1, 2. Yesu u swi kombise njhani leswaku u va rhandza ngopfu vanhu?

N’WANA wa mativula wa Xikwembu i xikombiso lexikulu xa vutlhari lebyi hlamarisaka bya Yehovha naswona a a ri “mutirhi la nga ni vuswikoti” wa Tata wa yena. Anakanya ndlela leyi Yesu a a tsake ha yona a tlhela a eneriseka loko Tata wakwe a “lunghiselela matilo” a tlhela a “simeka masungulo ya misava.” Kambe eka swilo hinkwaswo leswi Tata wakwe a swi vumbeke, Yesu ‘a a rhandza vana va vanhu swinene.’ (Swivuriso 8:22-31) U rhandze vanhu ku sukela loko va vumbiwile.

² Hi ku famba ka nkarhi, Yesu u kombise leswaku wa tshembeka eka Tata wakwe naswona wa n’wi rhandza, nileswaku u va rhandza swinene vanhu hinkwavo loko hi ku swi rhandza a sukela tilo kutani a ta laha misaveni a ta va munhu wa nyama. Yesu u endle sweswo hikwalaho ka rirhandzu leswaku a ta nyikela hi vutomi byakwe byi va “nkutsulo wa lavo tala.” (Matewu 20:28; Vafilipiya 2:5-8) Loko Yesu a ri laha misaveni, Xikwembu xi n’wi nyike matimba ya ku endla masingita. Masingita wolawo ma paluxa ndlela leyi Yesu a va rhandzaka ha yona vanhu ma tlhela ma kombisa swilo leswinene leswi a nga ta swi endlela vanhu ku nga ri khale.

3. Hi ta bula hi yini exihlokweni lexi?

 ³ Loko Yesu a ha ri laha misaveni u chumayele “mahungu lamanene ya mfumo wa Xikwembu.” (Luka 4:43) A a swi tiva leswaku Mfumo wolowo wu ta kwetsimisa vito ra Tata wakwe ni leswaku wu ta swi herisela makumu swiphiqo swa vanhu. Yesu u endle masingita yo tala loko a ri karhi a chumayela. Masingita lawa a ma endleke ma kombise ndlela leyi a khathalaka swinene ha yona hi vanhu hinkwavo. Ha yini sweswo swi fanele swi va swa nkoka eka hina? Hikuva leswi a swi endleke swi hi nyika ntshembo hi vumundzuku. Hikwalaho a hi buleni hi masingita ya mune lama endliweke hi Yesu.

4. Ku humelele yini loko Yesu a kume wanuna loyi a a ri ni nhlokonho?

⁴ Loko Yesu a endla vutirheli byakwe u ye endhawini leyi vuriwaka Galeliya. Eka wun’wana wa miti ya kwalaho, u kume wanuna loyi a a ri ni vuvabyi lebyi chavisaka bya nhlokonho. (Marka 1:39, 40) Vuvabyi bya wanuna loyi a a byi tike swinene lerova Luka, loyi a a ri dokodela, u vule leswaku a a ‘tele nhlokonho.’ (Luka 5:12) Bibele yi vula leswaku loko wanuna loyi la vabyaka a vona Yesu, u “[we] hi xikandza xa yena a n’wi kombela, a ku: ‘Hosi, loko u swi lava, u nga ndzi basisa.’” Wanuna loyi a a swi tiva leswaku Yesu a a ri ni matimba yo n’wi horisa, kambe a a lava ku tiva leswaku Yesu a a swi lava ku n’wi horisa. Ha yini? Hikuva wanuna loyi a a tolovele Vafarisi, lava a va va langutela ehansi vanhu lava a va ri ni nhlokonho. Kambe Yesu a a anakanya yini? A a ta n’wi khoma njhani wanuna loyi, loyi swi nga ha endlekaka leswaku a a lamale swinene? Xana wena a wu ta va u endle yini?

5. Ha yini Yesu a a lava ku horisa wanuna loyi a a ri ni nhlokonho?

⁵ Swi tikomba wanuna loyi la vabyaka a nga huwelelanga a ku, “A ndzi tenganga, a ndzi tenganga,” hilaha Nawu lowu nyikiweke Muxe a wu lava a endla hakona. (Levhitika 13:43-46) Kambe Yesu a nga hlundzukanga. Ku ri na sweswo, a a khathala hi wanuna loyi naswona a a lava ku n’wi pfuna. A hi swi tivi leswaku Yesu a a anakanya yini, kambe ha yi tiva ndlela leyi a a titwa ha yona. U n’wi twele vusiwana swinene wanuna loyi lerova a endla singita. U khumbe wanuna loyi, ku nga nchumu lowu a ku nga ri na munhu un’wana loyi a a ta wu endla. Hi ku tiyiseka ni hi ntwelavusiwana, Yesu u byele wanuna loyi a ku: “Ndza swi lava. Basisiwa.” Hiloko “nhlokonho yi nyamalala eka yena.” (Luka 5:13) Swi le rivaleni leswaku Yehovha u nyike Yesu matimba yo endla singita leri lerikulu ni ku kombisa ndlela leyi a va rhandzaka ha yona vanhu.—Luka 5:17.

