Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

A ARA MAI NA! TIURAI 2014

 TAUTURU NO TE UTUAFARE | NO TE FEIA FAAIPOIPO

E nafea ia ore e haamâu‘a i te moni?

E nafea ia ore e haamâu‘a i te moni?

TE FIFI

A hi‘o ai i te mau parau faaite o ta oe afata moni, aita rea faahou i nia iho. No faaipoipo noa ’tura oe e ua rahi roa te mau haamâu‘araa. No to oe hoa faaipoipo anei te hape? Eiaha e mana‘o oioi mai tera! Ma te haa amui, a feruri i ta oe e ta ’na i rave i topa ’i orua i roto i tera fifi. *

TE TUMU

Te faatanoraa i te mana‘o. Mai te peu e ua ora noa oe i te fetii na mua ’‘e, mea apî paha no oe te aufauraa i te mau haamâu‘araa. Peneia‘e atoa e mea taa ê to mana‘o e to to oe hoa faaipoipo no nia i te moni. Ua matau paha te tahi i te haamâu‘a i te moni e te tahi atu i te tarani. E titauhia te taime ia nehenehe na hoa faaipoipo ia taui e ia faatano i to raua mana‘o no te haapao i ta raua moni.

Mai te tahi raau i roto i te aua, e nehenehe te tarahu e rahi e e rahi noa ’tu

Te oreraa e rave oioi i te tahi ohipa. Mea rahi ta Jim faufaa i teie nei. Ua parau râ oia e i te haamataraa o to ’na faaipoiporaa, ua pau rahi ta ’na moni no to ’na ite ore i te haapao i te reira. Te na ô ra oia: “I te mea e aita vau i aufau oioi i tera e tera mea, ua faautuahia mâua ta ’u vahine ia aufau i te tino moni rahi a‘e. Ua pau roa ta mâua moni!”

Te oreraa e ite i ta oe moni. Mea ohie roa ia haamâu‘a i te moni ia ore oe e ite ehia to roto i ta oe pute. Tera iho â ia pinepine oe i te aufau e i te hoo mai i nia i te Internet aore ra ma te faaohipa i te matini uira. E hema hanoa atoa te feia faaipoipo apî i te tarahu i te fare moni.

Noa ’tu eaha te tumu, e nehenehe te moni e haafifi i to oe faaipoiporaa. Ia au i te tahi buka, “noa ’tu ehia moni ta ratou, ua faaite te rahiraa o te feia faaipoipo e tera te fifi matamua roa. E pinepine no te moni e rave rahi e tatama‘i ai.”—Fighting for Your Marriage.

 E NAFEA ÏA?

A faaoti i te haa amui. Eiaha te tahi e faahape i te tahi atu, a haa amui râ no te ore faahou e haamâu‘a i te moni. I te haamataraa o ta orua tauaparauraa, a faaoti eiaha e vaiiho i teie fifi ia tuino i to orua taairaa.—Aratairaa Bibilia: Ephesia 4:32.

A faaineine i te tahi tapura no te haapao i te moni. A papai i ta orua mau haamâu‘araa atoa o te ava‘e noa ’tu e e mea iti te reira. E ite ïa orua ihea te moni e haere ai e eaha te mau haamâu‘araa faufaa ore.

A tapao i te mau haamâu‘araa faufaa mai te hooraa mai i te maa, te ahu, te aufauraa i te fare, te pereoo e te vai ra ’tu â. I muri a‘e, a papai ehia moni te pau no te ite oioi i te haamâu‘araa o te ava‘e.—Aratairaa Bibilia: Luka 14:28.

‘Ua riro tei tarahu ei tavini no tei horoa i te tarahu.’—Maseli 22:7

I te mau ava‘e atoa, a faataa i te tahi tino moni no tera e tera haamâu‘araa (no te maa, fare, mori pereoo e te vai ra ’tu â). E tuu vetahi i te reira i roto i te vehî faataahia no tera e tera haamâu‘araa. * Ia iti te moni i roto i te tahi vehî, e faaea ratou i te haamâu‘a aore ra i te rave mai i tei roto i te tahi atu vehî.

A taui i to oe mana‘o no nia i te mau tao‘a. Eita oe e ite i te oaoa mau ma te hoo noa mai i te tao‘a apî roa. Ua parau hoi Iesu: “Rahi noa iho hoi ta te taata nei tao‘a, e ere hoi tei taua tao‘a na ’na ra to ’na ora.” (Luka 12:15) E pinepine, e faaite ta oe mau haamâu‘araa e ua tiaturi mau anei oe i tera mau parau.—Aratairaa Bibilia: Timoteo 1, 6:8.

A rave i te mau tauiraa. Te na ô ra Aaron tei faaipoipohia a piti matahiti i teie nei, “e ere paha te aufauraa i te tahi reni afata teata e te haereraa i rapae e tamaa i te mea moni roa i te haamataraa, ia matau râ oe i te na reira noa, e pau roa ta oe moni. E titauhia ia haapii tatou i te faaoti eiaha e hoo mai i te tahi mau tao‘a no te ore e haamâu‘a i te moni.”

^ par. 4 Noa ’tu e no te mau hoa faaipoipo apî teie tumu parau, e tano te mau aratairaa no te feia faaipoipo atoa.

^ par. 14 Ia faaohipa oe i te matini uira aore ra i te tareta moni, a tapao maitai i te haamâu‘araa e a tuu i te reira i roto i te vehî taitahi.

No te ite atu â

E nafea to tatou utuafare e oaoa ’i?

O Iehova te tumu o te utuafare e na ’na faaite mai i te ravea e oaoa ’i tatou.