Te Tusi Muamua ki a Timoteo 1:1-20

  • Alofaaga (1, 2)

  • Fakaeteete i faiakoga ‵se (3-11)

  • Te alofa tauanoa telā ne fakaasi atu ki a Paulo (12-16)

  • Tupu o te se-gata-mai (17)

  • “Taua atu i te taua ‵lei” (18-20)

1  Au ko Paulo, se apositolo a Keliso Iesu e auala i te fakatonuga a te Atua te ‵tou Fakaola mo Keliso Iesu te ‵tou fakamoemoega,+  ki a Timoteo,*+ taku tama tonu+ i te fakatuanaki: Ke i luga i a koe te alofa tauanoa mo te alofa fakamagalo mo te filemu mai te Atua te Tamana mo Keliso Iesu te ‵tou Aliki.  E pelā eiloa mo taku fakamalosiga ki a koe ke nofo i Efeso i te taimi ko fai ei au o fano ki Maketonia, ko fakamalosi atu foki au nei ki a koe ko te mea ke fakatonu atu koe ki nisi tino ke mo a ma akoako ne latou a akoakoga sē ‵tonu,  io me ‵saga atu ki tala sē ‵tonu+ mo te fakatelega o gafa. A mea penā e iku atu fua ki te sē aoga+ kae e tuku mai fua i ei a manatu tuku taumate i lō te tukumaiga o se mea mai te Atua e uiga ki te fakatuanaki.  A te pogai tonu o te akoakoga tenei ko te fakaasiatuga o te alofa+ mai te loto ‵ma, te loto lagona ‵lei mo te fakatuanaki+ e aunoa mo te fakaloiloi.  Mai te ‵kalo kea‵tea mai mea konei, ko ‵saga atu a nisi tino o fai‵pati ki mea sē aoga.+  E ma‵nako latou ke fai mo faiakoga+ o te tulafono, kae e se malamalama latou i olotou pati e fai io me ko mea kolā e kinau malosi mai latou ki ei.  E iloa ne tatou i te Tulafono e ‵lei fua māfai e fakaaoga faka‵lei ne se tino,  mai te iloa atu i te tulafono e seki faite mō te tino amiotonu, kae mō tino solitulafono+ kae uiga ‵teke, ko tino sē amioatua mo tino agasala, tino sē a‵lofa fakamaoni kae fakamasei ne latou a mea tapu, e tamate ne latou olotou tamana mo olotou mātua, ne tino tatino, 10  ne tino e fina ki amioga fakatauavaga sē ‵tau,* ko tāgata e fia‵fai ki tāgata,* ko tino kai‵soa tino, ko tino ‵loi, ko tino molimau ‵pelo, mo mea katoa kolā e ‵teke ki akoakoga aoga+ 11  e ‵tusa mo te ‵malu o te tala ‵lei e uiga ki te Atua fiafia, telā ne tuku mai ki a au.+ 12  Au e fakafetai ki a Keliso Iesu te ‵tou Aliki, telā ne tuku mai ne ia te ‵mana ki a au, me ne talitonu a ia i a au e fakamaoni o fai te galuega ne tuku mai ne ia,+ 13  e tiga eiloa au se tino ne muna masei, ne uiga fakasaua kae fia sili i aso mua.+ Kae ne fakaasi mai ki a au te alofa fakamagalo me ne fai ne au a mea konā i toku valea mo te seai o se fakatuanaki. 14  Kae ne lasi ‵ki te alofa tauanoa o te ‵tou Aliki fakatasi mo te fakatuanaki mo te alofa i a Keliso Iesu. 15  A te tugapati tenei e fakatuagagina kae e ‵tau o talia katoatoa ne tatou: A Keliso Iesu ne vau ki te lalolagi o faka‵sao a tino agasala.+ Mai i tino konei, ko au eiloa te tino agasala tafasili i te masei.+ 16  E tiga te feitu tenā, ne fakaasi mai ki a au a te alofa fakamagalo ko te mea e auala i a au te ‵toe tino agasala tafasili i te masei, ko mafai ei o fakaasi atu ne Keliso Iesu a tena kufaki kātoa, kae fai au e pelā me se fakaakoakoga mō latou kolā e fakatuanaki ki a ia ke maua te ola se-gata-mai.+ 17  Nei la, ke i luga i te Tupu o te se-gata-mai,+ telā e se mafai o fakaseai,+ e se mafai o lavea,+ ko te Atua fua e tokotasi,+ a tavaega mo te ‵malu ki te se-gata-mai, se-gata-mai eiloa. Amene. 18  Taku tama ko Timoteo, e tuku atu ne au te fakatonuga tenei ki a koe e ‵tusa mo valoaga kolā ne fai e uiga ki a koe, me e auala i valoaga konei, ka tumau koe i te taua atu i te taua ‵lei tenei,+ 19  puke ‵mau ki te fakatuanaki mo se loto lagona ‵lei,+ kolā ne ‵pei kea‵tea ne nisi tino, kae ne iku atu ki te fakamaseiga o olotou fakatuanaki e pelā me se vaka kasa. 20  A Humenio+ mo Alesana ne tino i a latou konei, kae ko oti ne tuku atu ne au a lāua ki a Satani+ ko te mea ke maua ne lāua se akoakoga e auala i polopolokiga ke se toe muna ma‵sei atu ki te Atua.

Fakamatalaga mai lalo

Tena uiga “Se Tino e Fakaaloalo ki te Atua.”
Onoono ki te FP, “Amioga Fakatauavaga sē ‵Tau.”
Io me “tāgata kolā e ‵moe fakatauavaga mo nisi tāgata.” Eleni, “tāgata kolā e ‵moe mo tāgata.”