Nghena endzeni

Hundzela eka leswi nga endzeni

2 Xikwembu A Xi Khathali Hakunene—Xana I Ntiyiso?

2 Xikwembu A Xi Khathali Hakunene—Xana I Ntiyiso?

 2 Xikwembu A Xi Khathali Hakunene—Xana I Ntiyiso?

Leswi u nga ha vaka u swi twile: “Loko ku ri hileswaku hakunene Xikwembu xa khathala hi vanhu, kutani a xi ta herisa vubihi ni ku xaniseka emisaveni. Hambiloko xi khathala hi vanhu, a xi khathali hi leswi ndzi humelelaka.”

Leswi Bibele yi swi dyondzisaka: Yehovha Xikwembu a nga vangi vubihi. (Yakobo 1:13) Tanihi leswi a nga herisaka vubihi nkarhi wun’wana ni wun’wana, u pfumelela vanhu lava nga tshembekiki leswaku va va kona sweswi ku endlela leswaku a lulamisa timhaka leti tlakusiweke eku sunguleni ka matimu ya munhu. Eku heteleleni, u ta pfuna vanhu vakwe naswona u ta herisa maxangu hinkwawo lama vangiwaka hi vanhu lava alaka vulawuri byakwe.—Genesa 3:1-6; Esaya 65:17. *

Handle ko khathala hi vanhu va xona hi ku angarhela, Xikwembu xi rhandza un’wana ni un’wana wa hina. Matewu 10:29-31 yi kombisa leswaku xi vona vuxokoxoko bya hina hambi ku ri lebyi hi nga byi tiviki, yi ri: “Xana swindzingiri swimbirhi a swi xavisiwi hi mali ya nsimbi ya risima leritsongo ke? Kambe ku hava ni xin’we xa swona lexi nga waka ehansi Tata wa n’wina a nga swi tivi. Hambi ku ri misisi ya tinhloko ta n’wina yi hlayiwile hinkwayo. Hikokwalaho mi nga chavi: mi ni risima ku tlula swindzingiri swo tala.”

Ndlela leyi ku tiva ntiyiso swi ku pfunaka ha yona: Hakanyingi ha va papalata vanhu lava karihaka kumbe lava nga khathaliki. A swi hlamarisi leswi mavunwa ya leswaku Xikwembu a xi khathali ma endlaka vanhu vo tala va papalata ku nga xi tivi hi ku helela kumbe va tshinela eka xona loko va vona onge a ku na lexi va nga xi endlaka. Ku tiva leswaku Yehovha Xikwembu wa khathala hakunene swi nga ku susumetela leswaku u lava ku dyondza leswi engetelekeke ha yena naswona u aka vuxaka na yena.

Hi xikombiso, u nga ha va u khongele eka Xikwembu kambe u tivutisa loko xi ku yingisa kumbe loko xi ta hlamula swikhongelo swa wena. Bibele ya hi tiyisekisa leswaku “Mutwi wa xikhongelo” u tshama a lunghekele ku vulavurisana ni vanhu hinkwavo lava tshinelaka eka yena hi timbilu ta vona hinkwato hi xikhongelo.—Pisalema 65:2.

Xikwembu xi ku rhamba leswaku u ‘lahlela ku vilela hinkwako ka wena eka xona, hikuva xa ku khathalela.’ (1 Petro 5:7) Hi nga tshembela eka xona hambi eminkarhini ya maxangu lamakulu, hikuva Rito ra xona ri ri: “Yehovha u le kusuhi ni lava va tshovekeke mbilu; ni lava va pfotlokeke emoyeni wa va ponisa.”—Pisalema 34:18.

[Nhlamuselo ya le hansi]

^ par. 3 Leswaku u kuma rungula leri engetelekeke malunghana ni leswaku ha yini Xikwembu xi pfumelela ku xaniseka, vona ndzima 11 ya buku leyi nge Xana Bibele Yi Dyondzisa Yini Hakunene?

[Marito lama tshahiweke exihlokweni lama nga eka tluka 5]

Loko ku ri hileswaku Xikwembu a xi khathali, ha yini xi hi rhamba leswaku hi khongela eka xona?