Yohane 20:1-31
20 Hi siku ro sungula ra vhiki, Mariya Magadala u ye esirheni hi matakuxa,+ a fika a kuma ribye ri susiwile esirheni.+
2 Hiloko a tsutsuma a ya eka Simoni Petro loyi a a ri ni mudyondzisiwa loyi Yesu a a n’wi rhandza ngopfu,+ a fika a ku eka vona: “Va suse Hosi esirheni+ naswona a hi swi tivi leswaku va yi veke kwihi.”
3 Hiloko Petro ni mudyondzisiwa yoloye va ya esirheni.
4 Vadyondzisiwa lavambirhi va sungula ku tsutsuma, kambe mudyondzisiwa lowun’wana a tsutsuma a siya Petro a rhanga a fika esirheni.
5 A fika a korhama kutani a vona malapi ma ri ehansi,+ kambe a nga nghenanga.
6 Hiloko Simoni Petro a fika kutani a nghena endzeni ka sirha a fika a vona malapi lawa a ma ri kwalaho.
7 Lapi leri a ri tsondzele nhloko ya Yesu a ri songiwile ri vekiwa etlhelo.
8 Hiloko mudyondzisiwa lowun’wana loyi a fikeke ku sungula esirheni na yena a nghena kutani a vona a tlhela a tshemba leswi va byeriweke swona.
9 Hikuva a va nga si ri twisisa tsalwa leri vulaka leswaku u fanele a pfuxiwa eka lava feke.+
10 Hiloko vadyondzisiwa va tlhelela emakaya.
11 Kambe Mariya a yima ekusuhi ni sirha a rila. Loko a ri karhi a rila, a korhama a hlometela endzeni ka sirha,
12 hiloko a vona tintsumi timbirhi+ ti ambale swo basa ti tshame laha ntsumbu wa Yesu a wu vekiwe kona, yin’wana a yi tshame etinhlokweni kasi leyin’wana yi tshame hi le milengeni.
13 Hiloko ti ku eka yena: “Wansati, u rilela yini?” A ku eka tona: “Va teke Hosi ya mina naswona a ndzi swi tivi leswaku va yi veke kwihi.”
14 Loko a heta ku vula sweswo, a hundzuluka kutani a vona Yesu a yime kwalaho, kambe a a nga swi xiyi leswaku a ku ri Yesu.+
15 Yesu a ku: “Wansati, u rilela yini? U lava mani?” Leswi a a anakanya leswaku a ku ri mutirhi wa kwalaho, a ku: “Nkulukumba, loko u n’wi tekile ndzi byele laha u nga n’wi veka kona, ndzi ta ya ndzi ya n’wi teka.”
16 Yesu a ku: “Mariya!” Hiloko a hundzuluka a ku eka yena, hi Xiheveru: “Raboni!” (leswi vulaka “Mudyondzisi!”)
17 Yesu a ku: “Tshika ku ndzi namarhela hikuva a ndzi si tlhandlukela eka Tatana. Kambe famba u ya byela vamakwerhu+ u ku, ‘Ndzi tlhandlukela eka Tata+ wa mina loyi a nga Tata wa n’wina ni le ka Xikwembu xa mina+ lexi nga Xikwembu xa n’wina.’”
18 Mariya Magadala a fika a byela vadyondzisiwa a ku: “Ndzi vone Hosi!” A tlhela a va byela leswi Yesu a n’wi byeleke swona.+
19 Hi siku rero ro sungula ra vhiki, vadyondzisiwa va hlengeletana nimadyambu naswona ndhawu leyi a va ri eka yona a yi lotleriwile hileswi a va chava Vayuda. Kutani Yesu a fika a nghena a yima exikarhi ka vona a ku: “Onge mi nga va ni ku rhula.”+
20 Loko a heta ku vula sweswo a va komba mavoko ni tsheve.+ Kutani vadyondzisiwa va tsaka loko va vona Hosi.+
21 Yesu a tlhela a ku: “Onge mi nga va ni ku rhula.+ Ndza mi rhuma+ tanihi leswi na mina ndzi rhumiweke hi Tatana.”+
22 Loko a heta ku vula sweswo a va huhutela a ku: “Amukelani moya lowo kwetsima.+
23 Loko mi rivalela vanhu swidyoho swa vona va ta rivaleriwa; loko mi nga va rivaleli a va nge rivaleriwi.”
24 Kambe Tomasi+ un’wana wa lava 12, loyi a a vuriwa Hahla, a a nga ri na vona loko Yesu a humelela eka vona.
25 Loko vadyondzisiwa lavan’wana va n’wi byela va ku: “Hi vone Hosi!” A va hlamula a ku: “A ndzi nge tshembi handle ka loko ndzo vona timbhovo ta swipikiri emavokweni yakwe, ndzi nghenisa ritiho ra mina eka tona ndzi tlhela ndzi nghenisa ni voko ra mina etsheveni rakwe.”+
26 Endzhaku ka masiku ya nhungu, vadyondzisiwa vakwe va tlhela va hlengeletana endlwini naswona Tomasi a a ri na vona. Yesu a nghena, hambileswi tinyangwa a ti lotleriwile, hiloko a yima exikarhi ka vona a ku: “Onge mi nga va ni ku rhula.”+
27 Endzhaku ka sweswo a byela Tomasi a ku: “Nghenisa ritiho ra wena laha, u languta ni mavoko ya mina, u nghenisa ni voko ra wena etsheveni ra mina, u tshika ku kanakana, u kholwa.”
28 Tomasi a n’wi hlamula a ku: “Hosi yanga ni Xikwembu xanga!”
29 Yesu a ku: “Xana u tshemba hi leswi u ndzi voneke? Va tsaka lava tshembaka hambiloko va nga vonanga nchumu.”
30 Kahlekahle, Yesu u endle ni masingita man’wana yo tala emahlweni ka vadyondzisiwa vakwe, lawa ma nga tsariwangiki ebukwini* leyi.+
31 Kambe swilo leswi swi tsariwile leswaku mi ta tshemba leswaku Yesu i Kreste, N’wana wa Xikwembu naswona loko mi tshemba mi ta kuma vutomi hi vito rakwe.+
Tinhlamuselo ta le hansi
^ Ku nga buku ya xikhale leyi a yo songiwa kunene.
