Eaha to roto?

Mau faaho'iraa ê

Tapura tumu parau

Ite no Iehova

Tahiti

E nehenehe to utuafare e oaoa

 TUHAA 4

E nafea ia haapao i ta orua moni?

E nafea ia haapao i ta orua moni?

‘Ia rahi te a‘o e papu ai tei mana‘ohia.’—Maseli 20:18

Mea faufaa te moni no tatou paatoa ia noaa mai te mau mea e hinaarohia e to tatou utuafare. (Maseli 30:8) Oia mau, e “haapuraa tei te moni.” (Koheleta 7:12) Ei tane e vahine faaipoipo, e ere paha i te mea ohie ia tauaparau no nia i te moni, eiaha râ e vaiiho i te reira ia haafifi i to orua faaipoiporaa. (Ephesia 4:32) E mea tia ia tiaturi te tahi i te tahi e ia faaoti amui orua e nafea ia haapao i ta orua moni.

 1 A FERURI MAITE NA MUA

TA TE BIBILIA E PARAU RA: “O vai ïa taata i ǒ outou nei ia opua i te fare e faatia, e ore e mata na i te parahi i raro, a taio ai i te tao‘a e oti ai, i te navairaa ta ’na tao‘a?” (Luka 14:28) Mea faufaa roa ia hoê to orua mana‘o no nia i te faaohiparaa i ta orua moni. (Amosa 3:3) A faaoti eaha te hoo mai na mua e ehia moni te titauhia no te aufau i te reira. (Maseli 31:16) E ere no te mea e te vai ra te moni, e tia iho â ïa ia haamâu‘a i te reira! Eiaha e tarahu e a hoo noa mai i te pee ia orua i te aufau.—Maseli 21:5; 22:7.

TA OE E NEHENEHE E RAVE:

  • A faaoti amui eaha te rave ia toe mai te moni i te hopea ava‘e

  • Ua rahi ana‘e te haamâu‘araa i te moni e noaa mai ia orua i te ava‘e, a faaoti eaha te rave ia ore te reira e tupu faahou. Peneia‘e, e nehenehe e tunu i te maa i te fare no te ore e haere e tamaa i rapae

 2 A FAAITE I TE PARAU MAU E EIAHA E HAAMÂU‘A I TE MONI

TA TE BIBILIA E PARAU RA: “Te haapao-atea-maite-raa i te mea tia, eiaha i mua i te aro o te Fatu ana‘e ra, i mua atoa râ i te aro o te taata.” (Korinetia 2, 8:21) A faaite i te parau mau i to hoa faaipoipo ma te ore e huna ehia moni tei noaa mai ia oe, oia atoa tei haamâu‘ahia.

A tauaparau noa e to hoa no te rave i te faaotiraa faufaa mau no nia i te faaohiparaa i ta orua moni. (Maseli 13:10) Ma te na reira, e vai hau noa orua a oaoa ’tu ai i to orua faaipoiporaa. A faaite e e ere na oe tera moni, na te utuafare râ.—Timoteo 1, 5:8.

TA OE E NEHENEHE E RAVE:

  • A faaoti eaha te tino moni ta oe e ta ’na e nehenehe e haamâu‘a ma te ore e ani i te mana‘o o te tahi

  • Eiaha e tiai ia tupu roa te fifi no te tauaparau no te moni

No te ite atu â

A ARA MAI NA!

E nafea ia ore e haamâu‘a i te moni?

Eiaha e tiai ia pau te moni no te feruri i ta oe mau haamâu‘araa. A hi‘o e nafea ia ore e haamâu‘a i te moni.