Nghena endzeni

Hundzela eka leswi nga endzeni

Pfumelela Rito Ra Xikwembu Ri Ku Voningela Ndlela

Pfumelela Rito Ra Xikwembu Ri Ku Voningela Ndlela

 Pfumelela Rito Ra Xikwembu Ri Ku Voningela Ndlela

“Rito ra wena i . . . ku vonakala endleleni ya mina.”—PISALEMA 119:105.

1, 2. Rito ra Yehovha ri ta voninga ndlela ya hina ehansi ka swiyimo swihi?

RITO ra Yehovha ri ta hi voningela ndlela ya hina loko hi ri pfumelela ku endla tano. Leswaku hi vuyeriwa eka ku vonakala koloko ka moya, hi fanele hi va swichudeni leswi hisekaka swa Rito ra Xikwembu leri tsariweke kutani hi tirhisa ndzayo ya rona. Loko hi ta va hi endle sweswo hi kona hi nga vulaka marito lama fanaka ni ya mupisalema: “Rito ra wena i rivoni enengeni wa mina, ni ku vonakala endleleni ya mina.”—Pisalema 119:105.

2 Sweswi a hi kambisiseni Pisalema 119:89-176. Tindzimana leti ti ni rungula ro tala swinene, naswona ti hleriwe hi tindzimana ta 11! Ti nga hi pfuna leswaku hi tshama endleleni leyi yisaka evuton’wini lebyi nga heriki.—Matewu 7:13, 14.

Ha Yini U Rhandza Rito Ra Xikwembu?

3. Xana Pisalema 119:89, 90 yi swi kombisa njhani leswaku hi nga ri tshemba rito ra Xikwembu?

3 Ku rhandza rito ra Yehovha swi endla leswaku munhu a tiya hi tlhelo ra moya. (Pisalema 119:89-96) Mupisalema u yimbelerile: “Oho Yehovha, hilaha ku nga riki na makumu, rito ra wena ri tshama ematilweni. . . . Misava u yi simeke yi tiya,  leswaku yi tshama hi masiku.” (Pisalema 119:89, 90) Hi rito ra Xikwembu—“milawu ya matilo” ya xona—swilo leswi nga exibakabakeni swi rhendzeleka hi ku hetiseka naswona misava yi simekeriwe makumu. (Yobo 38:31-33; Pisalema 104:5) Hi nga tshemba rito rin’wana ni rin’wana leri humaka enon’wini wa Yehovha; leswi Xikwembu xi swi vulaka swi ta “humelela hakunene” loko ku hetiseka xikongomelo xa xona.—Esaya 55:8-11.

4. Ku rhandza rito ra Xikwembu ku ma pfuna njhani malandza ya xona lama xanisiwaka?

4 Mupisalema a a ta va a ‘lovile eku xanisekeni ka yena loko a a nga rhandzi nawu wa Xikwembu.’ (Pisalema 119:92) A a nga xanisiwi hi vanhu vambe; a a vengiwa hi Vaisrayele lava a va tlula nawu. (Levhitika 19:17) Kambe sweswo a swi n’wi hetanga matimba hikuva a a rhandza nawu wa Xikwembu lowu a wu n’wi nyika matimba. Le Korinto, muapostola Pawulo a a ri “emakhombyeni exikarhi ka vamakwerhu va mavunwa,” kumbexana ku katsa ni ‘vaapostola lavanene ngopfu’ lava a va lava ku n’wi hehla. (2 Vakorinto 11:5, 12-14, 26) Kambe, Pawulo u ponile hi tlhelo ra moya hikuva a a rhandza rito ra Xikwembu. Leswi hi rhandzaka Rito ra Yehovha leri tsariweke hi tlhela hi tirhisa leswi ri swi vulaka, hi rhandza vamakwerhu. (1 Yohane 3:15) Hambiloko misava yi hi venga, sweswo a swi hi endli hi rivala xileriso hambi xi ri xihi xa Xikwembu. Hi hambeta hi endla ku rhandza ka xona hi vun’we bya rirhandzu ni vamakwerhu loko ha ha langutele ku tirhela Yehovha hilaha ku nga heriki hi tsakile.—Pisalema 119:93.

