Nghena endzeni

Hundzela eka leswi nga endzeni

Leswi Yesu A Swi Dyondziseke Hi Mfumo Wa Xikwembu

Leswi Yesu A Swi Dyondziseke Hi Mfumo Wa Xikwembu

 Leswi Yesu A Swi Dyondziseke Hi Mfumo Wa Xikwembu

“A famba hi muti ni muti ni hi ximutana ni ximutana, a chumayela . . . mahungu lamanene ya mfumo wa Xikwembu.”—LUKA 8:1.

HI RHANDZA ku vulavula hi swilo leswi nga swa nkoka eka hina ni leswi hi swi rhandzaka. Yesu u te: “Nomu wu vulavula leswi mbilu yi taleke swona.” (Matewu 12:34) Loko hi xiya swilo leswi Yesu a vulavuleke ha swona hi nkarhi wa vutirheli byakwe, hi nga swi vona leswaku Mfumo wa Xikwembu a wu ri wa nkoka eka yena.

I yini Mfumo wa Xikwembu? Mfumo i hulumendhe leyi rhangeriwaka hi hosi. Kutani Mfumo wa Xikwembu i hulumendhe leyi simekiweke hi Xikwembu. Yesu u vulavule ngopfu hi Mfumo wa Xikwembu naswona a ku ri wona nhloko-mhaka ya rungula rakwe. Eka tibuku ta mune ta Tievhangeli, tindhawu leti eka tona ku vulavuriwaka hi Mfumo ti tlula 110. Kambe Yesu a a nga dyondzisi hi marito ntsena. Swiendlo swakwe swi dyondzise vanhu swilo swo tala hi Mfumo wa Xikwembu ni leswi wu nga ta swi endla enkarhini lowu taka.

I mani Hosi ya wona? Hosi ya Mfumo wa Xikwembu a yi hlawuriwanga hi vanhu. Yi hlawuriwe hi Xikwembu. Loko Yesu chumayela u swi veke erivaleni leswaku u hlawuriwe hi Xikwembu leswaku a va Hosi.

Yesu a a byi tiva vuprofeta bya Bibele lebyi vuleke ka ha ri emahlweni leswaku Mesiya la tshembisiweke u ta va Hosi eMfun’weni lowu nga heriki. (2 Samuwele 7:12-14; Daniyele 7:13, 14; Matewu 26:63, 64) Tsundzuka leswaku Yesu a swi n’wi chavisanga ku vula leswaku hi yena Mesiya loyi vuprofeta byi vulavuleke ha yena. Hi ndlela yoleyo a a pfumela leswaku i Hosi leyi vekiweke hi Xikwembu. (Yohane 4:25, 26) Kutani a swi hlamarisi leswi Yesu a tirhiseke xiga lexi nge “mfumo wa mina” minkarhi yo hlayanyana.—Yohane 18:36.

Yesu u tlhele a dyondzisa leswaku ku ta va ni vanhu lava a nga ta fuma na vona eMfun’weni wolowo. (Luka 22:28-30) Vafumi-kulobye volavo u va vitane “ntlhambinyana” hikuva nhlayo ya vona yi pimiwile. U vule leswi ha vona: “Tata wa n’wina u tsakele ku mi nyika mfumo.” (Luka 12:32) Buku yo hetelela ya Bibele yi kombisa leswaku ku ta va ni vanhu va 144 000 lava nga ta va ni lunghelo ro fuma na Kreste.—Nhlavutelo 5:9, 10; 14:1.

Mfumo lowu wu kwihi? Yesu u byele Pontiyo Pilato mufumi wa Rhoma a ku: “Mfumo wa mina a hi xiphemu xa misava leyi.” (Yohane 18:36) Mfumo wa Xikwembu lowu rhangeriweke hi Kreste a wu nge fumi hi ku tirhisana ni vanhu. Minkarhi yo tala loko Yesu a vulavula hi Mfumo wa Xikwembu u vule leswaku i “mfumo wa matilo.” * (Matewu 4:17; 5:3, 10, 19, 20) Hikokwalaho, Mfumo wa Xikwembu i hulumendhe ya le tilweni.

Yesu a a swi langutele hi mahlo-ngati ku tlhelela etilweni loko a heta ntirho wakwe wa laha misaveni.  U vule leswaku loko a ya etilweni u ya “lunghisela [vafumi-kulobye] ndhawu” leswaku va ta fuma na yena.—Yohane 14:2, 3.

I yini leswi Mfumo lowu wu nga ta swi hetisisa? Yesu u dyondzise vayingiseri vakwe leswaku loko va khongela eka Xikwembu va fanele va ku: “Mfumo wa wena a wu te. Ku rhandza ka wena a ku endleke emisaveni, hilaha ku endlekaka hakona etilweni.” (Matewu 6:9, 10) Ku rhandza ka Xikwembu ka endleka etilweni. Xikwembu xi ta tirhisa Mfumo wa xona leswaku xi hetisisa xikongomelo xa xona hi misava. Leswaku sweswo swi endleka, Mfumo wu ta endla leswaku ku va ni ku cinca lokukulu laha misaveni.

I yini leswi Mfumo lowu wu nga ta swi endla laha misaveni? Yesu u dyondzise leswaku Mfumo wa Xikwembu wu ta herisa vubihi hi ku lovisa vanhu lava endlaka swilo swo homboloka. (Matewu 25:31-34, 46) Leswi swi ta vula leswaku vukanganyisi ni vubihi swi ta va se swi helele makumu. U tlhele a dyondzisa leswaku misava yi ta tala hi vanhu lava nga ni “moya wo rhula,” lava lulameke, lava nga ni tintswalo, “lavo tenga embilwini” ni lava nga ni ku rhula.—Matewu 5:5-9.

