i te ite taata nei, e faaitoito mai i to outou aau, e to outou mana‘o.” E rahi mai ïa to tatou mauruuru i to Iehova here tamau ia tatou.—Phil. 4:6, 7.

A FAAITE E TE MAURUURU RA OUTOU NO TE HOO

13. Eaha ta tatou e fana‘o maoti te hoo?

13 Ua horoa mai Iehova i te ô o te hoo “ia ora tatou.” (Ioa. 1, 4:9) A faahiti ai i teie faaiteraa faahiahia mau o to te Atua here, ua papai te aposetolo Paulo: “I pohe ai te Mesia i te tau mau ra, no te feia paieti ore ra. E ore hoi te hoê e haapohe no te tahi taata parau-tia, e faaoromai râ paha te hoê taata ’tu i te pohe no te taata maitai. Ua faarahi râ te Atua i to ’na aroha ia tatou nei, i te mea te vai taata hara noa nei â tatou, i pohe ai te Mesia no tatou nei.” (Roma 5:6-8) O te hoo te hi‘oraa rahi mau o te here o te Atua, ua horoa te reira i te ravea ia nehenehe te taata e fana‘o i te hoê taairaa piri roa e o ’na.

14, 15. Eaha te auraa o te hoo no (a) te mau Kerisetiano faatavaihia? (b) te feia e tiaturi ra e ora i te fenua nei?

14 Ua ite te hoê pǔpǔ Kerisetiano iti i to Iehova here tamau ma te hoê ravea taa ê mau. (Ioa. 1:12, 13; 3:5-7) Ua faatavai Iehova i teie feia maoti te varua mo‘a e ma te na reira, e riro ïa ratou ei tamarii na ’na i teie nei. (Roma 8:15, 16) I te mea ra e te ora faahou ra vetahi o ratou i te fenua nei, no te aha Paulo i parau ai e ‘ua haaparahihia ratou i nia i te ra‘i e hoê e Iesu Mesia’? (Eph. 2:6) No te mea, ua horoa Iehova ia ratou i te tiaturiraa e ora e a muri noa ’tu i te ra‘i.—Eph. 1:13, 14; Kol. 1:5.

Te haapapu ra te hoo i to Iehova here no te taata atoa

15 E nehenehe te feia aita i faatavaihia e riro mai ei hoa o te Atua ia faaite ratou i te faaroo i te hoo. E nehenehe atoa ratou e riro mai ei tamarii a te Atua e e ora e a muri noa  ’tu i roto i te paradaiso i te fenua nei. Te haapapu ra te hoo i to Iehova here no te taata atoa. (Ioa. 3:16) Mea faahiahia ia ite e ia tavini tatou i te Atua ma te taiva ore, e horoa mai oia i te hoê oraraa maitai i roto i te ao apî! E faaite ana‘e ïa e te haafaufaa ra tatou i te hoo, oia hoi te haapapuraa rahi mau o to te Atua here tamau no tatou.

A FAAITE I TO TATOU HERE IA IEHOVA

16. Eaha ta tatou e rave i muri a‘e i te feruri-maite-raa i nia i to te Atua here?

16 Eita e nehenehe e taio i te ravea e rave rahi i faaite ai Iehova i to ’na here ia tatou. Ua himene te arii Davida: “O te maitai o to mau mana‘o ia ’u nei, e te Atua e! e te rahi-roa-raa o to mau mana‘o ia taiohia e! Ia taiohia e au ra, e rahi ïa te reira i te one tahatai.” (Sal. 139:17, 18) E turai mai te feruri-maite-raa i te ravea e rave rahi ia faaite atoa i to tatou here ia ’na e ia horoa ’tu i te mea maitai roa ’‘e na ’na.

17, 18. Eaha te tahi mau ravea e faaite ai tatou i to tatou here i te Atua?

17 E rave rahi ravea e faaite ai tatou ia Iehova e te here ra tatou ia ’na. Ei hi‘oraa, e nehenehe tatou e faaite i to tatou here ia Iehova ma te paraparau ia vetahi ê no nia i te parau apî oaoa o te Basileia ma te itoito rahi. (Mat. 24:14; 28:19, 20) E nehenehe atoa tatou e faaite i te here i te Atua ma te tapea i te taiva ore a faaoromai ai i te mau fifi o te tamata ra i to tatou faaroo. (A taio i te Salamo 84:11; Iakobo 1:2-5.) Noa ’tu mea u‘ana mau to tatou mau fifi, ia papu ia tatou e te ite mai ra Iehova i to tatou mauiui e e tauturu mai iho â oia, no te mea mea faufaa tatou no ’na.—Sal. 56:8.

18 E turai mai to tatou here ia Iehova ia feruri maite i te mau ohipa faahiahia atoa ta ’na i poiete. Te faaite ra tatou ia Iehova e te here ra tatou ia ’na e te haafaufaa ra tatou i ta ’na Parau ma te riro mai ei taata haapii Bibilia maitai. E pure tamau tatou ia Iehova no to tatou here ia ’na e te hinaaro ra tatou e haapuai i to tatou taairaa e o ’na. E ia feruri maite tatou i nia i teie ô faufaa mau o te hoo, e rahi mai atu â ïa to tatou here. (Ioa. 1, 2:1, 2) Teie te tahi noa o te ravea e rave rahi e faaite ai tatou ia Iehova e te haafaufaa ra tatou i to ’na here tamau ia tatou.