I mataupu fakasolo konei, ko oti ne iloa ne tatou a te auala ke maua te tali ki te fesili tenei, Ko oi te Atua? Ne tauloto ne tatou mai te kamataga me i tena igoa ko Ieova kae ko tena uiga sili ko te alofa. Ne sau‵tala foki tatou ki mea ne fai ne ia mo mea ka fai ne ia mō te ‵lei o ana tino kolā ne faite. E tiga eiloa koi uke atu a mea ke tauloto e uiga ki te Atua, e mafai o mafaufau koe me e aoga pefea a te mea tenā ki a koe.

E tauto mai a Ieova me “kafai e ‵sala koe ki a ia, ka maua eiloa ne koe a ia.” (1 Nofoaiga Tupu 28:9) Mafaufau aka la ki te meaalofa tāua telā e faka‵tali mai ki a koe māfai e ‵sala kae fai ke iloa ne koe te Atua—se “va fakataugasoa ‵pili mo Ieova”! (Salamo 25:14) Se a te aoga o te vaegā va fakataugasoa tenā mō koe?

Fiafia tonu. Ne fakamatala mai a Ieova e pelā me ko “te Atua fiafia.” (1 Timoteo 1:11) A te fakapilipili atu ki a ia mo te fakaakoako atu ki ana auala ka maua i ei ne koe te fiafia tonu, telā e mafai o aoga ki a koe i te feitu i mea tau lagonaga, te mafaufau mo te feitu faka-te-foitino. (Salamo 33:12) Ka mafai foki o ati aka ne koe se olaga fiafia mai te kalo kea‵tea mai te olaga masei, kae ati aka a uiga ‵lei, kae fakatumau a fesokotakiga ‵lei mo nisi tino. Ka ‵lago eiloa koe ki pati a te faisalamo, penei: “Kae pelā mo au, a te fakapilipili atu ki te Atua e ‵lei ki a au.”—Salamo 73:28.

Tausiga atafai kae ‵lei. Ne tauto mai a Ieova ki ana tavini: “Ka tuku atu ne au a pati fakatonutonu mo oku mata e kilo ki a koe.” (Salamo 32:8) E fakauiga i ei me ka saga tonu atu eiloa a Ieova ki ana tavini kae tuku atu ne ia a te mea telā e manakogina ne ana tavini taki tokotasi. (Salamo 139:1, 2) Kafai ko oti ne ati aka ne koe se fesokotakiga ‵lei mo Ieova, ka lavea atu ne koe me ka fakatasi atu eiloa a ia ki a koe.

Se olaga gali i aso mai mua. E se gata fua i te tuku atu ki a koe a te kī ki se olaga fiafia kae fakamalie loto i te taimi nei, e ‵tala mai foki ne Ieova te Atua se olaga gali mō koe i aso mai mua. (Isaia 48:17, 18) E fai mai te Tusi Tapu: “Tenei te uiga o te ola se-gata-mai, ke iloa tonu ne latou a koe, ko te Atua tonu e tokotasi, e penā foki loa mo te tino telā ne uga mai ne koe, ko Iesu Keliso.” (Ioane 17:3) I taimi faiga‵ta konei, a te fakamoemoega telā e tuku mai ne te Atua e mafai o fai pelā me se taula mō ‵tou ola telā “e mautinoa kae ‵mautakitaki.”—Epelu 6:19.

Konei a nāi pogai tāua ke iloa faka‵lei ne tatou te Atua kae ke ati aka se fesokotakiga ‵lei mo ia. E mafai eiloa ne koe o faipati atu ki so se Molimau a Ieova io me fano ki te motou fakatuatusi ko te jw.org mō ne fakamatalaga tai uke atu.