KUWARO kwa cingalaŵa, ŵanthu ŵakacitanga vinthu nga ni umo ŵakacitilanga mazuŵa ghose. Ŵakaŵa ŵacali ŵandagomezge kuti Cigumula cicitikenge. Ŵakwenera kuti ŵakahoyanga comene Nowa kuluska pakwamba. Kweni mwambura kucedwa ŵakaleka kuhoya.

Mwamabuci vura yikayamba kuwa. Yikathika kufuma mu mtambo nga ni para munthu wakupungura maji mu ndowo. Nowa wakayowoya unenesko! Kweni pa nyengo iyi ŵakaŵa kuti ŵacedwa kuti ŵanjire mu cingalaŵa. Cijaro cikaŵa kuti cajalika na Yehova.

Nakalinga maji ghakabenekelera caru cose. Maji ghakaŵa nga ni mironga yikuru. Ghakawiska makuni na kugadabura malibwe ghakurughakuru, ndipo ghakapoma comene. Ŵanthu ŵakatenthema. Ŵakakwera pacanya pa malo ghakukwera. Ŵakayamba kughanaghana kuti mphanyi ŵakapulikira Nowa na kunjira mu cingalaŵa apo cijaro cikaŵa mwazi! Kweni ŵakaŵa kuti ŵacedwa kale.

Maji ghakakwelerakwelera. Kwa mazuŵa 40, muhanya na usiku, maji ghakathika kufuma kucanya. Ghakayamba kukwera mupaka kufika pacanya pa mapiri, ndipo mwambura kucedwa nanga ni mapiri ghatali ghakabira. Mwantheura nga ni umo Ciuta wakayowoyera, ŵanthu wose na nyama izo zikaŵa kuwaro kwa cingalaŵa vikafwa. Kweni waliyose mukati mu cingalaŵa wakapona.

Nowa na ŵana ŵake ŵakacita nchito yiwemi ya kuzenga cingalaŵa. Maji ghakanyamura cingalaŵa, ndipo cikayenjamanga pacanya pa maji. Zuŵa linyake, pamanyuma pakuti vura yaleka kuwa, dazi likayamba kuŵala. Mwee, nako kukaŵa kwakukondweska kuliwona! Kukaŵa waka nyanja yikuru yimoza kulikose. Ndipo cinthu cimoza ico cikawonekanga cikaŵa cingalaŵa ico cikayenjamanga pa maji.

Vinkhara vikaŵa kuti vyamara. Vikaŵakoso cara kuti vipweteke ŵanthu. Vyose vikafwa, pamoza na ŵanyinawo na ŵanthu wose ŵaheni. Kweni kasi nchivici ico cikacitikira ŵawiskewo?

Ŵawiskewo ŵa vinkhara ŵakaŵa ŵanthu nga ndise cara. Ŵakaŵa ŵangelo awo ŵakiza kuzakakhala nga ni ŵanthu pa caru capasi. Mwantheura Cigumula cikati ciza, ŵakafwira lumoza na ŵanthu cara. Ŵakavura mathupi gha taŵanthu agho ŵakaŵa nagho na kuweleraso kucanya nga mbangelo. Kweni ŵakazomerezgekaso cara kuŵa cigaŵa ca mbumba ya ŵangelo ŵa Ciuta. Mwantheura ŵakaŵa ŵangelo ŵa Satana. Mu Baibolo ŵakucemeka viŵanda.

Sono Ciuta wakacitiska mphepo kuputa, ndipo maji ghakayamba kuphwa. Myezi yinkhondi yikati yajumphapo cingalaŵa cikakhala pacanya pa mapiri. Mazuŵa ghanyake ghanandi ghakajumphapo, ndipo awo ŵakaŵa mu cingalaŵa ŵakalaŵiskanga kuwaro na kuwona pacanya pa mapiri. Maji ghakaphwilangaphwilanga.

Pamanyuma pake Nowa wakatuma ciyuni cifipa zina lake cihoŵi kuti cifumire kuwaro kwa cingalaŵa. Ico cikadukanga kuwaro kwa kanyengo kacoko na kwizaso, cifukwa kukaŵavya malo ghawemi ghakuti cingadekapo. Cikacita nthena kwa nyengo yitali ndipo nyengo yiliyose para cawerako cikapumuranga pa cingalaŵa.

Nowa wakakhumbanga kumanya usange maji ghakamuka pa caru, ntheura wakatuma nkhunda. Kweni nkhunda nayoso yikawelera cifukwa yikatondeka kusanga pakudeka. Nowa wakayitumaso kaciŵiri, ndipo yikiza na hamba la olive ku mlomo wake. Ntheura Nowa wakamanya kuti maji ghaphwa. Nowa wakatumaso nkhunda kacitatu, paumaliro pake yikasanga malo ghakomira ghakuti yidekepo.

Sono Ciuta wakayowoya na Nowa. Wakati: ‘Fuma mu cingalaŵa. Tola mbumba yako yose na nyama.’ Ŵakakhala mu cingalaŵa kwa nyengo yakujumpha cilimika cimoza. Aghanaghanira waka cimwemwe ico ŵakaŵa naco kuŵaso kuwaro na kuŵa ŵamoyo!