Xiviko Xa Vahuweleri Va Mfumo

Ku Kuma Ntiyiso Endhawini Leyi Nga Tekeriwiki Nhlokweni

I KU rhandza ka Xikwembu leswaku “vanhu va mixaka hinkwayo va ponisiwa naswona va fikelela vutivi lebyi kongomeke bya ntiyiso.” (1 Timotiya 2:3, 4) Leswaku ti kota ku fikelela pakani yoleyo, Timbhoni ta Yehovha ti kandziyise ni ku hangalasa tikopi ta timiliyoni ta Bibele ni tibuku leti pfunaka ku dyondza Bibele. Minkarhi yo tala, tibuku leti ti pfune vanhu va timbilu leto tshembeka leswaku va dyondza ntiyiso swi nga languteriwanga. Malunghana ni leswi, vahuweleri va Mfumo eFreetown, le Sierra Leone, va vika ntokoto lowu landzelaka.

Osman, a a ri n’wana wa vumbirhi endyangwini lowu nga ni vana va kaye. Leswi a kuleleke endyangwini lowu nghenaka kereke, nkarhi hinkwawo a a famba ni tata wakwe ekerekeni. Kambe, Osman a karhateka hi leswi a swi dyondzisiwa ekerekeni malunghana ni tihele. A a nga swi twisisi leswaku hikwalaho ka yini Xikwembu lexi nga ni tintswalo xi xanisa vanhu lavo homboloka endzilweni wa tihele. Tindlela hinkwato leti tirhisiweke leswaku ku pfuniwa Osman a twisisa dyondzo ya ndzilo wa tihele, a ti pfunanga nchumu.

Osman loyi a ri ni 20 wa malembe hi vukhale, siku rin’wana u vone buku ya wasi, leyi cukumetiweke laha ku lahliwaka thyaka. Leswi a rhandza tibuku, u yi tekile a yi phumunha kutani a vona xihloko lexi nge—Ntiyiso Lowu Yisaka eVuton’wini Lebyi Nga Heriki. *

Osman u tivutisile: ‘Xana i ntiyiso wa njhani lowu?’ Leswi Osman a a lava ku tiva swo tala, u teke buku yoleyo a muka na yona a fika a yi hlaya xikan’we-kan’we hinkwayo ka yona. Wa nga vona ndlela leyi a tsake ha yona loko a tiva vito ra Xikwembu—ku nga Yehovha! (Pisalema 83:18) Osman u tlhele a dyondza leswaku mfanelo leyikulu ya Xikwembu i rirhandzu nileswaku mhaka ya ku xanisa vanhu endzilweni i nchumu lowu xi nyenyetsaka. (Yeremiya 32:35; 1 Yohane 4:8) Eku heteleleni, Osman u dyondze leswaku ku nga ri khale Yehovha u ta tisa paradeyisi ya laha misaveni leyi eka yona vanhu va nga ta hanya hilaha ku nga heriki. (Pisalema 37:29; Nhlavutelo 21:3, 4) Vona ntiyiso wo hlamarisa swonghasi, lowu humaka eka Xikwembu xa tintswalo ni rirhandzu! Osman u nkhense Yehovha hi mbilu ya yena hinkwayo hikwalaho ka leswi a n’wi pfuneke leswaku a kuma ntiyiso endhawini leyi nga tekeriwiki enhlokweni.

Endzhaku ka masikunyana, vanghana va Osman, va n’wi pfune leswaku a kuma Holo ya Mfumo ya Timbhoni ta Yehovha, kutani a ya eminhlanganweni ro sungula. Loko a ri eminhlanganweni, u kombele Mbhoni yin’wana leswaku yi dyondza Bibele na yena. Hambileswi a a kanetiwa swinene hi vandyangu wa yena, Osman u ye emahlweni a endla nhluvuko hi tlhelo ra moya kutani a khuvuriwa. (Matewu 10:36) Namuntlha, i nkulu evandlheni. A hi ku tsakisa ka swona, hikuva leswi hinkwaswo swi endleke hikwalaho ka buku ya Bibele leyi kumiweke laha ku cukumetiwaka thyaka!

[Nhlamuselo ya le hansi]