Ku Thwasa Ka Ntlawa Wa Vu-124 Wa Le Giliyadi

Varhumiwa Va Fanisiwa Ni Tinjiya

EKA tin’hweti tin’wana ni tin’wana ta tsevu, Xikolo xa Bibele xa Giliyadi xa Watchtower xi va ni nongonoko wo thwasa laha ku rhambiwaka ndyangu hinkwawo wa Bethele wa le United States. Hi March 8, 2008, vaendzi lava humaka ematikweni yo tlula 30 va hlangane ni ndyangu wa Bethele loko ku thwasa ntlawa wa vu-124 wa Xikolo xa Giliyadi. Vanhu hinkwavo va 6 411 lava a va ri kona va tsake ni swichudeni hi siku ra swona ro hlawuleka.

Stephen Lett wa Huvo leyi Fumaka loyi a a ri mutshama-xitulu wa nongonoko u sungule nongonoko hi nkulumo leyi a yi ri ni nhloko-mhaka leyi nge “Yanani eMahlweni Ni Tinjiya To Fanekisela Ta Yehovha.” Nhlavutelo 9:1-4 yi fanisa ntlawa lowutsongo wa Vakreste lava totiweke lava tlheleke va tirhela Yehovha hi ku hiseka hi 1919 ni ntlawa lowukulu wa tinjiya lowu nga lo na swi pfuketana wu tlhela wu tirhela Yehovha. Swichudeni swi tsundzuxiwe leswaku leswi swi nga swirho swa “tinyimpfu tin’wana,” swi tihlanganise ni ntlawa lowu lowukulu wa tinjiya to fanekisela.—Yoh. 10:16.

Lon Schilling, xirho xa Komiti ya Rhavi ya le United States u landzele hi nkulumo leyi nge, “Mi Seketelana.” A yi sekeriwe eka xikombiso xa le Bibeleni xa Akhwila na Prisila (kumbe Priska), mpatswa lowu tekaneke wa Vakreste va lembe-xidzana ro sungula. (Rhom. 16:3, 4) Eka ntlawa lowu wa le Giliyadi a ku ri ni mimpatswa ya 28 leyi tekaneke. Yi tsundzuxiwe leswaku loko yi lava swilo swi yi fambela kahle eka ntirho wa vurhumiwa, yi fanele yi tiyisa vukati bya yona. Loko Bibele yi vulavula hi Akhwila yi tlhela yi vulavula hi nsati wakwe Prisila. Hikwalaho, muapostola Pawulo ni vandlha a va va teka tanihi mpatswa. Hilaha ku fanaka, mimpatswa leyi nga varhumiwa namuntlha yi fanele yi tirha swin’we, yi gandzela swin’we ni ku langutana ni mintlhontlho yo tirha ematikweni mambe yi ri swin’we, xisweswo yi seketelana.—Gen. 2:18.

Guy Pierce wa Huvo leyi Fumaka u nyikele nkulumo leyi landzeleke leyi a yi ku, “Amukela Vunene Bya Yehovha.” Makwerhu Pierce u hlamuserile leswaku ku va munhu lonene a swi vuli ku papalata ku endla swilo swo biha ntsena. Munhu lonene u endla swilo leswinene leswaku a pfuna van’wana. Vunene bya Yehovha Xikwembu i byikulu swinene. (Zak. 9:16, 17) Vunene ni rirhandzu ra Xikwembu swi nga hi susumetela ku endlela van’wana swilo leswinene. Makwerhu Pierce u bumabumele swichudeni ivi a gimeta hi ku: “A mi ri karhi mi endla leswinene. Ha tiyiseka leswaku mi ta hambeta mi amukela vunene bya Xikwembu hi ku endla swilo leswinene eka swiavelo swin’wana ni swin’wana leswi Yehovha Xikwembu a nga ta mi nyika swona.”

Michael Burnett, loyi a tshameke a va murhumiwa naswona wa ha ku averiwaka ku va muleteri wa le Giliyadi, u landzele hi nkulumo leyi nge “Wu Ambaleni Tanihi Vamba Ra Le Mombyeni Exikarhi Ka Mahlo Ya N’wina.” Vaisrayele a va fanele va tsundzuka ku kutsuriwa ka vona hi Yehovha hi singita le Egipta onge hiloko va ambale “vamba ra le mombyeni” exikarhi ka mahlo ya vona. (Eks. 13:16) Swichudeni swi tsundzuxiwe ku tsundzuka ndzetelo wo tala lowu swi wu kumeke eXikolweni  xa Giliyadi onge hiloko swi wu ambale tanihi vamba ra le mombyeni exikarhi ka mahlo ya swona. Makwerhu Burnett u kandziyise leswaku swi fanele swi titsongahata swi tlhela swi tirhisa misinya ya milawu ya le Bibeleni loko swi tlhantlha timholovo ni varhumiwa-kulobye ni van’wana.—Mat. 5:23, 24.

