Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

A ARA MAI NA! TIURAI 2014

 IA AU I TE BIBILIA

Ia pohe te taata

Ia pohe te taata

E haere anei te feia pohe i te tahi vahi taa ê?

“E repo hoi oe, e e ho‘i faahou atu â oe i te repo.”—Genese 3:19.

TA TE TAATA E PARAU RA

Te mana‘o nei vetahi e i muri a‘e i te pohe, e oraraa to ratou i te ra‘i, i roto i te po auahi, te vahi tamâraa hara aore ra i te tahi atu vahi. Te vai ra te feia e tiaturi e e fa faahou ratou i roto i te tino ê. No te tahi atu râ, te patoi nei ïa i tera mau tiaturiraa no te mea no ratou, o te pohe te hopea o te taata atoa.

TA TE BIBILIA E PARAU RA

Te na ô ra te Koheleta 9:10: “Aore hoi e ohipa, aore e imiraa, aore hoi e ite, aore hoi e paari, i te apoo ta oe e haere na.” Te faaite atoa ra te Bibilia eaha te tupu ia pohe te taata e te animara ma te na ô: “Te haere nei ratou i te vahi otahi; no te repo ana‘e ratou e te ho‘i ana‘e nei i te repo.”—Koheleta 3:20.

 Eaha te tupu ia pohe te taata?

“Te reva nei hoi to ’na varua, te ho‘i nei oia i to ’na ra repo; mou roa ’tura ta ’na i opua i taua mahana ra.”—Salamo 146:4.

TA TE TAATA E PARAU RA

E rave rahi tei haapiihia e tei te huru o to oe oraraa i te fenua nei e ite ai oe i te vahi e haere ai oe i muri a‘e i te pohe. Ua rave ana‘e oe i te ohipa maitai, e fana‘o oe i te oaoaraa rahi e a muri noa ’tu. Mai te peu e e ohipa ino, e haamauiuihia ïa oe e a muri noa ’tu. Te auraa ïa e, ia tamâhia te taata i ta ’na mau hara hou a tia ’tu ai i mua i te aro o te Atua i muri a‘e i to ’na poheraa. O tei ore i na reira, e ere roa ratou i tera fana‘oraa e a muri noa ’tu.

TA TE BIBILIA E PARAU RA

Eita te feia pohe e nehenehe e oaoa e e mauiui. I te mea e aita faahou te ora i roto i to ratou tino, eita tei pohe e ite noa ’‘e i te haapaoraa, eita atoa e nehenehe e tauturu aore ra e hamani ino i te feia e ora nei. Ia au i te Koheleta 9:5, 6: “Ua ite te feia e ora nei, e pohe ratou, aita râ a te feia i pohe ra e parau itea . . . To ratou aroha e to ratou riri, e to ratou feii, ua mou ana‘e ïa; aita hoi a ratou e tufaa e a muri noa ’tu i te mau mea atoa e ravehia i raro a‘e i te mahana nei.”

Te vai ra anei te tiaturiraa no tei pohe?

“Ia pohe te taata nei, e ora faahou anei? E tiai au i to ’u pue mahana i haapaohia ra e ia hope, e ia tae i te taime e faaho‘ihia ’i au ra.”—Ioba 14:14.

TA TE TAATA E PARAU RA

Ua matauhia e ia haere te tahi taata i te po auahi, aita faahou e tiaturiraa to ’na. E haamauiuihia o ’na e a muri noa ’tu. No te feia râ e haere i te vahi tamâraa hara, e nehenehe ratou e fana‘o i te oaoaraa rahi i te ra‘i ia tamâhia ratou i te auahi i ta ratou mau hara na mua.

TA TE BIBILIA E PARAU RA

Ia hope to ratou taotoraa i roto i te pohe, e faatia mai te Tamaiti a te Atua i te feia pohe no te ora i te fenua nei. Te na ô ra te Bibilia: “Eiaha e maere i te reira; te fatata mai nei hoi te hora e faaroo ai te feia atoa i roto i te apoo ra i tana reo, e e haere mai i rapae.” (Ioane 5:26, 28, 29) E fana‘o te tahi taata i te ora mure ore ia au to ’na haerea i muri a‘e i te tia-faahou-raa. *

^ par. 14 No te ite atu â no nia i te tia-faahou-raa, a hi‘o i te pene 7 o te buka Eaha ta te Bibilia e haapii mau ra? piahia e te mau Ite no Iehova.