Te Tusi Muamua a Petelu 3:1-22
3 E penā foki koutou e fāfine a‵vaga, ke faka‵logo koutou ki otou avaga,+ ko te mea kafai e isi ne tino e se faka‵logo ki te muna, e mafai o tosina mai latou e aunoa mo se pati e auala i amioga a olotou avaga,+
2 me ko oti ne molimau ne latou ki olotou mata otou amioga ‵ma+ fakatasi mo te āva malosi.
3 Ke mo a ma fakatāua ne koutou a teuga i tua—ko te ‵filiga o laulu mo te fakaaogaga o teuga aulo+ io me ko gatu ‵togi ‵mafa,
4 kae ke fai koutou e pelā mo te tino sē lavea ko te loto telā e pei ki te gatu e se mafai o pala, ko te agaga filemu mo te agamalu,+ telā e sili tena tāua i te kilokiloga a te Atua.
5 Me tenei te auala ne teu ei a fāfine tapu i aso mua kolā ne fakamoe‵moe ki te Atua, ko te lotou faka‵logo ki olotou avaga,
6 e pelā eiloa mo Sala ne fakalogo ki a Apelaamo, kae taku ne ia ki te aliki.+ Kae ko oti ne fai koutou mo fai ana tama‵liki, māfai e tumau koutou i te faiga o mea ‵lei e aunoa mo te ma‵taku.+
7 A koutou e tāgata a‵vaga, ke penā foki te tumau o koutou i te ‵nofo fakatasi mo otou avaga i te loto malamalama.* Tuku atu ki a latou te āva+ e pelā me ne ipu e ma‵fagofie, me i a latou ko sui fakatasi mo koutou+ i te ola telā e maua mai i te alofa tauanoa o te Atua, ko te mea ke se fakalavelave atu ki otou ‵talo.
8 Kae ko te ‵toe mea, a koutou katoa e ‵tau o tasi i te mafaufau+, lagonaga fakataina, alofa fakataina, alofa atafai,+ mo te loto maulalo.+
9 Ke se taui atu te masei ki te masei+ io me ko pati fakama‵sei ki pati fakama‵sei.+ I lō te fai penā, toe taui atu ki se fakamanuiaga,+ me ne kalagagina koutou ki te auala tenei, ko te mea ke maua ne koutou se fakamanuiaga.
10 Me “ko so se tino telā e fiafia ki te olaga kae fia lavea ne ia a aso ‵gali e ‵tau o leoleo tena alelo mai mea ma‵sei+ mo ana laugutu mai te faipati ki pati ‵loi.
11 Ke na ‵fuli a ia kea‵tea mai te mea masei+ kae fai te mea ‵lei;+ ke ‵sala a ia ki te filemu kae kausaki ki ei.+
12 Me i mata o Ieova* e kilo atu ki tino amio‵tonu, kae ko ana taliga e fakalogologo ki olotou ‵talo,+ kae ko mata o Ieova* e ‵teke ki a latou kolā e fai mea ma‵sei.”+
13 E tonu, ko oi la ka fakalogo‵mae atu ki a koutou māfai e loto finafinau koutou o fai te mea ‵lei?+
14 Kae kafai foki loa e ‵tau o logo‵mae koutou ona ko te amiotonu, e fia‵fia koutou.+ Kae ke mo a koutou e ma‵taku ki mea kolā e ma‵taku latou ki ei,* io me e manava‵se ki ei.+
15 Kae ke faka‵malu a Keliso e pelā me ko te Aliki i otou loto, ke toka faeloa o avatu se tali i mua o tino katoa kolā e ma‵nako ki se fakamatalaga mai i a koutou e uiga ki te fakamoemoega ko maua ne koutou, kae ke fai penā i te agamalu+ mo te āva lasi.+
16 Fakatumau se loto lagona ‵lei,+ ko te mea kafai e fakamaseigina koutou i so se auala, e mafai eiloa o masiasi a latou kolā e fakamasei atu ki a koutou+ ona ko otou amioga ‵lei e pelā me ne soko o Keliso.+
17 Me e ‵lei atu ke logo‵mae koutou ona ko te faiga o mea ‵lei,+ māfai e loto ki ei te Atua, i lō te faiga ne koutou o mea ma‵sei.+
18 Me ne mate a Keliso fakatasi mō taimi katoa mō agasala,+ se tino amiotonu mō tino amio sē ‵tonu,+ ko te mea ke takitaki atu ei koutou ki te Atua.+ Ne tamate a ia i te foitino,+ kae ne toe fakaola aka i te agaga.+
19 Kae i te tulaga eiloa tenei ne fano ei a ia o folafola atu te tala ‵lei ki agaga i te falepuipui,+
20 kolā ne seki faka‵logo i aso mua i te taimi ne faka‵tali ei te Atua mo te kufaki* i aso o Noa,+ i te taimi koi faite ei te vaka,+ telā ne ‵sao i ei a nai tino e tokovalu i luga i te vai.+
21 A te papatisoga telā e ‵pau mo te mea tenei, e faka‵sao foki i ei koutou (e se mai te fakaseaiga o lailaiga o te foitino, kae mai te fakamolemole atu ki te Atua ke maua se loto lagona ‵lei),+ e auala i te toetu o Iesu Keliso.
22 Ko nofo nei a ia i te feitu fakaatamai o te Atua,+ me ne fanatu a ia ki te lagi, kae ne fai ke ‵nofo mai lalo i a ia a agelu, pulega mo tino pule katoa.+
Fakamatalaga mai lalo
^ Io me “fakaasi atu te āva ki a latou; ke malamalama i a latou.”
^ Io me kāti, “ke mo a ma ma‵taku ki olotou mea fakamataku‵taku.”
^ Eleni, “ne faka‵tali a te kufaki o te Atua.”