5. Hosi Asa u n’wi lave njhani Yehovha?

5 Loko hi phofula ku tinyiketela ka hina eka Yehovha hi nga ha khongela hi ku: “Ndzi wa wena. Ndzi ponise, hikuva ndzi lavisise swileriso swa wena.” (Pisalema 119:94) Hosi Asa u lavisise Xikwembu a tlhela a tsuvula vugwinehi eYuda. Enhlengeletanweni leyikulu hi lembe ra vu-15 ra ku fuma ka Asa (963 B.C.E.), vaaki va le Yuda va “nghenel[e] ntwanano wa ku lavisisa Yehovha.” Xikwembu ‘xi endle leswaku va xi kuma’ kutani ‘xi ya emahlweni xi va nyika ku rhula ematlhelo hinkwawo.’ (2 Tikronika 15:10-15) Xikombiso lexi xi fanele xi khutaza munhu wihi na wihi loyi a fularheleke vandlha ra Vukreste leswaku a tlhela a lavisisa Xikwembu. Xi ta katekisa xi tlhela xi sirhelela lava va tlhelaka va tihlanganisa ni vanhu va xona.

6. I goza rihi leri nga ta hi sirhelela ekhombyeni ra moya?

6 Rito ra Yehovha ri hi nyika vutlhari lebyi nga hi sirhelelaka ekhombyeni ra moya. (Pisalema 119:97-104) Swileriso swa Xikwembu swi hi endla hi tlhariha ku tlula valala va hina. Ku yingisa switsundzuxo swa xona swi hi nyika ku twisisa, naswona ‘ku hlayisa swileriso swa xona swi hi endla hi tikhoma hi ku twisisa lokukulu ku tlula vakulukumba.’ (Pisalema 119:98-100) Loko marito ya Yehovha ma ‘nandziha emalakeni ya hina ku tlula vulombe enon’wini wa hina,’ hi ta venga “ndlela yin’wana ni yin’wana ya vunwa” hi tlhela hi yi papalata. (Pisalema 119:103, 104) Leswi swi ta hi sirhelela ekhombyeni ra moya loko hi hlangana ni vanhu lava titlakusaka, lava nga ni tihanyi ni lava nga chaviki Xikwembu emasikwini lawa yo hetelela.—2 Timotiya 3:1-5.

Rivoni eNengeni Wa Hina

7, 8. Hi ku pfumelelana na Pisalema 119:105, hi fanele hi endla yini?

7 Rito ra Xikwembu i xihlovo xa ku vonakala ka moya loku nga heriki. (Pisalema 119:105-112) Ku nga khathariseki leswaku hi  Vakreste lava totiweke kumbe hi vanakulobye va vona va “tinyimpfu tin’wana,” hi ri: “Rito ra wena i rivoni enengeni wa mina, ni ku vonakala endleleni ya mina.” (Yohane 10:16; Pisalema 119:105) Rito ra Xikwembu ri fana ni rivoni leri hi voningelaka ndlela, leswaku hi nga khunguvanyeki kutani hi wa hi tlhelo ra moya. (Swivuriso 6:23) Kambe, un’wana ni un’wana wa hina u fanele a pfumelela rito ra Yehovha leswaku ri va rivoni enengeni wa yena.

8 Hi fanele hi tiyimisela ku fana ni muqambhi wa Pisalema 119. A a tiyimiserile ku nga hambuki eswilerisweni swa Xikwembu. U te: “Ndzi hlambanyile hi rito, ndzi ta ri hetisisa, leswaku ndzi hlayisa swiboho swa wena [Yehovha] swo lulama swa vuavanyisi.” (Pisalema 119:106) A hi fanelanga hi wu tekela ehansi nkoka wa dyondzo ya Bibele ya nkarhi na nkarhi ni ku hlanganyela eminhlanganweni ya Vukreste.

