Vantshwa, Dzunisani Yehovha!

“Dzunisani Yehovha mi ri emisaveni, . . . n’wina majaha na n’wina vanhwana.”—PISALEMA 148:7, 12.

1, 2. (a) I swipimelo swihi leswi vantshwa vo tala va swi tivaka? (b) Ha yini vana va nga fanelanga va nyangatsiwa hi swipimelo leswi vatswari va va vekelaka swona?

HAKANYINGI vantshwa va swi tiva leswi va nga si pfumeleriwaka ku swi endla. Vo tala va vona va nga hatla va ku byela leswaku va fanele va rhanga va va ni malembe mangani leswaku va ta pfumeleriwa ku tsemakanya xitarata va ri voxe, kumbe va fanele va ya lata rivambu rini kumbe va chayela rini movha. Minkarhi yin’wana muntshwa a nga ha vona onge swo tala swa leswi a swi kombelaka hi mbilu hinkwayo swi vuya ni nhlamulo leyi fanaka, “Rindza u kondza u kula.”

² N’wina vantshwa ma swi tiva leswaku vatswari va n’wina va vona ku ri vutlhari ku va ni swipimelo swo tano, kumbexana leswaku swi mi sirhelela. Nakambe ma swi tiva leswaku Yehovha wa tsaka loko mi yingisa vatswari va n’wina. (Vakolosa 3:20) Kambe, xana mi pfa mi titwa onge a mi khomiwa ku fana ni tincece? Xana mi siveriwa ku endla  swilo hinkwaswo swa nkoka ku kondza mi kula? Leswi a hi ntiyiso nikatsongo! Ku ni ntirho lowu endliwaka namuntlha lowu nga wa nkoka swinene ku tlula lunghelo rihi na rihi leri mi nga ha vaka mi ri rindzerile. Xana n’wina vantshwa mi pfumeleriwile ku hlanganyela entirhweni lowu? A mi lo pfumeleriwa ntsena—kambe entiyisweni Xikwembu xa Le Henhla-Henhla hi xoxe xa mi rhamba leswaku mi hlanganyela eka wona!

3. Yehovha u rhamba vantshwa leswaku va va ni lunghelo rihi, naswona i swivutiso swihi leswi hi nga ta swi kambisisa sweswi?

³ Xana hi vulavula hi ntirho wa njhani? Xiya marito ya tsalwa leri xihloko lexi xi sekeriweke eka rona: “Dzunisani Yehovha mi ri emisaveni, . . . n’wina majaha na n’wina vanhwana, n’wina vakulukumba na n’wina vafana.” (Pisalema 148:7, 12) Hi rero lunghelo leri mi nga ri kumaka: Mi nga dzunisa Yehovha. Tanihi muntshwa, xana wa swi tsakela ku hlanganyela entirhweni wolowo? Vo tala va swi tsakela. Leswaku hi vona leswaku ha yini swi fanela ku titwa hi ndlela yoleyo, a hi kambisiseni swivutiso swinharhu. Xo sungula, ha yini mi fanele mi dzunisa Yehovha? Xa vumbirhi, xana mi nga n’wi dzunisa njhani hi ndlela leyi humelelaka? Xa vunharhu, hi wihi nkarhi lowunene lowu mi nga sungulaka ha wona ku dzunisa Yehovha?

Ha Yini Hi Dzunisa Yehovha?

4, 5. (a) Hi ku ya hi Pisalema ya vu-148, hina hi le xiyin’weni xihi lexi tsakisaka? (b) Xana ntumbuluko lowu nga vulavuriki naswona wu nga anakanyiki wu dzunisa Yehovha hi ndlela yihi?

