Marka 13:1-37
13 Loko a ri karhi a huma etempeleni un’wana wa vadyondzisiwa vakwe a ku eka yena: “Mudyondzisi, vona, muxaka wonghasi wa maribye ni muxaka wonghasi wa miako!”+
2 Kambe, Yesu a ku eka yena: “Xana wa yi vona miako+ leyi leyikulu? Laha a swi nge endleki leswaku ku siyiwa ribye ehenhla ka ribye+ rin’wana ri nga wisiwanga.”+
3 Kuteloko a tshame eNtshaveni ya Mitlhwari a langutane ni tempele, Petro+ na Yakobo na Yohane na Andriya va n’wi vutisa va ri etlhelweni+ va ku:
4 “Hi byele, Xana swilo leswi swi ta endleka rini, naswona xi ta va xihi xikombiso xa nkarhi lowu swilo leswi hinkwaswo swi nga ta hela+ ha wona?”
5 Kutani Yesu a va byela a ku: “Tivoneleni leswaku ku nga vi ni munhu la mi hambukisaka.+
6 Vo tala va ta ta hi vito ra mina, va ku, ‘Ndzi yena,’ naswona va ta hambukisa vo tala.+
7 Ku tlula kwalaho, loko mi twa hi ta tinyimpi ni swiviko swa tinyimpi, mi nga chavisiwi; swilo leswi swi fanele ku endleka, kambe makumu ma ta va ma nga si fika.+
8 “Hikuva tiko ri ta pfukela tiko rin’wana ni mfumo wu ta pfukela mfumo+ wun’wana, ku ta va ni ku tsekatseka+ ka misava ku suka endhawini yin’wana ku ya eka yin’wanyana, ku ta va ni ku kayivela ka swakudya.+ Leswi i ku sungula ka switlhavi swa maxangu.+
9 “Loko ku ri n’wina, tivoneleni; vanhu va ta mi nyiketa etihubyeni+ ta rikwenu, mi ta biwa emasinagogeni,+ mi yimisiwa emahlweni ka tindhuna-nkulu ni tihosi hikwalaho ka mina, leswaku byi va vumbhoni eka vona.+
10 Nakambe, mahungu lamanene+ ma fanele ku chumayeriwa ematikweni hinkwawo ku sungula.+
11 Kambe loko va mi yisa ku ya mi nyiketa, mi nga vileli ka ha ri emahlweni malunghana ni leswi mi nga ta swi vula;+ kambe xin’wana ni xin’wana lexi mi nga ta nyikiwa xona hi nkarhi wolowo, xi vuleni, hikuva a hi n’wina mi vulavulaka, kambe ku vulavula moya+ lowo kwetsima.
12 Ku tlula kwalaho, makwavo u ta nyiketa makwavo eku feni, ni tatana u ta nyiketa n’wana,+ ni vana va ta pfukela vatswari, va endla leswaku va dlayiwa;+
13 naswona vanhu hinkwavo va ta mi venga hikwalaho ka vito+ ra mina. Kambe loyi a tiyiseleke ku fika emakumu+ hi yena la nga ta ponisiwa.+
14 “Hambiswiritano, loko mi vona nchumu wo nyenyetsa+ lowu onhetelaka+ wu yime laha wu nga fanelangiki ku yima kona (muhlayi a a twisise),+ kutani lava nga eYudiya a va balekele etintshaveni.+
15 Munhu loyi a nge lwangwini ra yindlu a nga xiki, hambi ku ri ku nghena endlwini+ a humesa swo karhi eka yona;
16 naswona munhu la nge nsin’wini a nga tlheleli eka swilo leswi nga endzhaku a ya teka nguvu+ yakwe ya le handle.
17 Khombo eka vavasati lava tikeke ni lava an’wisaka vana emasikwini+ wolawo!
18 Hambetani mi khongela leswaku swi nga fiki hi vuxika;+
19 hikuva masiku wolawo ma ta va masiku ya nhlomulo+ lowu ku nga si tshamaka ku humelela wo fana na wona ku sukela eku sunguleni ka ntumbuluko lowu Xikwembu xi wu tumbuluxeke ku fika enkarhini wolowo, naswona a wu nge he humeleli nakambe.+
20 Entiyisweni, loko Yehovha+ a a nga ma hungutanga masiku wolawo, ku hava nyama leyi a yi ta ponisiwa. Kambe hikwalaho ka vahlawuriwa+ lava a va hlawuleke,+ u ma hungutile masiku+ wolawo.
21 “Nakambe, hi nkarhi wolowo, loko un’wana a ku eka n’wina, ‘Maswivo! Hi loyi Kreste,’ ‘Maswivo! Hi luya,’+ mi nga swi kholwi.+
22 Hikuva ku ta humelela+ lava tivulaka Kreste hi vunwa ni vaprofeta va mavunwa naswona va ta endla mahlori ni swihlamariso+ leswaku va xisa vahlawuriwa loko swi koteka.+
23 Kutani n’wina tivoneleni;+ ndzi mi byele swilo hinkwaswo ka ha ri emahlweni.+
24 “Kambe emasikwini wolawo, endzhaku ka nhlomulo wolowo, dyambu ri ta hundzuka ntima, ni n’weti a wu nge he humesi ku vonakala ka wona,
25 ni tinyeleti ti ta wa etilweni, ni matimba lama nga ematilweni ma ta ninginisiwa.+
26 Endzhaku ka sweswo va ta vona N’wana wa munhu+ a ta a ri emapapeni hi matimba lamakulu ni ku vangama.+
27 Kutani u ta rhuma tintsumi takwe, ku ya hlengeleta vahlawuriwa+ va yena va huma etimhehweni ta mune, ku suka emakun’wini ya misava ku ya emakun’wini+ ya matilo.
28 “Dyondzani xifaniso lexi hi nkuwa: Hi ku hatlisa loko rhavi ra wona leritsongo ri sungula ku olova naswona ri humesa matluka ya rona, ma swi tiva leswaku ximumu xi le kusuhi.+
29 Hi ku fanana na n’wina, loko mi vona swilo leswi swi endleka, tivani leswaku u le kusuhi, etinyangweni.+
30 Ndzi tiyisile ndzi ri eka n’wina, xitukulwana lexi xi nga ka xi nga hundzi ku nga si endleka swilo leswi hinkwaswo.+
31 Tilo+ ni misava swi ta hundza, kambe marito+ ya mina ma nga ka ma nga hundzi.+
32 “Malunghana ni siku ra kona ni nkarhi wa kona a ku na munhu la swi tivaka, hambi ku ri tintsumi etilweni hambi ku ri N’wana, kambe swi tiviwa hi Tatana.+
33 Tshamani mi langutile, tshamani mi hitekile,+ hikuva a mi swi tivi leswaku nkarhi lowu vekiweke wu fika rini.+
34 Swi fana ni munhu la endzelaka etikweni ra le kule,+ a siya yindlu yakwe naswona a nyika mahlonga yakwe vulawuri, rin’wana ni rin’wana ntirho wa rona, kutani a lerisa mulanguteri wa nyangwa leswaku a tshama a rindzile.
35 Hikokwalaho tshamani mi rindzile,+ hikuva a mi swi tivi leswaku n’wini wa yindlu u ta rini, kumbexana eku heleni ka siku kumbe exikarhi ka vusiku kumbe loko nkuku wu ringa kumbe nimixo+ swinene;
36 leswaku loko a fika hi xitshuketa, a nga mi kumi mi etlele.+
37 Kambe leswi ndzi mi byelaka swona, ndzi swi byela hinkwavo, Tshamani mi rindzile.”+