6. I yini lexi tsakisaka hi masingita lama endliweke hi Yesu, naswona ma kombisa yini?

⁶ Yesu u kote ku endla masingita yo tala lama hlamarisaka hikwalaho ka matimba lawa a ma nyikiweke hi Xikwembu. A nga hanyisanga vanhu lava a va ri ni nhlokonho ntsena. Yesu u horise ni vanhu lava a va ri ni mavabyi yo hambanahambana. Bibele yi hi byela leswaku vanhu va hlamarile loko va “vona timbheveve ti vulavula ni lava khutaka va famba ni lava feke mahlo va vona.” (Matewu 15:31) Loko Yesu a horisa munhu, a a nga boheki ku kombela munhu un’wana la hanyeke kahle leswaku a nyikela hi swirho swa yena. Yesu a a ri ni matimba yo horisa swirho swa miri leswi nga hanyangiki kahle. Naswona vanhu a va hola hi nkarhi lowu a va horisiwa ha wona, minkarhi yin’wana u horise ni lava a va nga ri ekusuhi na yena. (Yohane 4:46-54) Swikombiso leswi leswi hlamarisaka swi kombisa yini? Swi kombisa leswaku Hosi ya hina Yesu Kreste u ni matimba yo byi herisela makumu vuvabyi hinkwabyo naswona wa swi navela ku byi herisa. Loko hi  dyondza hi ndlela leyi Yesu a va khomeke ha yona vanhu, hi ta khorwiseka leswaku emisaveni leyintshwa u “ta va ni nsovo eka loyi a pfumalaka ni loyi a nga xisiwana.” (Pisalema 72:13) Leswi Yesu a swi lavaka, u ta horisa vanhu hinkwavo lava xanisekaka.

7, 8. Hlamusela leswi humeleleke loko Yesu a nga si hlangana ni wanuna la vabyaka eBetesda.

⁷ Endzhaku ka tin’hweti to hlayanyana a horise wanuna wa nhlokonho, Yesu u suke eGaleliya a ya eYudiya laha a yeke emahlweni a chumayela mahungu lamanene ya Mfumo wa Xikwembu. Ku fanele ku ve ni magidi ya vanhu lava tweke rungula ra Yesu ni lava khumbiweke hi ndlela leyi a a va rhandza ha yona. Yesu a a swi lava hakunene ku chavelela swisiwana ni lava tshikileriweke a tlhela a va nyika ntshembo.—Esaya 61:1, 2; Luka 4:18-21.

⁸ Hi n’hweti ya Nisani, Yesu u ye eYerusalema leswaku a ya tlangela Paseka. Emutini wolowo a ku pfumala ni vuphelo bya marha tanihi leswi vanhu a va ta enkhubyeni wo hlawuleka. En’walungwini wa tempele a ku ri ni xidziva lexi a xi vuriwa Betesda, naswona loko Yesu a fika kwalaho u kume wanuna loyi a a nga swi koti ku famba.

9, 10. (a) Ha yini vanhu a va ya exidziveni xa Betesda? (b) Yesu u endle yini exidziveni xolexo, naswona sweswo swi hi dyondzisa yini? (Vona xifaniso lexi nga eku sunguleni ka xihloko lexi.)

⁹ Vanhu vo tala lava a va vabya a va ya eBetesda. Ha yini? Hikuva a va anakanya leswaku munhu la vabyaka a a ta hanyisiwa hi singita loko a nghena exidziveni loko mati ma pfindluka. Anakanya hasahasa leyi a yi va kona leswi a ku ri ni vanhu vo tala lava a va nga ha ri na ntshembo ni lava a va karhatekile, lava a va lava ku hanyisiwa. Yesu a a hetisekile naswona a a nga lavi ku hanyisiwa, kambe a a ya lava yini kwalaho? U ye kwalaho hileswi a a rhandza vanhu. Naswona loko a fika kwalaho u hlangane ni wanuna loyi a a ri ni malembe yo tala a ri karhi a vabya, yo tlula lawa Yesu a a ma hanyile laha misaveni.—Hlaya Yohane 5:5-9.

