Nghena endzeni

Hundzela eka leswi nga endzeni

U Nga Kuma “Vutivi Bya Xikwembu”

U Nga Kuma “Vutivi Bya Xikwembu”

 Tshinela Eka Xikwembu

U Nga Kuma “Vutivi Bya Xikwembu”

YEHOVHA XIKWEMBU u endle leswaku swi koteka ku va hi kuma xuma naswona u lava leswaku hi xi kuma. Xuma lexi a xi hi tiseli rifuwo, kambe xi ta hi tisela nchumu lowu mali hinkwayo emisaveni yi nga ta ka yi nga wu xavi—ku nga ku rhula ka mianakanyo, ku eneriseka ni vutomi lebyi enerisaka. I yini xuma lexi? Marito ya Hosi Solomoni wo tlhariha lama tsariweke eka Swivuriso 2:1-6 ma hlamusela.

Solomoni u hlamusela xuma lexi tanihi “vutivi bya Xikwembu”—ku nga ntiyiso malunghana ni Xikwembu ni swikongomelo swa xona hilaha swi hlavuteriweke hakona eBibeleni. (Ndzimana 5) Ku ni timhaka to hlayanyana malunghana ni xuma lexi.

Tidyondzo ta ntiyiso. Bibele yi hlamula swivutiso swo tanihi leswi nge: Vito ra Xikwembu i mani? (Pisalema 83:18) Ku endleka yini loko munhu a fa? (Pisalema 146:3, 4) Ha yini hi ri laha? (Genesa 1:26-28; Pisalema 115:16) Tinhlamulo ta swivutiso leswi i ta nkoka swinene.

Ndzayo ya vutlhari. Bibele yi hi byela ndlela leyinene yo hanya. U nga endla njhani leswaku vukati byi va lebyi khomelelaka? (Vaefesa 5:28, 29, 33) Xana u nga va kurisa njhani vana hi ndlela leyi nga ta endla leswaku va va ni vutihlamuleri loko se va kurile? (Deteronoma 6:5-7; Vaefesa 6:4) Xana u nga wu kuma njhani ntsako evuton’wini? (Matewu 5:3; Luka 11:28) Xana u ehleketa yini—hi yihi ndzayo ya nkoka leyi tshembekaka etimhakeni teto?

Ku twisisa ntumbuluko ni vumunhu bya Xikwembu. Bibele i xihlovo lexikulu xa rungula leri pakanisaka malunghana ni Xikwembu. Xana xi njhani? (Yohane 1:18; 4:24) Xana xa khathala hi hina? (1 Petro 5:6, 7) Hi tihi timfanelo tin’wana ta xona to hlawuleka? (Eksoda 34:6, 7; 1 Yohane 4:8) Xana u nga vula leswaku rungula leri nga ntiyiso malunghana ni Muvumbi wa hina ri ni ntikelo wo tanihi kwihi?

Hakunene “vutivi bya Xikwembu” i xuma xo fanekisela. Xana u nga xi kuma njhani? Swivuriso ndzima 2 ndzimana 4 yi nga ku pfuna ku kuma nhlamulo, leyi eka yona Solomoni a fanisaka vutivi lebyi ni “xuma lexi fihliweke.” Anakanya hileswi: Xuma lexi fihliweke a xi nge suki laha xi fihliweke kona kutani xi ti yisa eka munhu. Hi fanele hi tirha hi matimba leswaku hi xi kuma. Sweswo swi tano hi vutivi bya Xikwembu. Entiyisweni, xuma lexi xi fihliwe eBibeleni. Leswaku hi xi kuma, hi fanele hi endla matshalatshala.

Solomoni u hlamusela leswi hi faneleke hi swi endla leswaku hi kuma “vutivi bya Xikwembu.” Marito lama nge “amukela marito ya mina” ni lama nge “voyamisela mbilu ya wena” ma kombisa leswaku hi fanele hi va ni mbilu leyinene. (Tindzimana 1, 2) Marito lama nge “vitana” ni lama nge “ku lavisisa” ma kombisa leswaku hi fanele hi tirhisa nkarhi wa hina. (Tindzimana 3, 4) Kutani leswaku hi kuma xuma, hi fanele hi hisekela ku hlaya Bibele naswona sweswo hi swi endla hi timbilu ta hina hinkwato.—Luka 8:15.

Loko hi endla tano, Yehovha u ta hi pfuna ku kuma xuma. Ndzimana 6 yi ri: “Yehovha u nyika vutlhari.” Mpfuno wa Xikwembu hi wona ntsena lowu nga hi pfunaka leswaku hi kota ku twisisa ntiyiso lowu nga eBibeleni. (Yohane 6:44; Mintirho 16:14) Hikwalaho ka leswi u nga tiyiseka leswaku loko u lavisisa eRitweni ra Xikwembu hi mbilu hinkwayo, u ta kuma “vutivi bya Xikwembu”—ku nga xuma lexi nga ta antswisa vutomi bya wena hi mpimo lowukulu.—Swivuriso 2:10-21. *

Tindzimana ta Bibele leti u nga ti hlayaka hi October:

Swivuriso 1-21

[Nhlamuselo ya le hansi]

^ par. 10 Timbhoni ta Yehovha emisaveni hinkwayo ti fambisa dyondzo ya le kaya ya Bibele ya mahala eka lava lavaka ku twisisa Bibele. Ha yini u nga tihlanganisi ni Timbhoni ta laha u tshamaka kona kumbe u titsalela eka adirese leyi faneleke eka leti xaxametiweke eka tluka 4?