Swivutiso Swa Vahlayi

Xana munhu la lamaleke swinene kumbe loyi rihanyo ra yena ri nga nyawuriki u fanele a nyuperisiwa hi ku helela ematini?

Rito “khuvula” ri hundzuluxeriwe ri suka eka riendli ra Xigriki leri nge baʹpto leri vulaka “ku nyuperisa.” (Yohane 13:26) EBibeleni “ku khuvula” ka fana ni “ku nyuperisa.” Malunghana ni ku khuvuriwa ka mutsheniwa wa Muetiyopiya hi Filipi, The Emphasised Bible ya Rotherham yi ri: “Filipi ni mutsheniwa va rhelela ematini,—kutani a n’wi nyuperisa.” (Mintirho 8:38) Hikwalaho, munhu la khuvuriwaka kahle-kahle u petiwa endzeni ka mati.—Matewu 3:16; Marka 1:10.

Yesu u lerise vadyondzisiwa vakwe a ku: “Hikokwalaho fambani mi ya endla vanhu va matiko hinkwawo va va vadyondzisiwa, mi va khuvula.” (Matewu 28:19, 20) Hi ku pfumelelana na sweswo, Timbhoni ta Yehovha ti khuvulela eswidan’wanini, emativeni, emilambyeni kumbe etindhawini tin’wana laha ku nga ni mati lama eneleke leswaku munhu a kota ku nyuperisiwa hi ku helela. Tanihi leswi ku khuvuriwa hi ku nyuperisiwa hi ku helela ku nga xilaveko xa le Matsalweni, vanhu a va na mfanelo yo arisa munhu un’wana leswaku a nga khuvuriwi. Hikwalaho, munhu u fanele a khuvuriwa hambiloko ku fanele ku tekiwa magoza man’wana hi mhaka ya xiyimo xa yena. Hi xikombiso, nkhuvulo wa le ndzeni ka bavhu lerikulu wu pfune vadyuhari kumbe lava rihanyo ra vona ri nga nyawuriki. Mati lama nga ebavhini ma fanele ma va ma kufumela, kutani loyi a khuvuriwaka u fanele a nghenisiwa ematini hakatsongo-tsongo, loko miri wa yena se wu kufumerile a nga ha khuvuriwa.

Hambi ku ri vanhu lava lamaleke swinene va khuvuriwile. Hi xikombiso, vanhu lava nga ni mbhovo enkolweni kumbe lava va hefemulaka hi michini va nyuperisiwile. Ina, eka minkhuvulo hinkwayo yo tano ku fanele ku endliwa malunghiselelo lamanene. Swi nga va swinene loko ko va ni muongori loyi a byi dyondzeleke kumbe dokodela. Hambiswiritano, a hi vangani lava swiyimo swa vona swi nga va sivelaka hakunene leswaku va khuvuriwa. Hikwalaho, ku fanele ku endliwa matshalatshala hinkwawo lama twalaka leswaku ku khuvuriwa munhu loyi a swi navelaka hi mbilu hinkwayo naswona a tiyimiseleke ku amukela vuyelo byihi na byihi lebyi nga ha vaka kona endzhaku ka ku khuvuriwa ka yena.