9, 10. Hi swi tivisa ku yini leswaku vanhu lava tinyiketeleke eka Yehovha va nga ‘hambuka eswilerisweni swa yena,’ kambe leswi swi nga papalatiwa njhani?

9 Mupisalema a nga ‘hambukanga eswilerisweni swa Xikwembu,’ kambe sweswo swi nga humelela eka munhu la tinyiketeleke eka Yehovha. (Pisalema 119:110) Hosi Solomoni u hambukile, hambileswi a a ri xirho xa tiko leri tinyiketeleke eka Yehovha naswona a a tshame a endla hi ku pfumelelana ni vutlhari lebyi humaka eka Xikwembu. “Vasati vambe va n’wi dyohisile” hi ku n’wi kucetela ku gandzela swikwembu swa mavunwa.—Nehemiya 13:26; 1 Tihosi 11:1-6.

10 Sathana, “muphasi wa tinyenyana” u veka swirimbana swo tala. (Pisalema 91:3) Hi xikombiso, munhu loyi a a ri mugandzeri wa ntiyiso a nga ha ringeta ku hi hlohlotela leswaku hi hambuka endleleni leyi nga ni ku vonakala ka moya hi ya emunyameni wa vugwinehi. Exikarhi ka Vakreste va le Tiyatira, a ku ri ni “wansati yoloye Yezabele,” kumbexana a ku ri ntlawa wa vavasati lava a va dyondzisa van’wana ku gandzela swikwembu swa hava ni ku endla vumbhisa. Yesu a nga byi pfumelelanga vubihi byo tano, na hina a hi fanelanga hi byi pfumelela. (Nhlavutelo 2:18-22; Yudha 3, 4) Hikwalaho a hi khongeleleni mpfuno wa Yehovha leswaku hi nga hambuki eswilerisweni swa yena kambe hi tshama eku vonakaleni ka Xikwembu.—Pisalema 119:111, 112.

Ku Tiyisiwa Hi Rito Ra Xikwembu

11. Hi ku ya hi Pisalema 119:119, Xikwembu xi va languta njhani lavo homboloka?

11 Loko hi nga hambuki eswilerisweni swa xona, Xikwembu xi ta hi tiyisa. (Pisalema 119:113-120) A hi va tsakeli “lava mbilu leyi nga hetisekangiki,” tanihi leswi ni namuntlha Yesu a nga va tsakeliki lava tivulaka Vakreste kambe va kufumela. (Pisalema 119:113; Nhlavutelo 3:16) Leswi hi tirhelaka Yehovha hi mbilu hinkwayo, yena i ‘ndhawu ya hina ya ku tumbela’ naswona u ta hi tiyisa. U ta va ‘cukumetela ekule hinkwavo lava hambukaka eswilerisweni swa yena’ hi ku tirhisa vukanganyisi ni mavunwa. (Pisalema 119:114, 117, 118; Swivuriso 3:32) Vanhu volavo vo homboloka u va teka tanihi “ripambe”—thyaka leri susiwaka eka ntsompfu wa nkoka wo tanihi silivhere ni nsuku. (Pisalema 119:119; Swivuriso 17:3) Onge minkarhi hinkwayo hi nga kombisa leswaku ha swi rhandza switsundzuxo swa Xikwembu, hikuva entiyisweni a hi swi lavi ku katsiwa ni lavo homboloka loko va lovisiwa ku fana ni ripambe!