⁴ Xivangelo lexikulu swinene xo dzunisa Yehovha hi leswi a nga Muvumbi. Pisalema ya vu-148 yi hi pfuna ku nyikela nyingiso eka ntiyiso lowu. Wa nga anakanya: Loko u tshinelela ntlawa lowukulu wa vanhu lava yimbelelaka risimu ro tsakisa, leri ku khumbaka, va yimbelela hi vun’we, xana a wu ta titwa njhani? Ku vuriwa yini loko marito ya risimu leri a ma ri marito lawa u ma tivaka leswaku i ntiyiso, ma hlamusela mianakanyo leyi u yi tivaka leswaku i ya nkoka, ya tsakisa naswona ya ku khumba? Xana a wu ta navela ku dyondza marito ya rona kutani na wena u hlanganyela eka rona? Vo tala va hina a hi ta endla tano. Pisalema ya vu-148 yi kombisa leswaku u le xiyin’weni lexi fanaka kambe lexi tsakisaka swinene. Pisalema yoleyo yi vulavula hi ntshungu lowukulu, hinkwawo ka wona wu dzunisa Yehovha hi vun’we. Kambe, loko u ri karhi u hlaya pisalema leyi u nga ha xiya nchumu wo karhi lowu nga tolovelekangiki. I yini nchumu wa kona?

⁵ Vo tala va vadzunisi lava ku vulavuriwaka ha vona eka Pisalema 148 a va swi koti ku vulavula naswona a va ehleketi. Hi xikombiso, hi hlaya hi dyambu, n’weti, tinyeleti, gamboko, tintshava ni switsunga leswi dzunisaka Yehovha. Xana ntumbuluko lowu wu nga hanyiki wu nga swi endlisa ku yini sweswo? (Tindzimana 3, 8, 9) Entiyisweni, wu dzunisa hi ndlela leyi fanaka ni leyi misinya, swivumbiwa swa le lwandle ni swiharhi swi dzunisaka ha yona. (Tindzimana 7, 9, 10) Xana u tshame u hlalela dyambu ri ri karhi ri pela hi ndlela yo saseka kumbe u languta n’weti wu ri karhi wu tsemakanya xibakabaka lexi teleke tinyeleti kumbe u hleka u tsakile loko u vona swiharhi leswi tlangaka kumbe u sale u ahlamile hi ku hlamarisiwa hi rivala ro saseka? Kutani u ‘twe’ risimu ro dzunisa leri yimbeleriwaka hi swilo leswi tumbuluxiweke. Hinkwaswo leswi Yehovha a swi endleke swi hi tsundzuxa leswaku i Muvumbi wa matimba hinkwawo, leswaku a ku na munhu un’wana evuakweni hinkwabyo la nga ni matimba swinene, a tlhariha swinene kumbe a va ni rirhandzu ronghasi ku fana na yena.—Varhoma 1:20; Nhlavutelo 4:11.

6, 7. (a) Pisalema ya vu-148 yi vula leswaku i swivumbiwa swihi leswi tlhariheke leswi dzunisaka Yehovha? (b) Ha yini hi nga ha susumetelekaka ku dzunisa Yehovha? Kombisa.

⁶ Pisalema ya vu-148 yi tlhela yi hlamusela leswaku swivumbiwa swo tlhariha swi dzunisa Yehovha. Eka ndzimana 2, hi kuma “vuthu” ra Yehovha ra le tilweni, ku nga tintsumi ri dzunisa Xikwembu. Eka ndzimana 11, vanhu lava nga ni matimba ni vulawuri, vo tanihi tihosi ni vaavanyisi, va rhambiwa leswaku va hlanganyela eku dzuniseni. Loko tintsumi ta matimba ti tsakela ku dzunisa Yehovha, a ku na munhu la nga ni mfanelo ya ku vula leswaku yena i wa nkoka swinene lerova a nge dzunisi. Kutani eka tindzimana 12 na 13, n’wina vantshwa ma rhambiwa leswaku na n’wina mi hlanganyela eku dzuniseni ka Yehovha. Xana u susumeteleka ku endla tano?

