Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

A ARA MAI NA! NOVEMA 2014

 IA AU I TE BIBILIA

Te mau hoho‘a

Te mau hoho‘a

Ma te aau haavare ore, e faaohipa e mirioni taata i te mau hoho‘a no te haamori i te Atua. Ia au râ i te Bibilia, mea tano anei tera peu? E mauruuru anei te Atua i te reira?

Ua faaohipa anei te mau ati Iuda taiva ore i te hoho‘a no te haamori i te Atua?

“Eiaha roa oe e hamani i te tii tarai hia no oe e te hohoa no te hoe mea i nia i te rai ra, e no te hoe mea i raro i te fenua nei, e no te hoe mea i roto i te pape i raro ae i te fenua ra. Eiaha roa oe e haamori atu, e e tavini atu.”—Exodo 20:4, 5, Te Bibilia Mo’a V.C.J.S., 1976.

Ua faautuahia te peu e faaohipa i te hoho‘a no te haamori i te Atua i roto i te taatoaraa o te mau papai Hebera tei matauhia i te parau, te Faufaa Tahito

TA TE RAHIRAA E PARAU

Ia au i te tahi buka, ua faaohipa te mau ati Iuda e rave rahi hoho‘a i roto i ta ratou haamoriraa “e e tao‘a faahanahanahia, haafaufaahia e haamorihia te reira.” (New Catholic Encyclopedia) Ua faahiti hoi tera buka i te hi‘oraa o te mau maa hotu, tiare e animara e rave rahi tei nana‘ohia no te faanehenehe i te hiero i Ierusalema.—Te mau arii 1, 6:18; 7:36.

TE TIA IA ITE

Aita te mau ati Iuda i faaohipa i te tahi noa ’‘e hoho‘a nana‘ohia aore ra hoho‘a i hamanihia no te hiero no te haamoriraa mai ta te buka i faahitihia e parau ra. Aita hoê a‘e irava Bibilia e faaite ra e ua faaohipa te tahi Iseraela taiva ore i te hoho‘a no te haamori i te Atua.

TA TE BIBILIA E PARAU RA

Teie ta te Atua i parau na roto i te peropheta Isaia, “e ore au e horoa i to ’u ra hanahana no vetahi ê; e te haamaitai ia ’u ra i te mau hoho‘a otiotihia [aore ra nana‘ohia].”—Isaia 42:8.

 Ua faaohipa anei te mau Kerisetiano matamua i te mau hoho‘a no te haamori i te Atua?

“E aha e ti’a ai i te nao o te Atua ia faaau ’e te mau idolo? . . . Eiaha e tapea noa atu i te mea viivii.”—Korinetia 2, 6:16, 17, Te Faufaa Api.

“Mea au ore roa na te mau Kerisetiano matamua ia tuu i te mau hoho‘a i roto i te mau fare pureraa. No ratou, e haamoriraa idolo ia tuturi aore ra ia pure te taata i mua i te reira.”—History of the Christian Church

TA TE RAHIRAA E PARAU

Te na-ô-hia i roto i te tahi buka e “e ere i te mea maitai ia ui e ua faaohipa anei te mau Kerisetiano matamua i te hoho‘a.” Ia au hoi i tera buka, “mea rahi te mau tao‘a hamanihia ma te aravihi i te tau o te mau Kerisetiano matamua tei itehia i roto i te mau vahi hunaraa ma‘i. . . . Ua riro atoa te mau hoho‘a e faaite i te mau aai ei tao‘a faanehenehe no te mau piha haamoriraa mo‘a e te mau menema.” *New Catholic Encyclopedia.

TE TIA IA ITE

No te toru noa o te senekele te hoho‘a tahito roa ’‘e i itehia i roto i teie mau apoo o tei faarirohia ei vahi hunaraa. Ua hamanihia te reira tau 200 matahiti i muri a‘e i to Iesu poheraa. E ere ïa i te mea tano ia parau tera “te haamoriraa a te mau Kerisetiano matamua” mai tei faahitihia i roto i te buka na mua ’tu. O te mau pǐpǐ matamua hoi tei faaite i te haamoriraa Kerisetiano tumu faataahia i roto i te mau Papai Heleni Kerisetiano, tei matauhia i te parau te Faufaa Apî. Te haapapu ra râ tera mau hoho‘a i itehia, ua haamata tei parau e Kerisetiano ratou i te rave i te peu a te mau nunaa ě ma te faaohipa i te hoho‘a i te toru o te senekele. E au ra e ua na reira ratou no te turai i te taata ia taui i te haapaoraa. *

TA TE BIBILIA E PARAU RA

“E maue ê atu i te haamori idolo.”—Korinetia 1, 10:14.

Mea tia anei ia faaohipa i te hoho‘a ei ravea no te haamori i te Atua?

“E ara ia outou i te mau idolo.”—Ioane 1, 5:21.

Aita te Bibilia e haapii ra ia faaohipa i te mau hoho‘a no te haamori i te Atua. No reira te mau Ite no Iehova e ore ai e faaohipa i te mau hoho‘a i to ratou fare aore ra i ta ratou vahi putuputuraa no te haamori i te Atua

TA TE RAHIRAA E PARAU

Te na-ô-hia ra i roto i te tahi buka, “i te mea e ua riro te haamoriraa i te hoho‘a ei haamoriraa i te taata i faahoho‘ahia, e nehenehe ïa te hoho‘a e fana‘o i te hoê â haamoriraa e te taata no ’na tera hoho‘a.”—New Catholic Encyclopedia.

TE TIA IA ITE

A haapii ai Iesu i ta ’na mau pǐpǐ e nafea ia pure, aita oia i parau ia ratou ia faaohipa i te mau hoho‘a. Aita te peu e faaohipa i te hoho‘a no te haamori i te Atua i roto i te mau Papai Heleni Kerisetiano.

TA TE BIBILIA E PARAU RA

“O to Atua o Iehova ta oe e haamori, e oia ana‘e ra ta oe e faaroo.”—Mataio 4:10.

^ par. 13 I roto i teie tumu parau, ua faaohipahia te parau hoho‘a no te mau hoho‘a hamanihia, hoho‘a haamorihia, tii, tapao e te tahi atu tao‘a e faaohipahia i roto i te haamoriraa.

^ par. 14 I roto e rave rahi nunaa taata mai i Aiphiti, Heleni e Initia, e peu matauhia te faaohiparaa i te mau hoho‘a.