12. Ha yini ku chava Yehovha swi ri swa nkoka?

12 Mupisalema u te: “Nyama ya mina yi rhurhumerile hikwalaho ka ku ku chava [Yehovha].” (Pisalema 119:120) Leswaku Xikwembu xi hi hlayisa tanihi malandza ya xona i swa nkoka leswaku hi xi chava hi ndlela leyinene, hi papalata swilo leswi xi nga swi tsakeliki. Ku chava Yehovha hi ndlela ya ku n’wi xixima swi vangele Yobo ku hanya  vutomi lebyinene. (Yobo 1:1; 23:15) Ku chava Xikwembu ku nga hi endla hi tiyisela endleleni leyi xi yi tsakelaka ku nga khathariseki leswaku hi fanele hi tiyisela yini. Kambe, leswaku hi tiyisela hi fanele hi khongela hi mbilu hinkwayo hi ripfumelo.—Yakobo 5:15.

Khongela Hi Ripfumelo

13-15. (a) Ha yini hi nga vaka ni ntshembo wa leswaku swikhongelo swa hina swi ta hlamuriwa? (b) Ku nga humelela yini loko hi nga tivi leswi hi nga swi vulaka loko hi khongela? (c) Kombisa ndlela leyi Pisalema 119:121-128 yi nga ha fambisanaka ha yona ni ‘ku konya ka hina loku nga phofuriwiki’ hi xikhongelo.

13 Hi nga khongela hi ri ni ntshembo wa leswaku Xikwembu xi ta hi pfuna. (Pisalema 119:121-128) Ku fana ni mupisalema, ha tiyiseka leswaku swikhongelo swa hina swi ta hlamuriwa. Ha yini? Hikuva hi rhandza swileriso swa Xikwembu “ku tlula nsuku, hambi ku ri nsuku lowu tengisiweke.” Ku tlula kwalaho, ‘hi languta swileriso swa Xikwembu hinkwaswo malunghana ni swilo hinkwaswo swi ri leswi lulameke.’—Pisalema 119:127, 128.

14 Yehovha u yingisa swikombelo swa hina hikuva hi khongela hi ripfumelo naswona hi hanya hi ku pfumelelana ni swileriso swa yena hi vukheta. (Pisalema 65:2) Kambe ku vuriwa yini loko minkarhi yin’wana hi va ni swiphiqo leswikulu lerova hi nga tivi leswaku hi nga khongela hi ku yini? Kutani “moya hi woxe wa hi kombelela hi ku konya loku nga phofuriwiki.” (Varhoma 8:26, 27) Eminkarhini yo tano, Xikwembu xi amukela marito lama kumekaka eRitweni ra xona tanihi swikhongelo leswi yimelaka swilaveko swa hina.

15 Matsalwa ma ni swikhongelo ni mianakanyo yo tala leyi fambisanaka ni ‘ku konya ka hina loku nga phofuriwiki.’ Hi xikombiso, xiya Pisalema 119:121-128. Ndlela leyi swilo swi phofuriweke ha yona laha yi nga ha fanela swiyimo swa hina. Hi xikombiso, loko hi chava ku dyeleriwa hi nga ha kombela mpfuno wa Xikwembu ku fana ni mupisalema. (Tindzimana 121-123) A hi nge hi lava ku endla xiboho xo tika swinene. Kutani hi nga ha khongela leswaku moya wa Yehovha wu hi pfuna hi tsundzuka hi tlhela hi tirhisa switsundzuxo swa yena. (Tindzimana 124, 125) Hambileswi hi ‘vengaka ndlela yin’wana ni yin’wana ya vunwa,’ hi nga ha boheka ku kombela Xikwembu leswaku xi hi pfuna leswaku hi nga weli endzingweni  wo tlula nawu wa xona. (Tindzimana 126-128) Loko hi hlaya Bibele siku ni siku, tindzimana leti pfunaka to kota leti ti nga ha vuya emianakanyweni ya hina loko hi kombela Yehovha.

Ku Pfuniwa Hi Switsundzuxo Swa Yehovha

16, 17. (a) Ha yini hi lava switsundzuxo swa Xikwembu, naswona hi fanele hi swi languta njhani? (b) Van’wana va nga ha hi teka njhani, kambe i yini lexi nga xa nkoka?

