Sambizgani Ŵana Ŵinu

Kasi Uli Kujipulikapo nga Ŵanji Ŵakukupatura?

MUNTHU wangajipulika kuti ŵanyake ŵakumupatura para ŵakukhumba yayi kuti waŵe mu gulu lawo. Panji cingaŵa cifukwa cakuti ngwamtundu unyake, fuko linyake, panji wakuyowoya na kucita vinthu mu nthowa yakupambana na yawo. Kasi nyengo zinyake ukuwona kuti ŵanji ŵakukupatura?— a

Tiye tiwone mwanalume munyake uyo wakajipulikanga nthena. Zina lake likaŵa Mefibosheti. Tiye tiwone kuti kasi Mefibosheti wakaŵa njani ndipo cifukwa wuli wakajipulikanga nthena? Para ukuwona nga ŵanji ŵakukupatura, ungasambira vinandi kwa Mefibosheti.

Mefibosheti wakaŵa mwana wa Jonatani, mubwezi wa Davide. Pambere Jonatani wandafwe ku nkhondo, wakaphalira Davide kuti: ‘Ucitire lusungu ŵana ŵane.’ Davide wakaŵa themba. Vilimika vikati vyajumphapo wakakumbuka mazgu gha Jonatani ndipo pa nyengo iyi Mefibosheti wakaŵa wacali wamoyo. Apo wakaŵa mucoko wakacita ngozi yikuru. Pa umoyo wake wose wakatondekanga kwenda. Kasi wawona cifukwa ico panji wakawoneranga kuti ŵanji ŵakumupatura?—

Davide wakakhumbanga kucitira lusungu mwana wa Jonatani. Ntheura Davide wakanozga kuti Mefibosheti waŵe na nyumba pafupi na iyo ku Yerusalemu, na kurya nayo lumoza pa thebulu lake. Davide wakapeleka Ziba na ŵana ŵake ndiposo ŵateŵeti ŵake kwa Mefibosheti kuti ŵamuteŵeterenge. Davide wakamucindika nadi mwana wa Jonatani. Kasi ukumanya ico cikacitika pamanyuma pake?—

Mu nyumba ya Davide mukanjira masuzgo. Abisalomu, uyo wakaŵa yumoza mwa ŵana ŵa Davide, wakawukira awiske cifukwa wakakhumbanga kuŵa themba. Davide wakacimbira kuti waponoske umoyo  wake. Mefibosheti wakakhumbanga kuluta uko Davide na ŵanthu ŵanyake ŵakacimbilira. Ŵabwezi ŵanandi ŵa Davide ŵakalutira nayo lumoza cifukwa ŵakamanya kuti ndiyo ngwakwenelera kuŵa themba. Kweni Mefibosheti wakaluta yayi cifukwa wakatondekanga kwenda.

Kweni Ziba wakaphalira Davide kuti Mefibosheti wakhalira kumanyuma cifukwa wakukhumba kuti ndiyo waŵe themba. Davide wakagomezga utesi uwu. Ndipo katundu yose wa Mefibosheti wakamupeleka kwa Ziba. Pakati pajumpha nyengo yicoko waka, Davide wakawina nkhondo iyo wakarwanga na Abisalomu ndipo wakawelera ku Yerusalemu. Wakati wiza, wakafumba Mefibosheti kuti nayo walongosore cifukwa ico wakakhalira. Davide wakati Mefibosheti na Ziba ŵagaŵane pakati katundu. Kasi ukughanaghana kuti Mefibosheti wakati wuli?—

Wakadandawurapo yayi kuti Davide weruzga uheni nkhani iyi. Mefibosheti wakamanya kuti themba likwenera kuŵa pa mtende mwakuti licite makora mulimo wake. Ntheura wakati Ziba watore waka katundu yose. Cinthu cakuzirwa kwa Mefibosheti cikaŵa cakuti muteŵeti wa Yehova, Davide waweleraso pa uthemba wake ku Yerusalemu.

Mefibosheti wakasuzgika comene. Kanandi wakawonanga kuti ŵakumupatura. Kweni Yehova wakamutemwanga ndipo wakamupweleleranga. Kasi nkhani iyi yikutisambizgaci?— Yikutisambizga kuti nanga ni para tikucita viwemi, ŵanthu ŵanyake ŵangatitetera mautesi. Yesu wakati: “Usange caru cikumutinkhani, imwe mukumanya kuti cadankha kutinkha ine pambere cindatinkhe imwe.” Ŵanthu ŵakafika na pa kumukoma Yesu. Tingaŵa na cigomezgo cose kuti usange tikucita viwemi, Yehova, uyo ni Ciuta waunenesko watitemwenge ndipo Mwana wake Yesu nayo watitemwenge.

Ŵazgani Malemba agha mu Baibolo Linu

1 Samuel 20:15-17, 41, 42

2 Samuel 4:4; 9:1-10; 19:24-30

Yohane 15:18

[Mazgu ghamusi]