Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

A ARA MAI NA! MATI 2013

 TAUTURU NO TE UTUAFARE | NO TE FEIA FAAIPOIPO

E nafea ia faaea i te tatama‘i?

E nafea ia faaea i te tatama‘i?

TE FIFI

E ere paha i te mea ohie no oe e to hoa faaipoipo ia tauaparau ma te mǎrû. Maa mea iti noa ta oe e parau aore ra e rave, e ura anei ïa to hoa?

Mai te peu e tera iho â, e nehenehe e taui. Na mua râ, e titauhia ia ite orua i te tumu e pinepine ai te tatama‘iraa.

TE TUMU

Te taa-ore-raa.

Te na ô ra Jillian *: “I te tahi taime, e parau vau i te hoê mea i ta ’u tane eiaha râ mai ta ’u i mana‘o. Aore râ, no ’u e au ra e ua faaite au ia ’na i te tahi mea, te tupuraa mau râ, e ere ïa. Mai tera noa mâua!”

Te taa-ê-raa.

Noa ’tu e ua tano oe i to hoa faaipoipo, mea taa ê iho â to orua mana‘o no nia i te tahi mea. No te aha? No te mea i te ao nei, eita e piti taata e tuea roa. E nehenehe ïa te faaipoiporaa e riro ei oaoaraa. Aore ra mai no te rahiraa, ei fifi.

Hi‘oraa tano ore.

Te parau ra Rachel: “I tatama‘i noa na to ’u na metua. Aita raua e faatura ra ia raua. No reira, a faaipoipo ai au, e paraparau vau i ta ’u tane mai ia mama i nia ia papa. Aita vau i ite eaha tera mea faatura.”

A feruri i te tumu mau.

E pinepine te hoa faaipoipo i te riri no te tumu ê eiaha râ no tei tupu noa ’tura. Ei hi‘oraa, e haamata te tatama‘iraa mai teie: “A tahi ra oe e ho‘i mai ai?” E ere paha te fifi e ua taere oe, no ’na râ aita o ’na i faaturahia.

Noa ’tu eaha te tumu, eita oe e oaoa ia tatama‘i noa orua. E nehenehe atoa vetahi e faataa ê roa. E nafea ïa ia faaea i te na reira?

 E NAFEA?

Te tahi ravea, o te taaraa ïa i te tumu o te tatama‘iraa. Ia hau orua, a rave na mai te faaitehia i raro nei.

1. A rave e piti api parau, hoê na oe, te tahi atu na to hoa faaipoipo. A papai i te tumu i tatama‘i ai orua. Ei hi‘oraa, e tapao paha te tane: “Na muri noa oe i to oe mau hoa i te mahana taatoa. Aita ’toa oe i niuniu mai e no te parau teihea roa oe.” E papai te vahine: “Eita iho â pai oe e au ia haere au e to ’u mau hoa.”

2. Ma te ore e faaoti ru, a ui ia orua: E fifi rahi mau anei iho â? E nehenehe anei e faaore i te hapa? I te tahi taime, ia vai noa te hau, mea maitai a‘e paha ia farii e mea taa ê to orua mana‘o e ia faaore i te hapa maoti te here.—Faaueraa tumu: Maseli 17:9.

Mai te peu e no orua e hapa rii tera, a tatarahapa ’tu te tahi i te tahi e eiaha e faahiti faahou atu.—Faaueraa tumu: Ephesia 4:32.

E fifi rahi ana‘e te reira no te hoê aore ra no orua, a faaohipa i to muri nei mau mana‘o.

3. A papai orua toopiti i to orua huru a tupu ai te tatama‘iraa. Ei hi‘oraa, e papai paha te tane: “Mea au a‘e na oe i te mau hoa ia ’u,” te vahine: “E tamarii noâ vau no oe, e au oe i to ’u papa.”

4. A horoa i ta oe api parau i to hoa faaipoipo a tauaparau atu ai. Eaha te huru mau o to hoa a tatama‘i ai orua? A feruri e nafea orua e nehenehe ai e faaite i te tumu mau o te fifi ma te ore e tatama‘i.—Faaueraa tumu: Maseli 29:11.

5. A tauaparau i ta orua i haapii maoti te mau mana‘o tauturu i nia ’tu. Ma te faaohipa i teie tumu parau, e nafea orua e nehenehe ai e faaafaro i te fifi aore ra e ore ai e tatama‘i faahou?

^ par. 7 Ua tauihia te mau i‘oa.

No te ite atu â

E nafea to oe utuafare e oaoa ’i?

E Atua oaoa Iehova o te hinaaro ra ia oaoa te mau utuafare. Hi‘o i te mau aratairaa Bibilia faufaa no te mau tane, vahine, metua e tamarii.

E nafea ia ore te mana‘o e tu?

Maha mana‘o faufaa e tauturu ia oe e to hoa faaipoipo ia haapae i te tatama‘i e ia ite nafea ia faaafaro i te fifi.