Ŵakaboni ŵa Yehova ŵakugomezga kuti fundo na malango agho ghali mu Baibolo ghakovwira kuti tisankhenge vinthu mwamahara na kukondweska Yehova. (Yesaya 48:17, 18) Nangauli ndise yayi tikapanga fundo na malango agha, kweni tikughalondezga. Tiyeni tiwone umo ghanyake mwa malango agha ghakovwilira pa nkhani ya chibwezi. a

•   Nthengwa yikwenera kumara yayi. (Mateyu 19:6) Ŵakaboni ŵa Yehova ŵakuwona mwakupepuka yayi nkhani ya chibwezi, chifukwa nkhwamba kwa nthengwa.

•   Ŵekha awo ŵafika pa msinkhu wakuti ŵangatora ndiwo ŵakwenera kuŵa pachibwezi. Ŵanthu aŵa ŵakwenera ‘kujumpha pa uwukirano,’ panji kuti nyengo iyo khumbo lakugonana likuŵa likuru chomene.—1 Ŵakorinte 7:36.

•   Awo ŵali pachibwezi ŵakwenera kuŵa na wanangwa wakutora panji kutengwa. Yehova wakuwona kuti wose awo ŵalondezga malango gha boma pakumazga nthengwa, ŵalije wanangwa wakutora panji kutengwa chifukwa malango gha Chiuta ghakuti nthengwa yingamara para yumoza wachita uleŵi.—Mateyu 19:9.

•   Ŵakhristu awo ŵakukhumba kutorana ŵakwenera kuŵa awo ŵakusopera lumoza. (1 Ŵakorinte 7:39) Ŵakaboni ŵa Yehova ŵakuwona kuti ŵakwenera kutorana na munthu uyo ngwakubatizika mu chisopa chawo, uyo wakwizako waka yayi. (2 Ŵakorinte 6:14) Kufuma kale, Chiuta wakuphalira ŵateŵeti ŵake kuti ŵatoranenge na munthu uyo ŵakusopera lumoza. (Genizesi 24:3; Malaki 2:11) Ŵanthu ŵanyake ŵakati ŵachita kafukufuku ŵakawona kuti dango ili ndakovwira chomene na mazuŵa ghano wuwo. b

•   Ŵana ŵakwenera kupulikira ŵapapi ŵawo. (Zintharika 1:8; Ŵakolose 3:20) Ŵana awo ŵakukhala na ŵapapi ŵawo ŵakwenera kulondezga ivyo ŵakuŵaphalira pa nkhani ya chibwezi. Ŵangaŵaphalira msinkhu uwo ŵangaŵira pachibwezi kweniso vinthu ivyo ŵakwenera kuchita pachibwezi.

•   Ŵakaboni ŵa Yehova ŵakulondezga fundo za mu Malemba pa nkhani ya chibwezi ndipo waliyose wakusankha yekha nyengo kweniso munthu uyo wangaŵa nayo pachibwezi. Iwo ŵakukumbuka fundo yakuti: “Waliyose wayeghenge katundu wake.” (Ŵagalatiya 6:5) Ŵakaboni ŵa Yehova ŵanandi awo ŵakukhumba kuŵa pachibwezi, ŵakuwona kuti ntchiwemi kufumba dankha Ŵakaboni ŵa Yehova ŵanyawo awo ŵakumanya vinandi kweniso ŵakuŵakhumbira viwemi.—Zintharika 1:5.

•   Ŵanthu ŵanandi para ŵali pachibwezi ŵakuchita zakwananga zikuru. Mwachiyelezgero, Baibolo likukana uzaghali. Likutiso awo ŵandatorane ŵakwenera yayi kuseŵereskana nkhuli kweniso kugonana mu mulomo panji ku matako. (1 Ŵakorinte 6:9-11) Likutiso kuchita vinthu ivyo vikuwuska khumbiro lakugonana ‘mbukazuzi’ pamaso pa Chiuta. (Ŵagalatiya 5:19-21) Baibolo likukanaso “kayowoyero kaheni” panji kuti milangwe yabweka.—Ŵakolose 3:8.

•   Mtima ngwakupusika. (Yeremiya 17:9) Ungapangiska munthu kuchita vinthu ivyo wakumanya kuti ni viheni. Kuti ivi vileke kuchitika, awo ŵali pachibwezi ŵakwenera yayi kuŵa pa malo ghaŵekha. Ŵangasankha kuti ŵachezgerenge pagulu panji ŵaŵe na munthu munyake wakwenelera. (Zintharika 28:26) Mkhristu uyo wakukhumba kutora wakwenera kumanya uheni wa vibwezi vya pa Intaneti, chomenechomene munthu uyo ŵakumumanya makora yayi.—Salimo 26:4.