Nghena endzeni

Hundzela eka leswi nga endzeni

1 Xikwembu A Xi Twisiseki—Xana I Ntiyiso?

1 Xikwembu A Xi Twisiseki—Xana I Ntiyiso?

 1 Xikwembu A Xi Twisiseki—Xana I Ntiyiso?

Leswi u nga ha vaka u swi twile: “Xikwembu xi endla mintirho ya xona hi tindlela leti nga twisisekiki.”

“Tatana la nga twisisekiki, N’wana la nga twisisekiki ni Moya wo Kwetsima lowu nga twisisekiki.”—Dyondzo ya Athanasius, yi hlamusela Vunharhu-un’we lebyi dyondzisiwaka hi tikereke to tala ta Vujagana.

Leswi Bibele yi swi dyondzisaka: Yesu u vule leswaku lava va ‘nghenisaka vutivi hi Xikwembu xi ri xin’we xa ntiyiso’ va ta kuma mikateko. (Yohane 17:3) Kambe, xana hi nga byi nghenisa njhani vutivi hi Xikwembu loko ku ri hileswaku a xi twisiseki? Ematshan’weni yo titumbeta, xi lava leswaku un’wana ni un’wana a xi tiva.—Yeremiya 31:34.

I ntiyiso leswaku a hi nge pfuki hi tive nchumu wun’wana ni wun’wana hi Xikwembu. Leswi swi fanerile hikuva miehleketo ni tindlela ta xona ti tlakuke ku tlula ta hina.—Eklesiasta 3:11; Esaya 55:8, 9.

Ndlela leyi ku tiva ntiyiso swi ku pfunaka ha yona: Loko ku ri leswaku vanhu a va nge xi twisisi Xikwembu, hikwalaho ka yini va tikarhatela ku xi tiva? Hambiswiritano, a xi endli ntsena leswaku hi kota ku xi twisisa, kambe xi tlhela xi endla leswaku hi kota ku hlakulela vuxaka lebyikulu na xona. Xikwembu xi hlamusele wanuna wo tshembeka Abrahama tanihi “nakulorhi,” naswona Hosi Davhida wa le Israyele u tsale a ku: “Lava va vaka ni xinakulobye na Yehovha hi lava va n’wi chavaka.”—Esaya 41:8; Pisalema 25:14.

Xana mhaka yo va ni vuxaka lebyikulu ni Xikwembu yi vonaka yi nga twisiseki? Kumbexana yi nga vonaka yi nga twisiseki eku sunguleni, kambe xiya leswi Mintirho 17:27 yi swi vulaka, yi ri: ‘Xikwembu a xi le kule ngopfu ni un’wana ni un’wana wa hina.’ Hi ndlela yihi? Hi ku tirhisa Bibele, Xikwembu xi hi nyika leswi hi swi lavaka ku endlela leswaku hi xi tiva kahle. *

Xi hi byela vito ra xona, ku nga Yehovha. (Esaya 42:8) EBibeleni xi hi byela ndlela leyi xi tirhisaneke ha yona ni vanhu leswaku hi ta kota ku tiva leswaku i Xikwembu xa muxaka muni. Ku tlula kwalaho, xi paluxa ndlela leyi xi titwaka ha yona hi hina. Xi ni ‘tintswalo ni nsovo, xi hlwela ku hlundzuka, xi tele musa wa rirhandzu ni ntiyiso.’ (Eksoda 34:6) Swiendlo swa hina swi nga khumba ndlela leyi xi titwaka ha yona. Hi xikombiso, tiko ra Israyele wa khale a ri xi “twisa ku vava” loko ri xi xandzukela, kambe loko lavo tlhariha va xi yingisa a va endla leswaku xi tsaka.—Pisalema 78:40; Swivuriso 27:11.

[Nhlamuselo ya le hansi]

^ par. 7 Leswaku u kuma rungula leri engetelekeke malunghana ni leswi Bibele yi swi vulaka hi Xikwembu, vona ndzima 1 ya buku leyi nge Xana Bibele Yi Dyondzisa Yini Hakunene? leyi kandziyisiweke hi Timbhoni ta Yehovha.

[Marito lama tshahiweke exihlokweni lama nga eka tluka 4]

Loko Xikwembu xi ri Vunharhu-un’we lebyi nga twisisekiki, xana hi nga xi tiva njhani?

[Laha Xifaniso Xi Humaka Kona eka tluka 4]

The Trinity c.1500, Flemish School, (16th century)/​H. Shickman Gallery, New York, USA/​The Bridgeman Art Library International