⁷ Xiya xikombiso lexi. Loko a wu ri ni munghana lonkulu la nga ni vutshila lebyi hlamarisaka—kumbexana eka mintlangu, eka ntivo-vuxongi,  kumbe eka vuyimbeleri—xana a wu ta vulavula hi yena endyangwini wa ka n’wina ni le ka vanghana van’wana? A swi kanakanisi leswaku a wu ta swi endla sweswo. Entiyisweni, ku dyondza hi swilo hinkwaswo leswi Yehovha a swi endleke swi nga va ni vuyelo lebyi fanaka. Hi xikombiso, Pisalema 19:1, 2 yi vula leswaku matilo lama teleke hi tinyeleti ma vangela ku “vulavula.” Loko hi anakanya hi swilo swo hlamarisa leswi Yehovha a swi hetisiseke, ha tsandzeka ku miyela hi nga va byeli van’wana malunghana ni Xikwembu xa hina.

8, 9. Yehovha u lava hi n’wi dzunisa hikwalaho ka swivangelo swihi?

⁸ Xivangelo xin’wana lexikulu xo dzunisa Yehovha hi leswi a lavaka leswaku hi endla tano. Ha yini? Xana hi leswi a navelaka ku dzunisiwa hi vanhu? Doo! Hina vanhu hi nga ha lava ku dzunisiwa minkarhi yin’wana, kambe Yehovha u tlakuke ku hi tlula swinene. (Esaya 55:8) A nga na ku kanakana malunghana na yena kumbe hi timfanelo takwe. (Esaya 45:5) Kambe, u lava leswaku hi n’wi dzunisa naswona wa tsaka loko hi endla tano. Ha yini? Xiya swivangelo swimbirhi. Xo sungula, wa swi tiva leswaku hi fanele hi n’wi dzunisa. U hi vumbe hi ri ni xilaveko xa moya, xilaveko xo gandzela. (Matewu 5:3) Yehovha wa tsaka loko a vona hi enerisa xilaveko xexo, u tsaka ku fana ni vatswari va wena loko va ku vona u dya swakudya leswi va swi tivaka leswaku swi ta ku xurhisa.—Yohane 4:34.

⁹ Xa vumbirhi, Yehovha wa swi tiva leswaku vanhu van’wana va fanele va hi twa loko hi n’wi dzunisa. Muapostola Pawulo u tsalele jaha Timotiya marito lawa: “Nyikela nyingiso lowu hambetaka eka wena ni le ku dyondziseni ka wena. Tshama eka swilo leswi, hikuva hi ku endla tano, u ta tiponisa wena swin’we ni lava va ku yingisaka.” (1 Timotiya 4:16) Ina, loko u dyondzisa van’wana malunghana na Yehovha Xikwembu, u n’wi dzunisa, na vona va nga ha tiva Yehovha. Vutivi byo tano byi nga endla leswaku va kuma ku ponisiwa loku nga heriki!—Yohane 17:3.

10. Ha yini hi titwa hi susumeteleka ku dzunisa Xikwembu xa hina?

¹⁰ Ka ha ri ni xivangelo xin’wana xo dzunisa Yehovha. Tsundzuka xifaniso xa munghana wa wena la nga ni vutshila. Loko u twa van’wana va vula mavunwa hi yena, va onha vito ra yena lerinene, xana a wu nga ta tiyimisela no tlula mpimo ku n’wi dzunisa? Yehovha u onhiwe vito swinene emisaveni leyi. (Yohane 8:44; Nhlavutelo 12:9) Xisweswo lava n’wi rhandzaka va titwa va susumeteleka ku vula ntiyiso malunghana na yena, va lulamisa vito leri onhiweke. Xana na wena u nga tsakela ku kombisa rirhandzu ni ku tlangela ka wena eka Yehovha kutani u kombisa leswaku u lava yena leswaku a va Mufumi wa wena, ku nga ri nala wa yena lonkulu, Sathana? U nga swi endla sweswo hinkwaswo hi ku dzunisa Yehovha. Kutani xivutiso lexi landzelaka xi ri, u nga swi endlisa ku yini sweswo?

Ndlela Leyi Vana Van’wana Va N’wi Dzuniseke Ha Yona Yehovha

11. I swikombiso swihi swa le Bibeleni leswi kombisaka leswaku vantshwa va nga humelela swinene eku dzuniseni ka Yehovha?