16 Leswaku swikhongelo swa hina swi twiwa hi tlhela hi tsakeriwa hi Xikwembu, hi fanele hi yingisa switsundzuxo swa Xikwembu. (Pisalema 119:129-136) Leswi hi rivalaka, hi lava switsundzuxo leswinene swa Yehovha leswi nga ta vuyisa swiletelo ni swileriso swa yena emianakanyweni ya hina. Ina, ha ku tlangela ku vonakala ka moya loku tisiwaka hi ku twisisa kun’wana ni kun’wana lokuntshwa ka marito ya Xikwembu. (Pisalema 119:129, 130) Nakambe ha tsaka leswi Yehovha a ‘voningiseke xikandza xa yena ehenhla ka hina’ a kombisa ku hi amukela, hambileswi ‘swinambyana swa mati swi rhelelaka ematihlweni ya hina’ hileswi van’wana va tlulaka nawu wa yena.—Pisalema 119:135, 136; Tinhlayo 6:25.

17 Loko hi fambisana ni switsundzuxo swa Xikwembu leswinene ha tiyiseka leswaku xi ta hambeta xi hi amukela. (Pisalema 119:137-144) Tanihi malandza ya Yehovha, ha pfumela leswaku u ni mfanelo yo hi nyika switsundzuxo swa yena leswinene kutani a langutela leswaku hi yingisa swileriso leswi. (Pisalema 119:138) Leswi mupisalema a yingiseke swileriso swa Xikwembu, ha yini a te: “Mina a ndzi nyawuli naswona ndzi solekile”? (Pisalema 119:141) Handle ko kanakana, a a vulavula hi ndlela leyi valala vakwe a va n’wi teka ha yona. Loko hi nga landzuli xiyimo xa hina malunghana ni leswinene, van’wana va nga ha hi langutela ehansi. Kambe, lexi nga xa nkoka hileswaku Yehovha wa hi tsakela hikuva hi hanya hi ku pfumelelana ni switsundzuxo swa yena leswinene.

Ku Sirheleleka Naswona U Ri Ni Ku Rhula

18, 19. Ku va ni vuyelo byihi loko hi yingisa switsundzuxo swa Xikwembu?

18 Ku yingisa switsundzuxo swa Xikwembu swi hi endla hi tshama hi ri kusuhi na xona. (Pisalema 119:145-152) Leswi hi yingisaka switsundzuxo swa Yehovha, hi titwa hi ntshunxekile ku n’wi kombela hi mbilu ya hina hinkwayo, naswona hi nga langutela leswaku hi ta twiwa. Hi nga ha pfuka “nimpundzu swinene hi ku vonakala ka nimixo” hi kombela mpfuno. Wolowo i nkarhi lowunene ngopfu wo khongela! (Pisalema 119:145-147) Xikwembu xi le kusuhi na hina hikuva hi papalata ku tikhoma loko biha naswona hi teka rito ra xona ri ri ntiyiso, hilaha Yesu a a ri teka hakona. (Pisalema 119:150, 151; Yohane 17:17) Vuxaka bya hina na Yehovha bya hi tiyisa emisaveni leyi yi tshikilelekeke naswona byi ta hi tiyisa ni le nyimpini ya yena leyikulu ya Armagedoni.—Nhlavutelo 7:9, 14; 16:13-16.

19 Leswi hi ri xiximaka swinene rito ra Xikwembu, hi tiphina hi nsirhelelo wa ntiyiso. (Pisalema 119:153-160) Ku hambana ni lavo homboloka, a hi ‘hambukanga eswitsundzuxweni swa Yehovha.’ Hi rhandza swileriso swa Xikwembu hikwalaho hi sirhelelekile eka musa wa rirhandzu wa xona. (Pisalema 119:157-159) Switsundzuxo swa Yehovha swi tsakisa mianakanyo ya hina lerova hi tsundzuka leswi a swi languteleke eka hina eka swiyimo swo karhi. Hi hala tlhelo, Xikwembu xi hi nyika swileriso kutani hi ku olova hi pfumela mfanelo ya Muvumbi yo hi kongomisa. Leswi hi swi tivaka leswaku ‘mongo wa rito ra Xikwembu i ntiyiso’ ni leswaku a hi nge swi koti ku kongomisa mikondzo ya hina handle ka xona, hi amukela nkongomiso wa Xikwembu hi ntsako.—Pisalema 119:160; Yeremiya 10:23.

