Eaha to roto?

Mau faaho'iraa ê

Tapura tumu parau

Ite no Iehova

Tahiti

A ara mai na!  |  Novema 2014

 TAUTURU NO TE UTUAFARE | NO TE FEIA APÎ

E nafea ia patoi i te faahemaraa?

E nafea ia patoi i te faahemaraa?

TE FIFI

“I te tahi taime, e ani mai vetahi tamahine i ta ’u numera niuniu e e parau atoa mai ia taoto ia ratou. E patoi au a haere ê atu ai. I roto râ i to ’u feruriraa, e feruri noa vau, ‘Ahiri au i horoa i ta ’u numera, eaha te tupu?’ Mea nehenehe roa vetahi o tera mau tamahine, mea ohie ïa ia mana‘o, ‘no te aha e ore ai?’”—Carlos, * 16 matahiti.

Ua faahema-atoa-hia anei oe mai ia Carlos? Mai te peu e e, e nehenehe oe e patoi i te reira.

TE TIA IA ITE

Ia ore oe e patoi i te faahemaraa, e mauiui oe

E ere te taurearea ana‘e te faahemahia, te taata paari atoa râ. Ua rau te huru o te faahemaraa. E ere te aposetolo Paulo i te taurearea a papai ai oia: “Te oaoa nei hoi au i te ture a te Atua, . . . te ite nei râ vau i te tahi ture i roto i tau tino nei, i te mârôraa mai i te ture i roto i tau aau nei, e te faariroraa ia ’u ei tîtî na te ture ino i roto i tau tino nei.” (Roma 7:22, 23) Noa ’tu e ere i te mea ohie, aita Paulo i taora i te tauera. E nehenehe atoa ïa oe e na reira! Eaha hoi oe e vaiiho ai i to mau hinaaro ia faatîtî aore ra ia faatere ia oe! (Korinetia 1, 9:27) Ia matau oe i te patoi i te faahemaraa i to apîraa, e faaea oe i te feaa i teie nei e e faufaahia ïa ia riro oe ei taata paari.

Mea ino atu â te faahemaraa no te mau ravea o teie tau. Te faaite ra te Bibilia e mea puai roa “te mau hinaaro o te apîraa.” (Timoteo 2, 2:22) E puai roa ’tu râ te reira no te mau hoho‘a, afata teata, pehe e buka e hoohia i te feia apî. E turai hoi te reira ia mana‘o e mea navenave te faahemaraa. A hi‘o na i te faaitehia i roto i te tahi hoho‘a teata. Ia faahinaaro hoê tane i te tahi vahine, e pinepine e taoto iho â raua i roto i tera hoho‘a. Te na ô ra râ te Bibilia ei tane e ei vahine, “eiaha e faatia i to te tino nei mau hinaaro.” (Petero 1, 2:11) E nehenehe ïa ta oe e maiti i te patoi i te faahemaraa! E nafea?

 TA OE E NEHENEHE E RAVE

A feruri i to oe mau paruparu. Eiaha e mana‘o eita te fifi auri e mutu ua ino ana‘e te tahi tuhaa o te reira! E turaihia oe ia rave i te mea ino i roto i te mau tuhaa mea paruparu oe. Eaha ïa te titauhia ia oe ia haapao maitai?—Aratairaa Bibilia: Iakobo 1:14.

A feruri i te faahemaraa e nehenehe e tupu. A feruri i te mau tupuraa i reira oe e faahemahia ’i. A mana‘o i ta oe e rave no te patoi i te faahemaraa ia tupu te reira.—Aratairaa Bibilia: Maseli 22:3.

Eiaha e feaa. Ia au i te Bibilia, a faahemahia ’i Iosepha ia rave i te peu faufau, ua na ô oia: “Eaha hoi au e tia ’i ia rave i tena na ino rahi, a hara ’i i te Atua?” (Genese 39:9) Ma te parau “eaha hoi au e tia ’i,” aita Iosepha i feaa eaha te mea maitai e te mea ino. Mai tera atoa anei oe?

A maiti i te hoa maitai. Ma te maiti i te hoa e mana‘o ra mai ia oe, e puaihia oe ia patoi i te faahemaraa i roto i to oraraa. Te na ô ra te Bibilia: “O tei amui atoa to ’na haerea i to te feia paari ra, e paari atoa ïa.”—Maseli 13:20.

A ape i te mau tupuraa e turai ia fati i mua i te faahemaraa. Ei hi‘oraa:

  • Eiaha e faaea oe ana‘e e te tahi tamaroa aore ra tamahine.

  • A patoi i te haere i nia i te Internet i te taime aore ra vahi e turaihia oe ia mataitai i te hoho‘a faufau.

  • Eiaha e faahoa i te feia e parau aore ra e faaite mea maitai ia rave i te ohipa ino.

Teihea mau aratairaa e tauturu ia oe ia patoi i te faahemaraa?—Aratairaa Bibilia: Timoteo 2, 2:22.

A pure. Ua parau Iesu i ta ’na mau pǐpǐ: “E pure hoi, ia ore outou ia roohia e te ati.” (Mataio 26:41) Te hinaaro ra te Atua ra o Iehova ia patoi oe i te faahemaraa e e tauturu oia ia oe. Te na ô ra hoi te Bibilia: “E ore oia e vaiiho noa ia outou ia ati, maori râ o te tia ia outou ia faaoromai ra; e faatupu atoa oia i te haapuraa i taua ati ra, ia tia ia outou ia faaoromai.”—Korinetia 1, 10:13.

^ par. 4 Ua tauihia te mau i‘oa.