¹¹ Bibele yi kombisa leswaku vantshwa hakanyingi va swi kota swinene ku dzunisa Yehovha. Hi xikombiso, a ku ri ni nhwanyana wa Muisrayele loyi a a yisiwe evuhlongeni hi Vasiriya. U nyikele vumbhoni hi xivindzi eka n’wini wakwe wa xisati malunghana na Elixa muprofeta wa Yehovha. Marito ya yena ma endle leswaku ku endleka singita, naswona ku nyikeriwe vumbhoni bya matimba. (2 Tihosi 5:1-17) Yesu na yena u nyikele vumbhoni hi xivindzi loko a ha ri n’wana. Eka swiendlakalo  hinkwaswo swa vuntshwa bya yena leswi a swi ta va swi tsariwile eMatsalweni, Yehovha u hlawule xin’we ntsena, nkarhi lowu Yesu wa malembe ya 12 hi vukhale a vutiseke vadyondzisi va vukhongeri hi xivindzi etempeleni ya le Yerusalema kutani a va siya va hlamarile malunghana ni ndlela leyi a a ti twisisa ha yona tindlela ta Yehovha.—Luka 2:46-49.

12, 13. (a) I yini leswi Yesu a swi endleke emahlweninyana ka ku fa ka yena, naswona vanhu lava a va ri kwalaho va titwe njhani? (b) Yesu u titwe njhani loko vafana lavatsongo va vula swidzuniso?

¹² Loko se a kurile, Yesu u tlhele a khutaza vana ku dzunisa Yehovha. Hi xikombiso, loko ku sele masiku ma nga ri mangani leswaku a fa, Yesu u hete nkarhi a ri etempeleni eYerusalema. Bibele yi vula leswaku u endle “swilo swo hlamarisa” kwalaho. U hlongole lava a va hundzule ndhawu yoleyo yo kwetsima yi va bako ra makhamba. U tlhele a tshungula mabofu ni vanhu lava lamaleke. Vanhu hinkwavo lava a va ri kwalaho, ngopfu-ngopfu varhangeri va vukhongeri, a va fanele va susumeteleke ku dzunisa Yehovha ni N’wana wa yena, Mesiya. Kambe, khombo ra kona vo tala emasikwini wolawo a va swi vulanga swidzuniso swo tano. A va swi tiva leswaku Yesu a a rhumiwe hi Xikwembu, kambe a va chava varhangeri va vukhongeri. Kambe, ku ni ntlawa wun’wana lowu vulavuleke hi xivindzi. Xana wa swi tiva leswaku a ku ri vamani? Bibele yi ri: “Loko vaprista lavakulu ni vatsari va vona swilo swo hlamarisa leswi [Yesu] a swi endleke ni ku vona vafana lava a va huwelela etempeleni va ku: ‘Ha khongela, a ku ponisiwe N’wana wa Davhida,’ va hlundzuka kutani va ku eka [Yesu]: ‘Xana wa swi twa leswi vuriwaka hi lava?’”—Matewu 21:15, 16; Yohane 12:42.

¹³ Vaprista volavo a va anakanya leswaku Yesu u ta miyeta vafana lava a va n’wi dzunisa. Xana u va miyetile? Doo! Yesu u hlamule vaprista a ku: “Ina. Xana a mi si tshama mi hlaya leswi, ‘U lunghiselele swidzuniso swi huma emilon’wini ya swihlangi ni ya lava an’waka’?” Swi le rivaleni leswaku Yesu ni Tata wakwe a va tsakisiwa hi swidzuniso swa vafana lava. Vana lava a va endla leswi vanhu hinkwavo lavakulu lava a va ri kwalaho a va fanele va swi endla. Emianakanyweni ya vona leyi a ya ha tsakama a swi ri erivaleni leswaku va fanele va endla yini. Va vone wanuna loyi a endla swilo swo hlamarisa, a vulavula hi xivindzi ni hi ripfumelo, a tlhela a kombisa rirhandzu leri enteke eka Xikwembu ni le ka vanhu. A a ri loyi a tivula leswaku hi yena—“N’wana wa Davhida” la tshembisiweke, Mesiya. Vafana lava va hakeriwile hikwalaho ka ripfumelo ra vona, va kala va va ni lunghelo ra ku hetisisa vuprofeta.—Pisalema 8:2.

