1 Corintios 8:1-13
8 Jaxa sbʼaja waʼelal kʼapjitayi ja kʼulubʼal dyosik, wani xnaʼatik lek sbʼaja iti. Pe ja snajeli wani xya kaʼ jbʼajtik mas niwan, jaxa yajalkʼujoli wani stsatsankʼujolani.
2 Ta ay maʼ wa spensaraʼan bʼa ay jas wa snaʼa, mitoni snaʼa ja janekʼ tʼilan oj snaʼi.
3 Pe ta ay maʼ wa syajtay ja Dyosi, ja yeʼn ojni najuk sbʼaj yuja Dyosi.
4 Pe sbʼaja yabʼjel waʼelal kʼapubʼalyi ja kʼulubʼal dyosiki, wani xnaʼatik mini tʼun xmakuni jun kʼulubʼal dyos sok kechani ay jun Dyos.
5 Ja kristyano wa xyala aybʼi tuktukil tikʼe dyosik tanto bʼa satkʼinal sok bʼa luʼum. Anto sbʼaja kristyano ayni jitsan «dyosik» sok «ajwalalik»,
6 pe bʼa keʼntik, ja smeranili kechani ay jun Dyos, ja Tatali, ja maʼ wa xyakitik yibʼanal ja jastik junuki sok sakʼanotik bʼa yeʼna. Sok kechani ay jun Ajwalal, ja Jesukristo, sok yuj yeʼna ay yibʼanal ja jastik junuki sok teyotik ja keʼntiki.
7 Pe mini yibʼanaluke ayiʼoje ja snajel it. Jujuntik, yuja wa stoyowe kʼulubʼal dyosik ajyi, wa xyabʼye ja waʼelal jaw bʼa lajansok kʼapubʼalyi jun kʼulubʼal dyos, sok yuja mi yijuk ja sconcienciaʼeʼi, wani xkuxbʼi.
8 Pe ja waʼelali mini xya mojxukotik mas soka Dyosi. Ta mi la waʼtik, mini la jomtik ele, sok ta waʼtik, mini la tojbʼitik ele.
9 Pe talnabʼajik bʼa jachuk ja derecho awiʼojex bʼa stsajeli mi oj ya slok yok ja matik mi yijukeʼi.
10 Yujni ta ja weʼn bʼa aya wiʼoj snajel ay maʼ yilawa wana waʼel bʼa jun stemplo kʼulubʼal dyosik, ¿mi maʼ cha ojni nikjukyi ja sconciencia ja maʼ mi yijuki bʼa oj yabʼ ja waʼelalik wa xkʼapxiyi ja kʼulubʼal dyosik?
11 Yuja snajela wiʼoji wani xkʼot chʼayuk ja winik mi yijuki, pes ja Kristo chamni yuja wa wermano jawi.
12 Yajni ja weʼnlex waxa leʼa mulex jachuk soka wa wermanoʼexi sok waxa yajbʼesex ja sconcienciaʼe bʼa mito yijuki, jani wanex slejela mulex soka Kristo.
13 Ja yujil, ta ja waʼelal wa xya slok yok ja kermano, mixa nunka oj kabʼ bʼakʼet, bʼa jachuk mi oj ka slok yok ja kermano.
