Ia au i te Faanahonahoraa no te ea na te ao, ua riro te hamani-ino-raa i te vahine ei “fifi rahi roa e itehia na te ao nei.” Ua faaite-atoa-hia e “35% o te mau vahine tei hamani-ino-hia e to ratou hoa aore ra e te tahi atu taata. I te rahiraa taime, na te hoa faaipoipo i hamani ino atu . . . , e 30% hoi vahine na te ao nei tei na reirahia.”

I nia na 64 303 taata tei uiuihia, e 79 i nia i te hanere tei manaˈo “no te haapaoraa i rahi ai te fifi e te aroraa na te ao nei.” Ia au atoa i te tahi hiˈopoaraa i Beretane i 2001, e 72 i nia i te hanere o te huiraatira tei parau e Kerisetiano ratou, area i 2011, e 59 i nia i te hanere. I tera noa â mau matahiti, ua maraa te numera o te feia aita ta ratou e haapaoraa, na mua ˈˈe 15 i nia i te hanere e i 2011, e 25 i nia i te hanere.

Ia au i te faatiaraa a te mau vea, aita i maoro aˈenei, ua faatanohia te tahi ture o te titau ra i te mau tamarii paari eiaha noa ia farerei pinepine i to ratou na metua ruhiruhia, ia haapao atoa râ i to ratou mau hinaaro. Aita tera ture e “faaite ra i te tahi noa ˈˈe faautuaraa” no te tamarii e ore e na reira.

No te taviri i te taata, e hamani te mau pǔpǔ taata iino i te mau taoˈa ta te taata e faaohipa i te mau mahana atoa mai te monoˈi faanoˈanoˈa, te pua, oia atoa i te maa. Ua parau te peretiteni o te tahi taiete no nia i te parururaa o te maa, “noa ˈtu e ere i te taoˈa faufaa roa, e nehenehe te reira e faaohipahia no te taviri i te taata.” Ia au i te tahi taata hiˈopoa, e au ra 10 i nia i te hanere o te mau maa e hoohia na te ao tei anoihia e te tahi atu taoˈa.