Umo Nyengo Yakusambilira Yingaŵira Yakukondweska na Yacandulo

Kasi tingacita wuli kuti tikondwenge comene pakusambira Baibolo? Kasi tingacita wuli kuti tisangenge candulo cikuru na ivyo tikusambira? Mwakudumura tiyeni tiwone vinthu vitatu vyakuzirwa ivyo vingatovwira kuti tandulenge comene na ivyo tikusambira mu Baibolo.

1 LUROMBO: Kulomba ndico nchinthu cakwamba ico tingacita. (Sal. 42:8) Cifukwa wuli? Tikwenera kuwona kuti kusambira Mazgu gha Ciuta nchigaŵa ca kusopa kwithu. Ntheura, tikwenera kulomba Yehova kuti watovwire kukhazikiska maghanoghano ghithu kweniso kuti watipe mzimu wake utuŵa. (Luka 11:13) Barbara uyo wacita umishonale kwa nyengo yitali, wakati: “Nyengo zose nkhulomba pambere nindambe kuŵazga panji kusambira Baibolo. Para nacita nthena nkhuwona kuti Yehova wali nane ndiposo kuti wakukondwa na ivyo nkhucita.” Kulomba pambere tindambe kusambira kukovwira kuti tiŵikenge mtima na maghanoghano ghose pa cakurya cauzimu ico tapika.

2 KULANGURUKA: Cifukwa cakusoŵa nyengo, ŵanji ŵali na cizgoŵi ca kuŵazga waka Mazgu gha Ciuta kwambura kughanaghanirapo. Ntheura, ŵakutaya vyandulo ivyo ŵangasanga pakusambira Baibolo. Carlos, uyo wateŵetera Yehova kwa vilimika vyakujumpha 50, wakumanya kuti kupatura nyengo yakulangurukira nkhwakuzirwa mwakuti wasange candulo na ivyo wakusambira. Iyo wakati: “Pasono nkhuŵazga Baibolo mapeji ghacoko waka, panji ghaŵiri zuŵa lili lose. Ntheura, nkhuŵa na nyengo yinandi yakulangurukira pa ivyo naŵazga mwakuti nisambirepo kanthu.” (Sal. 77:12) Para tikuŵa na nyengo yakulangurukira, tikumanya vinandi vyakukhwaskana na khumbo la Ciuta.—Kol. 1:9-11.

3 KULONDEZGA: Tingasanga candulo na mulimo uwo tikucita para tamanya kuzirwa kwake. Ndimoso viliri na kusambira Baibolo. Gabriel, mbali muwukirano uyo wakuŵazga Baibolo mwakukhazikika, wakati: “Kusambira kukunovwira kuti nitonde masuzgo agho nkhukumana nagho zuŵa na zuŵa ndipo kukunovwiraso kuti nane novwire ŵanji.” Wakatiso: “Nkhuyezga kulondezga vyose ivyo nkhusambira.” (Dute. 11:18; Josh. 1:8) Pali vinthu vinandi vyakukhwaskana na Ciuta ivyo tingasambira na kuvilondezga.—Zinth. 2:1-5.

KUWELERAMO: Tili na mwaŵi ukuru comene wa kulingizga mu vinjeru vya Yehova, uyo nchisimi ca vinjeru. (Rom. 11:33) Ntheura, pambere mundambe kusambira, lombani dankha Yehova kuti wamovwirani kukhazikiska maghanoghano ghinu kweniso kuti wamupeni mzimu wake utuŵa. Ŵani na nyengo yakulangurukira pa ivyo mukuŵazga. Kweniso nyengo zose londezgani ivyo mukusambira. Para mukulondezga vinthu vyakuzirwa ivi, mukondwenge comene na kusanga candulo pakusambira Baibolo.