Nhlamulo ya Bibele

 Nhlomulo lowukulu wu ta tisa maxangu lama nga si tshamaka ma va kona eka vanhu. Hi ku ya hi vuprofeta bya Bibele, wu ta endleka “emasikwini yo hetelela,” kumbe “enkarhini wa makumu.” (2 Timotiya 3:1; Daniyele 12:4) Ku ta va “nhlomulo lowu nga si tshamaka wu va kona hi mpfhuka Xikwembu xi tumbuluxa swilo hinkwaswo ku fikela hi nkarhi wolowo, naswona a wu nge he tlheli wu va kona.”​—Marka 13:19; Daniyele 12:1; Matewu 24:21, 22.

Leswi nga ta endleka hi nkarhi wa nhlomulo lowukulu

•   Ku herisiwa ka vukhongeri bya mavunwa. Hi ku tsopeta ka tihlo, vukhongeri bya mavunwa byi ta herisiwa. (Nhlavutelo 17:1, 5; 18:9, 10, 21) Van’watipolitiki lava nga ni matimba lava yimeriwaka hi Nhlangano wa Matiko hi vona va nga ta hetisisa xikongomelo lexi xa Xikwembu.​—Nhlavutelo 17:3, 15-18. a

•   Ku hlaseriwa ka vukhongeri bya ntiyiso. Matiko lama hlanganeke, lama tiviwaka tanihi “Gogo wa tiko ra Magogo,” lama ku vulavuriwaka ha wona eka xivono xa Ezekiyele ma ta ringeta ku herisa lava nga eka vugandzeri bya ntiyiso. Hambiswiritano, Xikwembu xi ta sirhelela vagandzeri va xona leswaku va nga lovisiwi.​—Ezekiyele 38:1, 2, 9-12, 18-23.

•   Ku avanyisiwa ka vanhu. Yesu u ta avanyisa vanhu hinkwavo ni ku “hambanisa vanhu, ku fana ni loko murisi a hambanisa tinyimpfu eka timbuti.” (Matewu 25:31-33) U ta avanyisa vanhu hi ku ya hi ndlela leyi munhu ha un’we a va khomeke hayona ‘vamakwavo,’ va Yesu lava nga ta fuma na yena etilweni.​—Matewu 25:34-46.

•   Ku hlengeletiwa ka lava nga ta fuma na Yesu. Lavo tshembeka lava hlawuriweke ku ya fuma na Kreste va ta heta ntirho wa vona wa laha misaveni kutani va pfuxeriwa ku ya hanya etilweni.​—Matewu 24:31; 1 Vakorinto 15:50-53; 1 Vatesalonika 4:15-17.

•   Armagedoni. “Nyimpi ya siku lerikulu ra Xikwembu xa Matimba Hinkwawo” yi tlhela yi vuriwa “siku ra Yehovha.” (Nhlavutelo 16:14, 16; Esaya 13:9; 2 Petro 3:12) Lavo homboloka lava nga ta avanyisiwa hi Kreste va ta lovisiwa. (Sofaniya 1:18; 2 Vatesalonika 1:6-10) Leswi swi katsa ku herisiwa ka tipolitiki ta misava hinkwayo, leti Bibele yi ti fanisaka ni xivandzana lexi nga ni tinhloko ta nkombo.​—Nhlavutelo 19:19-21.

Leswi nga ta endleka endzhaku ka nhlomulo lowukulu

•   Ku pfaleriwa ka Sathana ni madimona. Ntsumi leyikulu yi ta pfalela Sathana ni madimona “ekheleni ro enta,” leri fanekiselaka rifu laha va nga taka va nga koti ku endla nchumu. (Nhlavutelo 20:1-3) Ku va Sathana a ri ekheleni swi nga fanisiwa ni ku va ejele; a nge koti ku kucetela vanhu ku endla swo biha.​—Nhlavutelo 20:7.

•   Gidi ra Malembe ri sungula. Mfumo wa Xikwembu wu ta sungula ku fuma malembe ya 1 000, laha wu nga ta tisela vanhu mikateko yo tala. (Nhlavutelo 5:9, 10; 20:4, 6) “Ntshungu lowukulu” lowu nga hlayekiki wu ta “huma enhlomulweni lowukulu,” kutani wu pona ivi wu vona ku sungula ka Gidi ra Malembe emisaveni.​—Nhlavutelo 7:9, 14; Pisalema 37:9-11.