20. Ha yini hi ri ni “ku rhula lokukulu”?

20 Ku rhandza ka hina nawu wa Yehovha swi hi tisela ku rhula lokukulu. (Pisalema 119:161-168) Nxaniso a wu hi tekeli “ku rhula ka Xikwembu” loku hlawulekeke. (Vafilipiya 4:6, 7) Hi xixima swiboho swa vuavanyisi swa Yehovha swinene lerova ha n’wi dzunisa hikwalaho ka swona nkarhi na nkarhi—“ka nkombo hi siku.” (Pisalema 119:161-164) Mupisalema u yimbelerile: “Ku rhula lokukulu i ka lava va rhandzaka nawu wa wena, a ku na xikhunguvanyiso eka vona.” (Pisalema 119:165) Loko hi rhandza Yehovha hi tlhela hi hlayisa milawu ya yena, a hi nge khunguvanyeki hi tlhelo ra moya hi mhaka ya leswi swi endliwaka hi munhu un’wana kumbe hi mhaka yin’wana.

21. I swikombiso swihi swa le Matsalweni leswi kombisaka leswaku a hi fanelanga hi khunguvanyeka loko ku va ni swiphiqo evandlheni?

 21 Vanhu vo tala lava ku vulavuriwaka hi vona eBibeleni a va pfumelelanga nchumu wu va khunguvanyisela makumu. Hi xikombiso, Mukreste la vuriwaka Gayo a nga khunguvanyekanga kambe ‘u hambete a famba entiyisweni’ ku nga khathariseki ku tikhoma loko biha ka Diyotrefo. (3 Yohane 1-3, 9, 10) Pawulo u khutaze Efodiya na Sintika vavasati lava a va ri Vakreste “leswaku va va ni mianakanyo yin’we eHosini,” kumbexana hileswi a va tlulane milenge. Swi tikomba onge va pfuniwile leswaku va tlhantlha xiphiqo xa vona kutani va hambeta va tirhela Yehovha hi ku tshembeka. (Vafilipiya 4:2, 3) Hikwalaho a hi fanelanga hi khunguvanyeka loko ku va ni swiphiqo swo karhi evandlheni. A hi dzikiseni mianakanyo ya hina eku hlayiseni ka swileriso swa Yehovha, hi tsundzuka leswaku ‘tindlela ta hina hinkwato ti le mahlweni ka yena.’ (Pisalema 119:168; Swivuriso 15:3) Kutani ku hava nchumu lowu nga ta hi tekela “ku rhula lokukulu” hilaha ku nga heriki.

22. (a) Loko hi yingisa Xikwembu, hi nga kuma lunghelo rihi? (b) Hi fanele hi va languta njhani van’wana lava sukeleke vandlha ra Vukreste?

