Baibolo Lingawovwira Nthengwa Yinu

NTHENGWA—ku ŵanji, lizgu ili likupereka maghanoghano ghaweme comene. Kweni ku ŵanji, likuŵa lakuŵinyiska mtima. “Nkujipulika nga ni para nili wakupatika kale,” wakalira nteura mwanakazi munyake. “Nkujipulika kuŵa wakujoworeka ndiposo waphukwa nyengo zose.”

Kasi ncivici ico cikupangiska ŵantu ŵaŵiri awo pakwamba ŵakapangana kuti ŵatemwanenge na kukondweskana kuti ŵambe kutinkana? Cifukwa cimoza nkureka kusambira za ivyo vikukhumbikwa mu nthengwa. “Tikutorana kwambura na kusambizgika wuwo yayi,” wakawona nteura mutolamakani munyake wa vya cipatala.

Kafukufuku uyo wakacitika na wupu wa The National Marriage Project wa ku Rutgers University ku New Jersey, U.S.A. wakukhozgera kuti mbantu ŵacoko waka mazuŵa ghano awo ŵakumanya makora za nthengwa. “Kwakuyana na kafukufuku uyu, ŵanandi ŵakakulira mu mbumba izo ŵapapi ŵawo ŵakaŵa ŵambura cimwemwe panji mu mbumba izo ŵapapi ŵawo ŵali kupatana,” wakalemba nteura murongozgi wa gulu ili. “Ŵakumanya makora nkanira nthengwa yambura kukondweska, kweni ŵakumanya makora viŵi yayi umo nthengwa yiweme yikwenera kuŵira. Ŵanji ŵangayowoya waka kuti nthengwa yiweme yikwenera kuŵa ‘yakupambanako na ya ŵapapi ŵane.’”

Kasi Ŵakristu ŵakureka kukhwaskika na masuzgo gha mu nthengwa? Yayi. Nadi pano, Ŵakristu ŵanji mu nyengo yakale ŵakakhumbikwiranga urongozgi wakudunjika wakuti ŵareke “kusutuka” ku nthengwa zawo. (1 Ŵakorinte 7:27) Ncakumanyikwirathu kuti nthengwa yiliyose ya ŵantu ŵaŵiri ŵambura urunji yizamuŵa na masuzgo ghake, kweni tiri na wovwiri. Ŵafumu na ŵawoli ŵanganyolorera ubwezi wawo mwakugwiriskira ncito ivyo Baibolo likuyowoya.

Mbunenesko kuti Baibolo ni buku lakupereka urongozgi wa nthengwa pera cara. Ndipouli, pakuti likafunyilirika na Uyo wakapanga manozgero gha nthengwa, tingaŵa na cigomezgo kuti ivyo Baibolo likuyowoya vingaŵa vyakovwira comene. Kwizira mwa ncimi Yesaya, Yehova Ciuta wakati: “Ine ndine Yehova, Ciuta winu, Uyo wakumusambizgani kuti muwone candulo, Uyo wakumurongozgani mu ntowa iyo mukwenera kwendamo. A Mupulikirenge marango ghane! Mphanyi cimango cinu canguŵa nga ndi mronga, na urunji winu nga ndi majigha gha nyanja.”—Yesaya 48:17, 18.

Kasi citemwa ico cikaŵapo pakati pa imwe na munyinu wa mu nthengwa cayamba kuzizima? Kasi mukujipulika kuti ndimwe ŵakukakika mu nthengwa yambura citemwa? Mwanakazi munyake uyo wakakhala pa nthengwa virimika 26 wakati: “Urwirwi uwo nkuwupulika mu ubwezi wanteura uwu ngwakusuzga kuti niwurongosore. Ukusinta cara ndipo nyengo zose nkusuzgika nawo.” Kuruska kuzomera waka ca mutu kuŵinya kukhala mu nthengwa iyo yikutondeka kufiska ivyo mukukhumba, mwalekeraci kucita kantu kanyake kakukhwaskana na nkani iyi? Nkani yakurondezgapo yizamurongora mweneumo fundo za mu Baibolo zingawovwilira ŵafumu na ŵawoli kunozga nthengwa zawo pa cigaŵa cimoza—kusunga pangano.