Nghena endzeni

Xana Nguvu Yo Lahla Vafi Ya Le Turin Hi Yona Leyi Yesu A Lahliweke Ha Yona?

Xana Nguvu Yo Lahla Vafi Ya Le Turin Hi Yona Leyi Yesu A Lahliweke Ha Yona?

Nhlamulo Ya Bibele

Nguvu yo lahla vafi ya le Turin a yi boxiwi eBibeleni. I nguvu ya lineni leyi ku ehleketiwaka leswaku ntsumbu wa Yesu Kreste a wu tsondzeriwe hi yona loko a lahliwa. Hikwalaho ko kholwa leswi, nguvu yoleyo van’wana va ehleketa leswaku hi yona leyi Vujagana byi nge i masasela yo kwetsima swinene. Kereke ya le Turini le Italy yi hlayise nguvu yo lahla vafi ebokisini leri khiyiweke hi makhiyelo ya elektroniki.

Xana Bibele ya swi seketela leswaku ku ni Nguvu yo Lahla Vafi ya le Turin? Doo.

Xiya swilo swinharhu mayelana ni nguvu yo lahla vafi leswi hambanaka ni leswi Bibele yi swi vulaka.

  1. Nguvu yo lahla vafi i nguvu yo leha tisentimita ta 442 yi anama tisentimitara ta 113 swin’we ni lapi rin’wana ra tisentimitara ta nhungu.

    Leswi Bibele yi swi vulaka: Ntsumbu wa Yesu a wu tsondzeriwe hi tinguvu to tala, ku nga ri nguvu yin’we ya lineni. Nhloko ya yena a yi tsondzeriwe hi nguvu yin’wana. Endzhaku ka loko Yesu a pfuxiwile, un’wana wa vaapostola vakwe u ye esirheni leri nga riki na munhu, hiloko a fika a “vona tinguvu ti ri ehansi.” Bibele yi tlhela yi ku: “lapi leri a ri ri enhlokweni yakwe ri nga ri endhawini yin’we ni tinguvu kambe ri songiwe roxe endhawini yin’wana.”—Yohane 20:6, 7.

  2. Nguvu yo lahla vafi leyi nga kona yi ni thyaka leri ku vuriwaka leswaku i ngati ya ntsumbu lowu a wu nga hlantswiwanga.

    Leswi Bibele yi swi vulaka: Loko Yesu a fa, vadyondzisiwa vakwe va teke ntsumbu wakwe ivi va endla “hi ndlela ya ntolovelo wa Vayuda wo lunghiselela ku lahla.” (Yohane 19:39-42) Maendlelo ya Xiyuda a ya katsa ku hlantswa ntsumbu ivi wu totiwa mafurha wu cheriwa ni swinyunyuteri wu nga si lahliwa. (Matewu 26:12; Mintirho 9:37) Hikwalaho, vadyondzisiwa va Yesu va fanele va wu hlantswile ntsumbu wakwe va nga si wu tsondzela hi tinguvu.

  3. Nguvu yo lahla vafi leyi nga hlayisiwa yi ni masalela ya lama kombisaka leswaku a yi phutsele ntsumbu wa munhu “eka tlhelo rin’we kasi eka tlhelo lerin’wana a ri petsiwile ivi ri phutsela ntsumbu ku suka enhlokweni ku ya ehansi hi hala nghoheni,” hi ku vula ka Encyclopædia Britannica.

    Leswi Bibele yi swi vulaka: Vadyondzisiwa va Yesu va vulavule hi rifu rakwe, hi ta sirha rakwe leri nga riki na nchumu ni hi timbhoni leti swi voneke hi mahlo ku nga vavasati lava voneke “singita ra tintsumi, leti vuleke leswaku wa hanya.” (Luka 24:15-24) Loko ku ri leswaku nguvu yoleyo yo lahla vafi ya le Turin a yi ri kona esirheni ra Yesu, vadyondzisiwa vakwe a va ta va va hlamuserile hambi ku ri ku hlamusela hi ta xifaniso ta masalela ya ngati ya ntsumbu lama nga eka yona. Kambe, Bibele a yi vuli nchumu hi sweswo.

Xana Nguvu Yoleyo Yo Lahla Vafi Yi Fanele Yi Xiximiwa?

Doo. Hambi ku ri leswaku yi tshame yi xiximiwile, a swi ta va swi hoxile. Xiya misinya ya milawu ya Bibele leyi hlamuselaka xivangelo xa kona.

  1. A hi swa nkoka. Yesu u te: “Xikwembu i Moya, naswona lava va xi gandzelaka va fanele ku gandzela hi moya ni ntiyiso.” (Yoh. 4:24) Vugandzeri bya ntiyiso a byi katsi ku tirhisiwa ka masalela ya swa vukhongeri kumbe swifaniso.

  2. Swi yirisiwile. Milawu ya Khume ya swi yirisa ku gandzela swifaniso. (Deteronoma 5:6-10) Hilaha ku fanaka, Bibele yi lerisa Vakreste yi ku: “Tivoneleni [eka] swifaniso.” (1 Yohane 5:21) Van’wana va nga ha vula leswaku nguvu yo lahla vafi a hi xikwembu xa hava kambe ko va xifaniso kumbe xikombiso xa leswi va swi pfumelaka eka vukhongeri bya vona. Hambiswiritano, xifaniso xi va xi ri xikwembu xa hava eka munhu loyi a xi xiximaka. * Hikwalaho, munhu la lavaka ku tsakisa Xikwembu a nge tinyiketeli kumbe ku xixima nchumu wihi ni wihi ku katsa ni nguvu yo lahla vafi.

^ par. 15 Xikwembu xa hava i xifaniso, nchumu lowu yimelaka swo karhi kumbe mfungho lowu tirhisiwaka ku gandzela ha wona.