¹⁰ Yesu u vutise wanuna loyi loko a swi lava ku tlhela a famba. Anakanya gome leri wanuna loyi a a ri na rona loko a byela Yesu leswaku a a swi lava ku hanyisiwa kambe a swi nga koteki, hikuva a ku nga ri na munhu wo n’wi nghenisa exidziveni. Endzhaku ka sweswo Yesu u byele wanuna loyi leswaku a endla swilo leswi a swi nga koteki. U n’wi byele leswaku a teka rihlaka rakwe a famba. Hikwalaho wanuna loyi u teke rihlaka rakwe kutani a sungula ku famba. Singita leri i vumbhoni lebyi tsakisaka bya leswi Yesu a nga ta swi endla emisaveni leyintshwa. Ri tlhela ri kombisa leswaku Yesu u va rhandza swinene vanhu. U fambe a lava vanhu lava a va lava ku pfuniwa. Xikombiso xa Yesu xi fanele xi hi khutaza ku ya emahlweni hi lavisisa vanhu va le nsin’wini ya hina lava tshikilelekeke hikwalaho ka swilo swo biha leswi humelelaka emisaveni leyi.

11. Marka 5:25-34 yi swi kombisa njhani leswaku Yesu a a va rhandza vanhu lava a va vabya?

¹¹ Hlaya Marka 5:25-34. Wansati un’wana a a ri ni malembe ya 12 a khomiwe hi vuvabyi lebyi khomisaka tingana. Vuvabyi bya yena a byi khumbe xin’wana ni xin’wana lexi a a xi endla evuton’wini, ku katsa ni vugandzeri byakwe. U ye eka madokodela yo tala naswona a a  tirhise mali yakwe hinkwayo a lava ku hanyisiwa, kambe ematshan’weni ya sweswo u lo nyanya. Siku rin’wana, wansati loyi u anakanye hi kungu rin’wana ra leswaku a hola, hiloko a nghena exikarhi ka ntshungu wa vanhu ivi a khumba nguvu ya Yesu. (Levhitika 15:19, 25) Loko Yesu a xiye leswaku ku ni matimba lama nga huma eka yena, u vutisile leswaku i mani la nga n’wi khumba. Wansati loyi u “[wele] ehansi emahlweni ka yena kutani a n’wi byela ntiyiso hinkwawo” a ‘tshukile naswona a rhurhumela.’ Yesu a a swi tiva leswaku i Yehovha la hanyiseke wansati loyi, hikwalaho u vulavule na yena hi musa a ku: “N’wananga, ripfumelo ra wena ri ku hanyisile. Famba hi ku rhula, naswona u hanya swinene evuvabyini bya wena bya khombo.”

12. (a) Eka leswi se hi swi dyondzeke, u nga n’wi hlamusela njhani Yesu? (b) Yesu u hi vekele xikombiso xihi?

¹² Swa hi tsakisa swinene ku vona ndlela leyi Yesu a a va rhandza ha yona vanhu, ngopfungopfu lava a va vabya. U hambane swinene na Sathana loyi a ringetaka ku hi khorwisa leswaku a hi pfuni nchumu ni leswaku a ku na munhu la hi rhandzaka. Hambiswiritano, masingita lama endliweke hi Yesu ma kombise leswaku u ni mhaka na hina ni swiphiqo swa hina. Ha swi tlangela swinene leswi hi nga ni Hosi tlhelo Muprista Lonkulu la nga ni rirhandzu! (Vaheveru 4:15) Swi nga ha hi tikela ku twisisa ndlela leyi munhu loyi a nga ni nkarhi wo leha a ri karhi a vabya a titwaka ha yona, ngopfungopfu loko hina hi nga vabyi. Kambe anakanya hi Yesu. U va twele vusiwana vanhu lava a va vabya hambileswi yena a nga si tshamaka a vabya. Onge hi nga tikarhatela ku tekelela xikombiso xakwe xa rirhandzu.—1 Petro 3:8.

13. I yini leswi ku pfuxiwa ka Lazaro eku feni ku swi paluxaka malunghana na Yesu?

¹³ Yesu a a khumbeka swinene loko van’wana va twa ku vava. Hi xikombiso, loko Lazaro munghana wakwe a file, Yesu u ‘konyile’ ivi a “karhateka” loko a vona ndlela leyi ndyangu wa ka va Lazaro ni vanghana va vona a va twe ku vava ha yona. (Hlaya Yohane 11:33-36.) Yesu u ririle hambileswi a a swi tiva leswaku u ta n’wi pfuxa Lazaro eku feni. A a nga chavi ku kombisa van’wana ndlela leyi a a titwa ha yona. Yesu a a n’wi rhandza swinene Lazaro ni ndyangu  wa ka vona lerova u tirhise matimba ya Xikwembu leswaku a pfuxa Lazaro eku feni!—Yohane 11:43, 44.

14, 15. (a) I yini leswi kombisaka leswaku Yehovha wa swi lava ku herisa ku xaniseka ka vanhu? (b) Hi dyondza yini eka xiga lexi nge “masirha-bako ya xitsundzuxo”?