14. Tinyiko leti vana va nga na tona ti va hlomisela njhani ku dzunisa Xikwembu?

¹⁴ Hi nga dyondza yini eka swikombiso swo tano? Hi nga dyondza leswaku vantshwa va nga va vadzunisi va Yehovha lava humelelaka. Hakanyingi va ni nyiko ya ku vona ntiyiso kahle na hi ku olova, va phofula ripfumelo ra vona hi mbilu hinkwayo na hi ku hiseka. Nakambe va ni nyiko leyi boxiweke eka Swivuriso 20:29: “Ku saseka ka majaha i matimba ya wona.” Ina, n’wina vana mi ni matimba ni ntamu—swilo swa nkoka eku dzuniseni ka Yehovha. Xana u nga ti tirhisa njhani tinyiko toleto hi ndlela leyi humelelaka?

U Nga N’wi Dzunisa Njhani Yehovha?

15. Leswaku u dzunisa Yehovha hilaha ku humelelaka, ku laveka nsusumeto wa muxaka muni?

¹⁵ Ku dzunisa hi ndlela leyi humelelaka swi sungula embilwini. U nge dzunisi Yehovha hilaha ku humelelaka loko u sindzisiwa hi van’wana. Tsundzuka, xileriso lexikulu eka hinkwaswo hi lexi  nge: “U fanele u rhandza Yehovha Xikwembu xa wena hi mbilu ya wena hinkwayo ni hi moya-xiviri wa wena hinkwawo ni hi mianakanyo ya wena hinkwayo.” (Matewu 22:37) Xana se wa n’wi tiva Yehovha hileswi u dyondzeke Rito ra yena? Vuyelo lebyi faneleke bya ku dyondza ko tano i ku titwa u rhandza Yehovha. Ndlela ya ntumbuluko yo kombisa rirhandzu rolero i ku n’wi dzunisa. Loko nsusumeto wa wena wu ri wunene naswona wu tiyile, u lunghekele ku dzunisa Yehovha hi ku hiseka.

16, 17. Xana ku tikhoma ku pfuna njhani eku dzuniseni ka Yehovha? Kombisa.

¹⁶ Loko u nga si anakanyisisa hileswi u nga ta swi vula, anakanya hi ndlela leyi u nga ta swi endla ha yona. Loko nhwanyana wa Muisrayele wa le nkarhini wa Elixa a a ri ni nsele, a delela, kumbe a nga tshembeki, xana u anakanya leswaku Vasiriya lava a va n’wi khomile a va ta va va n’wi yingisile loko a vulavula hi muprofeta wa Yehovha? Kumbexana a va ta va va nga n’wi yingisanga. Hilaha ku fanaka, vanhu va tala ku ku yingisa loko va swi vona leswaku wa xixima, wa tshembeka naswona u tikhome kahle. (Varhoma 2:21) Xiya xikombiso lexi.

¹⁷ Nhwanyana wa malembe ya 11 hi vukhale wa le Portugal u langutane ni ntshikilelo exikolweni wa ku tlangela tiholideyi leti a ti lwisana ni ripfalo rakwe leri leteriweke hi Bibele. U hlamusele mudyondzisi wa yena hi xichavo leswaku ha yini a nga hlanganyeli, kambe mudyondzisi u n’wi hlekurile. Loko nkarhi wu ri karhi wu famba, mudyondzisi loyi u ringete hi ku phindha-phindha leswaku a n’wi khomisa tingana, a sandza vukhongeri bya yena. Hambiswiritano, xinhwanyatana lexi xi hambete xi n’wi xixima. Endzhaku ka malembe yo hlayanyana, makwerhu loyi wa xisati u ve phayona ra nkarhi hinkwawo, mutirheli wa nkarhi hinkwawo. Entsombanweni wun’wana a a hlalele vanhu loko va ri karhi va khuvuriwa kutani a xiya leswaku u tiva un’wana wa vona. A ku ri khale ka mudyondzisi wa yena! Endzhaku ka ku angarhana va ri karhi va rila, khale ka mudyondzisi loyi u byele makwerhu loyi leswaku a nga xi rivalanga xichavo xa yena. U endzeriwe hi Mbhoni, kutani mudyondzisi loyi a vulavula hi mahanyelo ya khale ka xichudeni xa yena. Hikwalaho, ku sunguriwe dyondzo ya Bibele, naswona wansati loyi u amukele ntiyiso wa Bibele. Ina, ku tikhoma ka wena ku nga va ndlela ya matimba swinene yo dzunisa Yehovha!