Xana vanhu volavo vo tshembeka va ta tshama emisaveni leyi thyakeke? Nikatsongo! Yesu u tshembise leswaku ku ta va ni ku cinca lokukulu loko Mfumo wa Xikwembu se wu fuma. Wanuna loyi a a beleriwe etlhelo ka Yesu u te: “Yesu, u ndzi tsundzuka loko u nghena emfun’weni wa wena.” Loko Yesu a n’wi hlamula u te: “Ndzi tiyisile namuntlha ndzi ri eka wena, U ta va na mina eParadeyisini.” (Luka 23:42, 43) Mfumo wa Xikwembu wu ta hundzula misava leyi yi va paradeyisi leyi fanaka ni leyi tshameke yi va kona entangeni wa Edeni.

I yini swin’wana leswi Mfumo lowu wu nga ta va endlela swona vanhu? Yesu a nga lo tshembisa ntsena, kambe u endle swilo swo tala leswi Mfumo wa Xikwembu wu nga ta swi endla. U hanyise vanhu vo tala hi singita, xisweswo a kombisa leswi a nga ta swi endla enkarhini lowu taka hi  nkarhi wa ku fuma ka Mfumo wakwe. Rungula ra Evhangeli leyi huhuteriweke, loko ri vulavula hi Yesu ri ri: “Kutani a rhendzeleka ni tiko hinkwaro ra Galeliya, a dyondzisa emasinagogeni ya vona ni ku chumayela mahungu lamanene ya mfumo ni ku herisa swifo swa mixaka hinkwayo ni vulema bya mixaka hinkwayo evanhwini.”—Matewu 4:23.

Yesu u tshungule mavabyi yo hambana-hambana. U “pfule mahlo ya loyi a velekiweke a fe mahlo.” (Yohane 9:1-7, 32, 33) U hanyise wanuna loyi a a ri ni vuvabyi lebyi nyenyetsaka bya nhlokonho hi ku n’wi khumba ntsena. (Marka 1:40-42) Loko “munhu la feke tindleve naswona a ri ni rihika ra ku vulavula” a tisiwa eka yena, u kombise leswaku a nga swi kota ku endla leswaku ‘lava feke tindleve va twa ni lava nga vulavuriki va vulavula.’—Marka 7:31-37.

Hi hala tlhelo, Hosi leyi vekiweke hi Xikwembu yi ni matimba yo pfuxa vanhu lava feke. Eka swiendlakalo swinharhu, Yesu u pfuxe vafi. U pfuxe n’wana wa noni loyi a tswariweke a ri swakwe, xinhwanyetana xa malembe ya 12 ni munghana wakwe Lazaro.—Luka 7:11-15; 8:41-55; Yohane 11:38-44.

Loko a hlamusela vumundzuku lebyinene lebyi nga ta kumiwa hi vanhu lava nga ta fumiwa hi Mfumo wa Xikwembu, Yesu u profete hi ku tirhisa muapostola Yohane a ku: “Waswivo! Ntsonga wa Xikwembu wu le vanhwini, xi ta tshama na vona, naswona vona va ta va vanhu va xona. Xikwembu hi xiviri xi ta va na vona. Kutani xi ta sula mihloti hinkwayo ematihlweni ya vona, rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona. Swilo swo sungula swi hundzile.” (Nhlavutelo 1:1; 21:3, 4) Ehleketa leswaku vutomi byi ta va byi ri njhani emisaveni leyi eka yona vanhu va nga ta humesa mihloti ya ntsako, va nga ri na xitlhavi naswona va nga ha fi! Kutani xikhongelo xa leswaku ku rhandza ka Xikwembu ku endleka emisaveni hilaha ku endlekaka hakona etilweni xi ta hetiseka.

Xana Mfumo wa Xikwembu wu ta ta rini? Yesu u dyondzise leswaku u ta sungula ku fuma hi nkarhi lowu a wu vitaneke “vukona” byakwe. Yesu u nyikele vuxokoxoko byo tala malunghana ni vuprofeta lebyi a byi ta kombisa ku fuma kakwe tanihi Hosi. Nkarhi wolowo a wu ta vonaka hi ku va misava hinkwayo yi va ni swiphiqo swo tanihi tinyimpi, vusweti, ku tsekatseka ka misava, mintungu ni ku engeteleka ka ku kala nawu. (Matewu 24:3, 7-12; Luka 21:10, 11) Swiphiqo sweswo ni swin’wana leswi Yesu a profeteke ha swona swi sungule ku vonaka hi 1914, ku nga lembe leri Nyimpi yo Sungula ya Misava yi nga sungula ha rona. Nilokoswiritano, sweswi Yesu u fuma tanihi Hosi. Ku nga ri khale Mfumo wolowo wu ta ta laha misaveni naswona wu ta endla leswaku ku rhandza ka Xikwembu ku endleka eka yona. *

Xana ku ta ka Mfumo wa Xikwembu swi vula yini eka wena? Sweswo swi titshege hileswaku u angula njhani eka rungula ra Yesu.

[Tinhlamuselo ta le hansi]

^ par. 8 Xiga lexi nge “mfumo wa matilo” xi humelela minkarhi ya kwalomu ka 30 eka Evhangeli ya Matewu.

^ par. 17 Leswaku u kuma vuxokoxoko lebyi engetelekeke bya ndlela leyi hi swi tivaka ha yona leswaku Mfumo wa Xikwembu wu tshinele, vona ndzima 9 leyi nga ni nhloko-mhaka leyi nge, “Xana Hi Hanya ‘eMasikwini Yo Hetelela’?” eka buku leyi nge Xana Bibele Yi Dyondzisa Yini Hakunene? leyi kandziyisiweke hi Timbhoni ta Yehovha.