¹⁴ Bibele yi hlamusela Yesu tanihi loyi a fanaka ni Tata wakwe, Yehovha. (Vaheveru 1:3) Hikwalaho masingita lama endliweke hi Yesu ma kombisa leswaku Yehovha na yena wa swi lava ku herisa mavabyi, switlhavi ni rifu. Ku nga ri khale, Yehovha na Yesu va ta pfuxa vanhu vo tala swinene eku feni. Yesu u vule leswaku “nkarhi wa ta lowu hinkwavo lava nga eka masirha-bako ya xitsundzuxo” va nga ta pfuxiwa eku feni.—Yohane 5:28, 29.

¹⁵ Yesu u tirhise xiga lexi nge “masirha-bako ya xitsundzuxo,” leswi kombisaka leswaku mianakanyo ya Xikwembu ya katseka. Xikwembu xa Matimba Hinkwawo, Muvumbi wa vuako hinkwabyo, a nga tsundzuka vuxokoxoko hinkwabyo bya varhandziwa va hina lava feke, ku katsa ni vumunhu bya vona. (Esaya 40:26) Yehovha u ta va tsundzuka naswona wa swi lava ku va tsundzuka. Ku pfuxiwa ka vafi loku ku vulavuriwaka hakona eBibeleni i swikombiso leswi tsakisaka swa leswi nga ta endleka emisaveni leyintshwa.

16. Hi rihi lunghelo leri nga ta kumiwa hi malandza yo tala ya Xikwembu?

¹⁶ Loko hi tshama hi tshembekile, hi nga ha va ni lunghelo ro vona rin’wana ra masingita lamakulu swinene, ku nga ku pona nhlomulo lowukulu! Endzhakunyana ka Armagedoni, hi ta vona masingita yo tala. Hi nkarhi wolowo, vanhu hinkwavo va ta va va ri ni rihanyo leri hetisekeke. (Esaya 33:24; 35:5, 6; Nhlavutelo 21:4) Tianakanye u ri karhi u vona vanhu va cukumeta manghilazi ya vona ya mahlo, tinhonga to famba hi tona, switulu swa lava lamaleke ni swilo swo pfuna vanhu leswaku va twa. Yehovha wa swi tiva leswaku vanhu hinkwavo lava nga ta pona Armagedoni va fanele va va va ri ni matimba naswona va hanye kahle, hikuva va ta va va ri ni ntirho wo tala wo wu endla. Hi vona va nga ta endla pulanete ya hina hinkwayo ya Misava yi va paradeyisi.—Pisalema 115:16.

17, 18. (a) Ha yini Yesu a endle masingita? (b) Ha yini u fanele u endla xin’wana ni xin’wana lexi lavekaka leswaku u nghena emisaveni leyintshwa ya Xikwembu?

¹⁷ “Ntshungu lowukulu” namuntlha wa khutazeka loko wu hlaya hi ndlela leyi Yesu a va hanyiseke ha yona vanhu lava vabyaka. (Nhlavutelo 7:9) Masingita wolawo ma tiyisa ntshembo wa hina lowu tsakisaka wa ku hanyisiwa hi ku helela enkarhini lowu taka. Ma tlhela ma kombisa ndlela leyi N’wana wa mativula wa Xikwembu a va rhandzaka ha yona vanhu. (Yohane 10:11; 15:12, 13) Ntwelavusiwana lowukulu wa Yesu wu kombisa ndlela leyikulu leyi Yehovha a n’wi rhandzaka ha yona nandza un’wana ni un’wana wakwe.—Yohane 5:19.

¹⁸ Vanhu namuntlha va hlaseriwa hi switlhavi, ku xaniseka ni rifu. (Varhoma 8:22) Hi yona mhaka hi lavaka misava leyintshwa ya Xikwembu. Eka yona vanhu hinkwavo va ta va ni rihanyo leri hetisekeke leri Xikwembu xi hi tshembiseke rona. Malakiya 4:2 ya hi tshembisa leswaku hi ta “handza misava kukota marhole lama nonisiweke,” hi tsakile hileswi hi nga ta va hi hanye kahle naswona se hi hetisekile. Onge ndlela leyi hi n’wi nkhensaka ha yona Yehovha ni ripfumelo ra hina eka switshembiso swakwe yi nga hi susumetela ku endla xin’wana ni xin’wana lexi lavekaka leswaku hi nghena emisaveni leyintshwa. Swa khutaza swinene ku tiva leswaku masingita lawa Yesu a ma endleke a ma ri swikombiso swa ku ntshunxiwa ka vanhu hi ku helela loku nga ta va kona ku nga ri khale, hi nkarhi wa ku fuma ka yena!