18. Muntshwa a nga endla yini loko a kanakana ku sungula mabulo hi Bibele na hi Yehovha Xikwembu?

¹⁸ Xana minkarhi yin’wana swa ku tikela ku sungula mabulo malunghana ni ripfumelo ra wena exikolweni? A hi wena ntsena u titwaka hi ndlela yoleyo. Hambiswiritano, u nga endla leswaku van’wana va ku vutisa hi ripfumelo ra wena. Hi xikombiso, loko swi ri enawini naswona swi pfumeleriwa, ha yini u nga ti na tibuku leti sekeriweke eBibeleni kutani u ti hlaya hi nkarhi wa swakudya kumbe hi minkarhi yin’wana leyi swi pfumeleriwaka ku endla tano? Swichudeni-kuloni swi nga ha ku vutisa leswaku u hlaya yini. Loko u swi hlamula u tlhela u swi byela swilo leswi tsakisaka exihlokweni kumbe ebukwini leyi u yi hlayaka, u nga kuma leswaku ku hatla ku sungula bulo lerinene. U nga rivali ku vutisa swivutiso leswaku u ta tiva leswi swichudeni-kuloni swi pfumelaka eka swona. Yingisa hi xichavo, u swi byela leswi u swi dyondzeke eBibeleni. Hilaha ntokoto lowu nga eka tluka 29 wu kombisaka hakona, vantshwa vo tala va dzunisa Xikwembu exikolweni. Leswi swi va tisela ntsako naswona swi pfuna vo tala leswaku va tiva Yehovha.

19. Vantshwa va nga va lava humelelaka swinene evutirhelini bya yindlu ni yindlu hi ndlela yihi?

¹⁹ Vutirheli bya yindlu na yindlu i ndlela leyi humelelaka swinene yo dzunisa Yehovha. Loko u nga si hlanganyela eka byona, ha yini u nga tivekeli pakani ya ku hlanganyela eka byona? Loko se  u hlanganyela eka byona, xana ku ni tipakani tin’wana leti u nga tivekelaka tona? Hi xikombiso, ematshan’weni yo tshamela ku vula mhaka yin’we ensin’wini loko wa ha sungula, lava tindlela to antswisa, u lava swiringanyeto leswi tirhaka eka vatswari va wena ni van’wana lava nga ni ntokoto. Dyondza ndlela yo tirhisa Bibele swinene, ku endla maendzo yo vuyela ni ku sungula dyondzo ya Bibele. (1 Timotiya 4:15) Loko u ya u dzunisa Yehovha hi tindlela teto, u ta ya u humelela swinene, naswona u ta byi tsakela swinene vutirheli bya wena.

U Nga Sungula Rini Ku Dzunisa Yehovha?

20. Ha yini ku nga ri na xilaveko xa leswaku vantshwa va vona onge va ha ri vatsongo ngopfu leswaku va nga dzunisa Yehovha?

