Faatanoraa no te "mode accessibilité"

Search

Maiti te reo

Mau faaho'iraa ê

Eaha to roto?

Ite no Iehova

Tahiti

E faataa ê anei te mau Ite no Iehova i te mau utuafare?

E faataa ê anei te mau Ite no Iehova i te mau utuafare?

Ei Ite no Iehova, te tauturu nei matou i to matou iho mau utuafare e to te tahi atu. No matou, na te Atua i haamau i te utuafare e te faatura nei matou i te reira. (Genese 2:21-24; Ephesia 3:14, 15) I roto i te Bibilia, te horoa mai ra Iehova i te mau aratairaa tei tauturu e rave rahi taata na te ao nei ia oaoa e ia haapuai i to ratou faaipoiporaa.

Nafea te mau Ite no Iehova e tauturu ai i te mau utuafare ia haapuai i to ratou mau taairaa?

Te tutava nei matou i te pee i te a‘oraa Bibilia, e tauturu mai hoi te reira ia riro ei hoa faaipoipo e ei metua maitai a‘e. (Maseli 31:10-31; Ephesia 5:22–6:4; Timoteo 1, 5:8) E tauturu atoa te a‘oraa Bibilia î i te paari i te mau utuafare e ere hoê â faaroo to te tane e to te vahine. (Petero 1, 3:1, 2) Teie te mana‘o o te tahi mau taata e ere i te Ite no Iehova, ua riro râ to ratou hoa faaipoipo ei Ite no Iehova:

  • Te na ô ra Clauir no Beresilia: “I na matahiti matamua e ono o to mâua faaipoiporaa, ua tatama‘i noa mâua. I to Ivete râ riroraa ei Ite no Iehova, ua rahi atu â to ’na here e to ’na faaoromai. Aua‘e oia i taui i ora mai ai to mâua faaipoiporaa.”

  • Teie ta Agness, no Zambie, i parau mai: “Ua patoi au i to Chansa, o ta ’u ïa tane, haamataraa i te haapii i te Bibilia e te mau Ite no Iehova. No ’u, e faataa ê ratou i te mau utuafare. Tera râ, mai reira mai, ua ite au e ua tauturu mai te Bibilia i to mâua faaipoiporaa.”

I roto i ta matou taviniraa, te faaite nei matou i te taata e nafea te faaohiparaa i te mau a‘oraa Bibilia î i te paari e tauturu ai ia ratou

  • ia maiti i te hoê hoa faaipoipo ma te î i te paari

  • ia oaoa i roto i te matahiti faaipoiporaa matamua

  • ia vai hau noa e te fetii o te hoa faaipoipo

  • ia haapao i te moni

  • ia faaea i te tatama‘i

  • ia haapii i te faaore i te hapa

  • ia haapii i ta ratou mau tamarii

E peapea anei te faaipoiporaa ia taui hoê o na hoa faaipoipo i te faaroo?

I te tahi taime, e. Ei hi‘oraa, ia au i te tahi parau faataa a te taiete Sofres i 1998, 1 faaipoiporaa i nia e 20 te faaruru nei i te mau fifi rahi a riro ai hoê o na hoa faaipoipo ei Ite no Iehova.

Ua tohu Iesu e e faaruru te feia o te pee i ta ’na mau haapiiraa i te tahi mau haapeapearaa i roto i to ratou utuafare. (Mataio 10:32-36) Ia au i te taata tuatapapa ra o Will Durant, i te tau o te Hau emepera Roma, ua parihia te haapaoraa Kerisetiano i te faataa ê i te mau utuafare. * I teie mahana, tera atoa te parihia ra i te mau Ite no Iehova. Te auraa anei ïa e o te hoa faaipoipo tei riro ei Ite no Iehova te tumu o te fifi?

Tiripuna Europa o te mau tiaraa o te taata

I to te Tiripuna Europa o te mau tiaraa o te taata haavaraa e e faataa ê anei te mau Ite no Iehova i te mau utuafare, ua faaitehia e e pinepine e na te mau fetii e ere i te Ite te faatupu i te mau fifi. Aita ratou e “farii e e faatura ra i te tiamâraa o to ratou fetii ia faaohipa i to ’na faaroo.” Ua parau atoa te Tiripuna e tera iho â te tupu ra i roto i te mau utuafare amahamaha i te pae faaroo. E ere o te mau Ite no Iehova ana‘e i roto i tera tupuraa. * Noa ’tu râ, te tutava nei te mau Ite no Iehova i te pee i te a‘oraa Bibilia: “Eiaha roa te ino e tahoohia i te ino i te taata atoa nei. . . . Peneia‘e o te tia ra, e parahi hau noa outou i roto i te taata atoa nei.”—Roma 12:17, 18.

No te aha te mau Ite no Iehova e tiaturi ai e e mea tia ia faaipoipo noa ratou e te taata hoê â haapaoraa to ratou

Te pee nei te mau Ite no Iehova i te faaueraa Bibilia ia faaipoipo ‘ia au noa i te Fatu,’ oia hoi e te hoê taata hoê â faaroo to ratou. (Korinetia 1, 7:39) No ǒ mai i te Bibilia teie faaueraa faufaa roa. Ei hi‘oraa, ia au i te tahi tumu parau i roto i te hoê vea no 2010, mea maitai a‘e te mau taairaa o na hoa faaipoipo tei tahoê i te pae faaroo.—Journal of Marriage and Family. *

Aita râ te mau Ite no Iehova e faaitoito ra i to ratou mau hoa Kerisetiano ia faataa ê i to ratou apiti e ere i te Ite. Te na ô ra te Bibilia: “E vahine faaroo ore ta te hoê taeae ra, e i tia i taua vahine ra ia parahi â ia ’na ra, eiaha oia e tuu ê atu ia ’na. E e tane faaroo ore ta te hoê vahine ra, e i tia i taua tane ra ia parahi â ia ’na ra, eiaha oia e tuu ê atu ia ’na.” (Korinetia 1, 7:12, 13) E auraro te mau Ite no Iehova i tera faaueraa.

^ par. 17 A hi‘o Caesar and Christ, api 647.

^ par. 18 A hi‘o i te haavaraa horoahia i rotopu i Te mau Ite no Iehova no Moscou e vetahi ê e ia Rusia, api 26-27, paratarafa 111.

^ par. 20 A hi‘o i te Journal of Marriage and Family, buka 72, numera 4, (Atete 2010), api 963.

No te ite atu â

E nafea to oe utuafare e oaoa ’i?

E Atua oaoa Iehova o te hinaaro ra ia oaoa te mau utuafare. Hi‘o i te mau aratairaa Bibilia faufaa no te mau tane, vahine, metua e tamarii.

E nafea ia riro ei metua tane maitai?

A hi‘o e pae faaueraa Bibilia o te tauturu atu ia riro ei metua tane maitai e î i te here