Nghena endzeni

Hundzela eka leswi nga endzeni

Wa Tsundzuka Xana?

Wa Tsundzuka Xana?

 Wa Tsundzuka Xana?

Xana u swi tsakerile ku hlaya minkandziyiso ya sweswinyana ya Xihondzo xo Rindza? A hi vone loko u nga hlamula swivutiso leswi landzelaka:

• Hi swihi swiphiqo leswi Vakreste van’wana va langutaneke na swona loko va nghenele vukati, naswona i yini lexi va faneleke va tikarhatela ku xi endla?

Vakreste van’wana va nga ha xiya leswaku vanghana va vona va vukati va hambanile swinene na vona. Leswi va swi tivaka leswaku ku dlaya vukati loku nga sekeriwangiki eMatsalweni a hi ntlhantlho lowu amukelekaka, va fanele va tikarhatela ku hlayisa vukati bya vona.—4/15, tluka 17.

• Mukreste la tshamaka ekaya ra vadyuhari a nga ha langutana ni swiphiqo swihi?

Swi nga ha endleka a nga ri tolovelanga vandlha leri tirhaka nsimu leyi kaya ra vadyuhari ri nga eka yona. Vanhu vo tala lava tshamaka ekaya rolero swi nga ha endleka va ri ni vukhongeri byo hambana-hambana naswona va nga ha ringeta ku n’wi katsa eka minhlangano ya vukhongeri. Maxaka lama nga Vakreste ni swirho swa vandlha ra kwalaho va fanele va xiya swiphiqo leswi kutani va n’wi seketela ni ku n’wi khathalela.—4/15, matluka 25-27.

• Hi wahi magoza ya mune lama nga pfunaka vanghana va vukati leswaku va tlhantlha swiphiqo?

Tivekeleni nkarhi wo vulavula hi swiphiqo swa kona. (Ekl. 3:1, 7) Vula mavonelo ya wena hi ku tshembeka ni hi xichavo. (Efe. 4:25) Yingisa nkataku kutani u yi tekela enhlokweni ndlela leyi a titwaka ha yona. (Mat. 7:12) Pfumelelanani hi ndlela leyi mi nga ta tlhantlha xiphiqo ha yona. (Ekl. 4:9, 10)—5/1, matluka 10-12.

• Loko Yesu a hi khutaza leswaku hi khongelela ku rivaleriwa milandzu ya hina, a a vula milandzu yihi?

Eka Matewu 6:12 Yesu a a nga vulavuli hi milandzu ya timali. A a vulavula hi swidyoho. Hi fanele hi tekelela Xikwembu hi ku rivalela swi huma embilwini.—5/15, tluka 9.

• Swirho swa Huvo leyi Fumaka swi tirha eka tikomiti tihi?

Komiti ya Muungameri; Komiti yo Khathalela Vatirhi; Komiti ya Vukandziyisi; Komiti ya Ntirho; Komiti yo Dyondzisa; Komiti ya Vatsari.—5/15, tluka 29.

• Hi nga tiyiseka njhani leswaku Ndhambi ya le nkarhini wa Nowa yi ve kona emisaveni hinkwayo?

Yesu a a kholwa leswaku Ndhambi yi ve kona emisaveni hinkwayo. Switsundzuxo swa le Bibeleni swi sekeriwe eka Ndhambi ya xiviri leyi veke kona emisaveni hinkwayo.—6/1, tluka 8.

• Xana vanhu lava a va tikhome hi ndlela yo biha lava ku vulavuriwaka ha vona eka Varhoma 1:24-32, a ku ri Vayuda kumbe Vamatiko?

Nhlamuselo leyi a yi ta yi fanela mintlawa leyi hayimbirhi, kambe muapostola Pawulo kahle-kahle a a kombetela eka Vaisrayele va khale lava va tsandzekeke ku landzela Nawu ku ringana madzana ya malembe. A va swi tiva swileriso swo lulama swa Xikwembu, kambe a va swi landzelanga.—6/15, tluka 29.

• Xana marhumbi ya muti wa Aradi ma le kwihi, naswona ha yini ma ri ya nkoka?

Marhumbi lawa lama nga nhulu le Israyele laha muti wa khale wa Aradi a wu ri kona ma le vupela-dyambu bya Lwandle leri Feke. Eka nhulu yoleyo vayimburi va kume swiphepherhele swa vumba leswi a ku tsaleriwa eka swona. Swin’wana swi ni mavito lama kumekaka eBibeleni, naswona swi kombisa leswaku vanhu a a va ri tirhisa vito ra Xikwembu etibukwini ta vona.—7/1, matluka 23-24.

• Ha yini ku tivekela tipakani leti hi nga ti fikelelaka swi nga engetelaka ntsako wa hina?

Loko hi tikarhatela ku fikelela tipakani leti fikelelekaka ku nga khathariseki leswaku ti koxa yini, hi tihoxa ekhombyeni ro va ni ntshikilelo. Hambiswiritano, a hi fanelanga hi debyisa mavoko, ivi hi koka milenge evutirhelini hi tibyela leswaku hi ni ku tsana ko karhi.—7/15, tluka 29.

• I yini lexi nga sivelaka vatswari leswaku va vulavula ni vana va vona va kondlo-a-ndzi-dyi?

Swihinga swin’wana swi nga ha katsa ku va muntshwa a ri ni tingana, a navela ku tilawula ni ku navela ku va yexe. Vatswari va nga ha ringeta ku vulavurisana ni muntshwa hi ndlela leyi xiximekaka ni ku tikarhatela ku twisisa leswi a swi vulaka ni ndlela leyi a titwaka ha yona.—8/1, matluka 10-11.