²⁰ Eka swivutiso swinharhu leswi hi buleke ha swona, nhlamulo ya lexi xo hetelela yi olova swinene. Xiya nhlamulo leyi kongomeke ya le Bibeleni: “Sweswi tsundzuka Mutumbuluxi wa wena Lonkulu emasikwini ya vujaha bya wena.” (Eklesiasta 12:1) Ina, lowu hi wona nkarhi wa ku sungula ku dzunisa Yehovha. Swa olova ku vula leswaku: “Ndza ha ri ntsongo ngopfu leswaku ndzi nga dzunisa Yehovha. A ndzi na ntokoto. Ndzi fanele ndzi rindza kukondza ndzi kula.” A hi wena wo sungula ku titwa hi ndlela yoleyo. Hi xikombiso, Yeremiya loko a ha ri ntsongo u byele Yehovha a ku: “Oho, Wena Yehovha, Hosi leyi Lawulaka! Phela entiyisweni a ndzi swi tivi ku vulavula, hikuva ndza ha ri mufana.” Yehovha u n’wi tiyisekisile leswaku a ku nga ri na xivangelo xo chava. (Yeremiya 1:6, 7) Hilaha ku fanaka, a hi fanelanga hi chava nchumu loko hi dzunisa Yehovha. A ku na nchumu lowu nga hi vavisaka lowu Yehovha a nga ta ka a nga wu susi hi ku helela.—Pisalema 118:6.

21, 22. Ha yini vadzunisi va Yehovha lava ha riki vantshwa va fanisiwa ni mathonsi ya mberha, naswona ha yini xifananiso xexo xi khutaza?

²¹ Kutani, n’wina vantshwa ha mi khutaza: Mi nga kanakani ku dzunisa Yehovha! Sweswi loko ma ha tsakama i nkarhi lowunene wo hlanganyela entirhweni lowu wa nkoka swinene lowu endliwaka emisaveni hinkwayo namuntlha. Loko mi hlanganyela, mi va xiphemu xa nchumu wun’wana lowu hlamarisaka—ndyangu wa le vuakweni hinkwabyo wa lava dzunisaka Yehovha. Yehovha wa tsaka leswi ndyangu wolowo wu katsaka wena. Xiya marito lama huhuteriweke lawa mupisalema a ma byeleke Yehovha: “Vanhu va wena va ta tinyikela hi ku tirhandzela esikwini ra vuthu ra wena ra nyimpi. Hi ku vangama ka vukwetsimi, ku sukela embelekweni ya vurhonga, u ni ntlawa wa majaha ku fana ni mathonsi ya mberha.”—Pisalema 110:3.

²² Mathonsi ya mberha lama vangamaka eku vonakaleni ka nimixo ma sasekile, a swi tano ke? Ma phyuphyisa, ma vangama, naswona a ma hlayeki hikwalaho ka ku tala ka wona. Yoleyo i ndlela leyi Yehovha a mi vonaka ha yona n’wina vantshwa lava n’wi dzunisaka hi ku tshembeka eminkarhini leyi yo nonon’hwa. Swi le rivaleni leswaku leswi mi hlawuleke ku dzunisa Yehovha mi tsakisa mbilu ya yena. (Swivuriso 27:11) Kutani, n’wina vantshwa dzunisani Yehovha hi tindlela hinkwato!

A Wu Ta Hlamurisa Ku Yini?

• Hi swihi swivangelo swin’wana swa nkoka swo dzunisa Yehovha?

• I swikombiso swihi swa le Bibeleni leswi kombisaka leswaku vantshwa va nga humelela swinene eku dzuniseni ka Yehovha?

• Vantshwa va nga n’wi dzunisa njhani Yehovha namuntlha?

• Vantshwa va fanele va sungula rini ku dzunisa Yehovha, naswona ha yini?

[Swivutiso Swa Dyondzo]

[Swifaniso leswi nga eka tluka 25]

Loko munghana wa wena a a ri ni vutshila lebyi hlamarisaka, xana a wu nga ta va byela van’wana?

[Xifaniso lexi nga eka tluka 27]

Swichudeni-kuloni swi nga ha tsakela tidyondzo ta wena

[Xifaniso lexi nga eka tluka 28]

Loko u lava ku antswisa vutirheli bya wena, kombela swiringanyeto leswi tirhaka eka Mbhoni leyi nga ni ntokoto