Mwasonosono apa, mipingo yose ya Chihebere mu chigaŵa cha ofesi ya munthavi ya Israel, yikaphalirika kuti Baibolo lose la Malemba Ghakupatulika mu Mang’anamuliro gha Charu Chiphya la pa intaneti pera lamba kusangika mu Chihebere chasono, mwakuti ŵanthu ŵangachita dawunilodi kwamba pa May 2, 2022. Mabaibolo gha kuchita kupurinta ghambenge kusangika mu September 2022.

Mu Baibolo ili muli kusazgika Baibolo la Malemba gha Chihebere ilo likafumiskika mu chaka cha 2020 kweniso Baibolo lakunozgekaso la Malemba Ghachigiriki. Aka nkhakwamba kuti Baibolo lose la Mang’anamuliro gha Charu Chiphya lifumiskike mu Chihebere chasono. Malemba agho ghang’anamulika mu Chihebere chasono ghakovwira munthu kumanya makora ng’anamuro lenecho la Chihebere chakwamba icho Baibolo likalembekera, icho pasono ntchakusuzga kuchipulikiska.

Yumoza uyo wakang’anamurako wakati: “Mabaibolo gha mu Chihebere chasono, chomenechomene gha mu Malemba gha Chihebere, ghakusangika viŵi yayi ku ŵanthu. Lekani, ndise ŵakukondwa kuti tapokera Baibolo lose la Mang’anamuliro gha Charu Chiphya ilo muli vinthu vinandi vyakovwira kupulikiska Baibolo.”

Munyakeso uyo wakang’anamurako Baibolo ili wakati, “Tikuwonga Yehova chifukwa cha chawanangwa ichi. Ŵakaboni ŵa Yehova na ŵanthu wose awo ŵakuyowoya Chihebere chiŵaŵirenge chipusu kuŵa paubwezi wakukhora na Yehova, Dada withu wakuchanya.”—Yakobe 4:8.