Nghena endzeni

Hundzela eka leswi nga endzeni

Xana Yesu I Mikayele Ntsumi Leyikulu?

Xana Yesu I Mikayele Ntsumi Leyikulu?

 Swivutiso Swa Vahlayi . . .

Xana Yesu I Mikayele Ntsumi Leyikulu?

▪ Hi ku komisa, nhlamulo i ina. Mukhuva wo va munhu a vitaniwa hi mavito yo tlula rin’we wu tolovelekile eka mindhavuko yo tala. Swi tano ni hi vanhu lava ku vulavuriwaka ha vona eBibeleni. Hi xikombiso, kokwa wa hina Yakobe na yena a a vitaniwa Israyele. (Genesa 35:10) Muapostola Petro u vitaniwa hi mavito ya ntlhanu lama nga faniki—Samiyoni, Simoni, Petro, Khefasi na Simoni Petro. (Matewu 10:2; 16:16; Yohane 1:42; Mintirho 15:7, 14) Hi nga tiyiseka njhani leswaku Mikayele i vito rin’wana ra Yesu? Xiya vumbhoni lebyi landzelaka lebyi nga eMatsalweni.

Bibele yi ni tindzimana ta ntlhanu leti vulavulaka hi xivumbiwa xa moya lexi nga ni matimba, ku nga Mikayele. Tinharhu ta tona ti kumeka ebukwini ya Daniyele. Eka Daniyele 10:13, 21, hi hlaya leswaku ntsumi leyi a yi nyikiwe xiavelo xo karhi yi ponisiwe hi Mikayele, loyi a vitaniwaka “un’wana wa tihosana leti tlakukeke” tlhelo “hosana ya n’wina.” Nakambe eka Daniyele 12:1 hi dyondza leswaku enkarhini wa makumu “Mikayele u ta yima, hosana leyikulu leyi yi yimelaka vana va vanhu va wena.”

Vito leri nge Mikayele ri tlhela ri humelela eka Nhlavutelo 12:7, leyi hlamuselaka “Mikayele ni tintsumi ta yena” tanihi leti lwaka nyimpi ya nkoka leyi eka yona ku hlongoriwaka Sathana Diyavulosi ni tintsumi takwe to homboloka etilweni.

Xiya leswaku eka swiendlakalo swin’wana ni swin’wana leswi boxiweke laha henhla, Mikayele u kombisiwa tanihi ntsumi leyi nga nhenha leyi lwelaka vanhu va Xikwembu ni ku va sirhelela, hambi ku ri ku lwa ni nala lonkulu wa Yehovha, ku nga Sathana.

Yudha ndzimana 9 yi vula leswaku Mikayele i “ntsumi leyikulu.” Xirhangi lexi nge “leyikulu” xi vula “mulawuri-nkulu” kumbe “hosi” naswona rito leri nge “ntsumi leyikulu” a ri si tshama ri tirhisiwa ri ri eka vunyingi eBibeleni. Ndzimana yin’wana leyi eka yona ku boxiwaka xiga lexi nge ntsumi leyikulu yi le ka 1 Vatesalonika 4:16, leyi eka yona Pawulo a hlamuselaka ku pfuxiwa ka Yesu, hi ku vula a ku: “Hosi hi yoxe yi ta xika hi le tilweni hi rito ro lerisa, hi rito ra ntsumi leyikulu ni hi mhalamhala ya Xikwembu.” Kutani Yesu Kreste u hlamuseriwa tanihi ntsumi leyikulu, ntsumi leyi nga hosi.

Hi ku ya hi leswi nga laha henhla, hi nga gimeta hi ku yini? Hi nga vula leswaku Yesu Kreste i Mikayele ntsumi leyikulu. Mavito lawa hamambirhi—Mikayele (leri vulaka leswaku “I Mani La Fanaka Ni Xikwembu?” na Yesu (leri vulaka leswaku “Yehovha I Muponisi”)—ma kombetela entirhweni wakwe wo rhangela ehansi ka vuhosi bya Xikwembu. Vafilipiya 2:9 yi ri: ‘Xikwembu xi tlakuse Yesu la kwetsimisiweke exiyin’weni lexi tlakukeke kutani hi musa xi n’wi nyika vito leri nga ehenhla ka mavito man’wana hinkwawo.’

I swa nkoka ku xiya leswaku Yesu a a ri kona emahlweni ko va a velekiwa tanihi munhu wa nyama. Loko Yesu a nga si velekiwa, Mariya u endzeriwe hi ntsumi leyi n’wi byeleke leswaku u ta tikisiwa hi moya lowo kwetsima nileswaku n’wana loyi a nga ta n’wi veleka u fanele a n’wi thya vito ra Yesu. (Luka 1:31) Hi nkarhi wa vutirheli byakwe, Yesu a a tala ku vulavula hi ta loko a nga si ta laha misaveni.—Yohane 3:13; 8:23, 58.

Kutani Mikayele ntsumi leyikulu i Yesu loko a nga si va munhu wa nyama. Endzhaku ka loko a pfuxiwile kutani a tlhelela etilweni, u ye emahlweni ni ntirho wakwe wo tirha tanihi Mikayele, ntsumi leyikulu, leswaku “ku vangamisiwa Xikwembu Tatana.”—Vafilipiya 2:11.