Mark Noumair, loyi a nga ni nkarhi wo leha a ri karhi a dyondzisa le Giliyadi u nyikele nkulumo leyi nge, “Hi Rihi Risimu Leri Nga Ta Yimbeleriwa Malunghana Na Wena?” Eminkarhini ya khale, a swi tolovelekile leswaku vanhu va tlangela ku hlula enyimpini hi ku yimbelela risimu. Rin’wana ra tinsimu toleto ri paluxa rixaka ra Ruveni, ra Dani ni ra Axere tanihi tinxaka leti titsetseleleke, kasi rixaka ra Zebuloni ra dzunisiwa hikwalaho ka moya wa rona wa ku tinyiketela. (Vaav. 5:16-18) Swiendlo swa Mukreste un’wana ni un’wana swi hetelela swi tiviwile hi van’wana, ku fana ni marito ya risimu. Loko munhu a hisekela ntirho wa  Xikwembu naswona a landzela nkongomiso wa nhlengeletano ya Yehovha hi ku tshembeka u ta tsakisa Yehovha naswona u ta va xikombiso lexinene eka vamakwavo. Loko van’wana evandlheni va yingisela risimu ro fanekisela leri tsariweke ra swiendlo swa hina, va susumeteleka ku tekelela xikombiso xolexo lexinene.

Ntlawa lowu wa vu-124 wu hete tiawara ta kwalomu ka 3 000 wu ri eku chumayeleni loko wa ha leteriwa eGiliyadi. Loko ku ri karhi ku nyikeriwa nkulumo leyi nge “Ku Landzela Nkongomiso Wa Moya Lowo Kwetsima,” swichudeni swi hlamusele Sam Roberson loyi a tirhaka eka Ndzawulo ya Swikolo swa Vutirheli bya le Tilweni mintokoto yo hambana-hambana ya swona ya le nsin’wini, swi encenyeta yin’wana ya yona. Endzhaku ka mintokoto leyi, leyi khutazaka ku landzele mimbulavurisano leyi a yi fambisiwa hi Patrick LaFranca wa Komiti ya Rhavi ra le United States, laha a a vulavula ni mathwasana ya le Giliyadi lawa sweswi ma chumayelaka ematikweni yo hambana-hambana. Swichudeni swi yi tlangerile ndzayo leyi tirhaka leyi swi yi kumeke eka vamakwerhu lava.

Anthony Morris wa Huvo leyi Fumaka u nyikele nkulumo yo gimeta leyi nge, “Tsundzuka, Swilo Leswi Voniwaka I Swa Nkarhinyana.” Matsalwa ma hi khutaza ku anakanyisisa hi mikateko ya le nkarhini lowu taka leyi humaka eka Yehovha ematshan’weni yo anakanyisisa hi nhlomulo wa xinkarhana lowu hi nga ha langutanaka na wona. (2 Kor. 4:16-18) Vusweti lebyikulu, vuhomboloki, ku tshikileriwa, vuvabyi ni rifu i swilo leswi hinkwerhu hi swi vonaka namuntlha. Varhumiwa va nga ha langutana hi ku kongoma ni swiyimo leswi swo biha. Kambe ku tsundzuka leswaku swilo leswi i swa nkarhinyana swi ta hi pfuna leswaku hi hambeta hi rhangisa Yehovha evuton’wini bya hina ni ku tshama hi ri ni ntshembo.

Loko nongonoko wu gimeta mathwasana hinkwawo a ma tshame exitejini ma yingisele marito ya Makwerhu Lett. U ma khutaze hinkwawo leswaku ma nga heli matimba kutani a ku: “Hi nga tiyisela hi tlhela hi tshama hi tshembekile loko Yehovha a hi seketela.” U khutaze varhumiwa lavantshwa leswaku va fana ni tinjiya, va hambeta va tiyimisela entirhweni wa Yehovha naswona va tshama va ri karhi va hiseka, va tshembeka ni ku yingisa hilaha ku nga heriki.

[Bokisi leri nga eka tluka 30]

TINHLAYO TA NTLAWA

Nhlayo ya matiko lama yimeriweke: 7

Nhlayo ya matiko lawa va averiweke eka wona: 16

Nhlayo ya swichudeni: 56

Avhareji ya malembe: 33,8

Avhareji ya malembe entiyisweni: 18,2

Avhareji ya malembe evutirhelini bya nkarhi hinkwawo: 13,8

[Xifaniso lexi nga eka tluka 31]

Ntlawa Wa Vu-124 Lowu Thwasaka Wa Xikolo Xa Bibele Xa Giliyadi Xa Watchtower

Eka nxaxamelo lowu nga laha hansi, tilayeni ti hlayeriwa ku suka emahlweni ku ya endzhaku, naswona mavito ma xaxametiwe ku suka eximatsini ku ya exineneni eka layeni yin’wana ni yin’wana.

(1) Nicholson, T.; Main, H.; Senge, Y.; Snape, L.; Vanegas, C.; Pou, L. (2) Santana, S.; Oh, K.; Lemaitre, C.; Williams, N.; Alexander, L. (3) Woods, B.; Stainton, L.; Huntley, E.; Alvarez, G.; Cruz, J.; Bennett, J. (4) Williamson, A.; González, N.; Zuroski, J.; Degandt, I.; May, J.; Diemmi, C.; Tavener, L. (5) Lemaitre, W.; Harris, A.; Wells, C.; Rodgers, S.; Durrant, M.; Senge, J. (6) Huntley, T.; Vanegas, A.; Pou, A.; Santana, M.; Bennett, V.; Tavener, D.; Oh, M. (7) Zuroski, M.; Rodgers, G.; Diemmi, D.; Nicholson, L.; Alvarez, C.; Snape, J. (8) Harris, M.; González, P.; Main, S.; Woods, S.; Stainton, B.; Williamson, D.; Durrant, J. (9) Cruz, P.; Degandt, B.; Williams, D.; Wells, S.; Alexander, D.; May, M.

[Xifaniso lexi nga eka tluka 32]

Xikolo xa Giliyadi xi le Ntsindza wa Dyondzo wa Watchtower