22 Loko minkarhi hinkwayo hi yingisa Yehovha, hi ta va ni lunghelo ro hambeta hi n’wi dzunisa. (Pisalema 119:169-176) Loko hi hanya hi ku pfumelelana ni swileriso swa Xikwembu, a hi tiphini hi nsirhelelo wa moya ntsena kambe ‘milomu ya hina yi hambeta yi dzunisa Yehovha.’ (Pisalema 119:169-171, 174) Leri i lunghelo lerikulu swinene eka lawa hi nga vaka na wona emasikwini lawa yo hetelela. Mupisalema a a lava ku hambeta a hanya a tlhela a dzunisa Yehovha, kambe u ‘tsendzeleke kukota nyimpfu leyi lahlekeke’ hi ndlela leyi nga hlamuseriwangiki. (Pisalema 119:175, 176) Van’wana lava sukeleke vandlha ra Vukreste va nga ha va va xi rhandza Xikwembu naswona va nga ha va va lava ku xi dzunisa. Hikwalaho a hi endleni hinkwaswo leswi hi nga swi kotaka leswaku hi va pfuna va tlhela va kuma nsirhelelo wa moya ni ntsako wa ku dzunisa Yehovha ni vanhu vakwe.—Vaheveru 13:15; 1 Petro 5:6, 7.

Ku Vonakala Loku Nga Heriki eNdleleni Ya Hina

23, 24. U vuyeriwe hi yini eka Pisalema 119?

23 Pisalema 119 yi nga hi vuyerisa hi tindlela to hambana-hambana. Hi xikombiso, yi nga hi endla hi titshega swinene hi Xikwembu, hikuva yi kombisa leswaku loko hi “famb[a] enawini wa Yehovha” hi ta va ni ntsako wa xiviri. (Pisalema 119:1) Mupisalema wa hi tsundzuxa leswaku ‘mongo wa rito ra Xikwembu i ntiyiso.’ (Pisalema 119:160) Handle ko kanakana leswi swi fanele swi kurisa ku tlangela ka hina Rito ra Xikwembu hinkwaro leri tsariweke. Ku anakanyisisa hi Pisalema 119 swi fanele swi hi susumetela ku dyondza Matsalwa hi ku hiseka. Mupisalema u kombele Xikwembu hi ku phindha-phindha a ku: “Ndzi dyondzise swileriso swa wena.” (Pisalema 119:12, 68, 135) U tlhele a kombela a ku: “Ndzi dyondzise vunene, ku twisisa ni vutivi, hikuva ndzi kombise ripfumelo eswilerisweni swa wena.” (Pisalema 119:66) Hi fanele hi khongela hi ndlela leyi fanaka.

24 Dyondzo ya Yehovha yi endla leswaku hi swi kota ku va ni vuxaka na yena. Mupisalema u vule hi ku phindha-phindha leswaku i nandza wa Xikwembu. Entiyisweni, u vulavule na Yehovha hi marito lama khumbaka mbilu a ku: “Ndzi wa wena.” (Pisalema 119:17, 65, 94, 122, 125; Varhoma 14:8) Mawaku lunghelo ra ku tirhela ni ku dzunisa Yehovha tanihi un’wana wa Timbhoni ta yena! (Pisalema 119:7) Xana u tirhela Xikwembu tanihi muhuweleri wa Mfumo la tsakeke? Loko swi ri tano, tiyiseka leswaku Yehovha u ta hambeta a ku tiyisa a tlhela a ku katekisa entirhweni lowu wo hlawuleka, loko u tshemba rito ra yena minkarhi hinkwayo u ri pfumelela ri ku voningela ndlela ya wena.

A Wu Ta Hlamurisa Ku Yini?

• Ha yini hi fanele hi rhandza rito ra Xikwembu?

• Rito ra Xikwembu ri hi tiyisa njhani?

• Switsundzuxo swa Yehovha swi hi pfuna hi tindlela tihi?

• Ha yini vanhu va Yehovha va sirhelelekile va tlhela va va ni ku rhula?

[Swivutiso Swa Dyondzo]

[Xifaniso lexi nga eka tluka 16]

Rito ra Xikwembu i xihlovo xa ku vonakala ka moya

[Xifaniso lexi nga eka tluka 17]

Loko hi rhandza switsundzuxo swa Yehovha, a nge pfuki a hi teke hi ri “ripambe”

[Swifaniso leswi nga eka tluka 18]

Loko hi hlaya Bibele siku ni siku, tindzimana leti pfunaka ti nga titela emianakanyweni loko hi khongela